Yoshua 14

1Hizi ndizo nchi ambazo Waisraeli walipokea kuwa urithi wao katika nchi ya Kanaani. Eleazari kuhani, Yoshua mwana wa Nuni na wakuu wa jamaa za makabila ya Israeli ndio waliowagawia nchi hizo. 2Urithi wao uligawiwa kwa kura, kama BWANA alivyokuwa ameamuru kupitia Musa, kwa makabila tisa na nusu. 3Musa alikuwa amekwisha kuwapa makabila mawili na nusu urithi wao upande wa mashariki wa Yordani, lakini hakuwapa Walawi urithi kati ya wengine. 4Wazao wa Yusufu walikuwa wamekuwa makabila mawili, Manase na Efraimu. Walawi hawakupewa fungu la nchi, ila miji ya kuishi tu, pamoja na malisho yaliyoizunguka kwa ajili ya makundi yao ya mifugo. 5Waisraeli walifanya kama BWANA alivyokuwa amemwamuru Musa, wakaigawanya nchi.

6Watu wa Yuda walimjia Yoshua huko Gilgali. Kalebu mwana wa Yefune, Mkenizi, akamwambia, “Unajua jambo ambalo BWANA alimwambia Musa mtu wa Mungu huko Kadesh-barnea kuhusu wewe na mimi. 7Musa mtumishi wa BWANA aliponituma kutoka Kadesh-barnea kuipeleleza nchi, nilikuwa na umri wa miaka arobaini. Nilimletea habari iliyolingana na yale yaliyokuwa moyoni mwangu. 8Wenzangu tuliopanda pamoja waliwavunja watu moyo, lakini mimi nilimfuata BWANA Mungu wangu kwa moyo wangu wote. 9Siku ile Musa aliapa: ‘Nchi uliyoikanyaga kwa mguu wako hakika itakuwa urithi wako na wa wazao wako daima, kwa sababu umemfuata BWANA Mungu wangu kwa moyo wako wote.’ 10Sasa BWANA ameniweka hai, kama alivyoahidi, kwa miaka hii arobaini na mitano tangu alipomwambia Musa jambo hilo, Israeli walipokuwa wakisafiri nyikani. Na mimi hapa leo, nina umri wa miaka themanini na mitano. 11Leo bado nina nguvu kama siku ile Musa aliponituma. Nguvu zangu sasa ni kama zilivyokuwa wakati ule, kwa vita na kwa kutoka na kuingia. 12Basi sasa nipe nchi hii ya milima ambayo BWANA aliniahidi siku ile. Wewe mwenyewe ulisikia wakati ule kwamba Waanaki walikuwa huko, wakiwa na miji mikubwa yenye ngome. Huenda BWANA atakuwa pamoja nami, nami nitawafukuza, kama BWANA alivyosema.” 13Yoshua alimbariki, akampa Kalebu mwana wa Yefune Hebroni kuwa urithi wake. 14Kwa hiyo Hebroni imekuwa mali ya Kalebu mwana wa Yefune Mkenizi kuwa urithi wake hadi leo, kwa sababu alimfuata BWANA, Mungu wa Israeli, kwa moyo wake wote. 15Hebroni zamani iliitwa Kiriath-arba, kwa jina la Arba, aliyekuwa mtu mkuu kuliko wote kati ya Waanaki. Kisha nchi ikawa na amani bila vita.