1 Wakorintho 1

1Kutoka kwa Paulo, aliyeitwa kwa mapenzi ya Mungu kuwa mtume wa Kristo Yesu, na kutoka kwa Sosthene ndugu yetu, 2kwa kanisa la Mungu lililoko Korintho: kwenu ninyi mliotakaswa katika Kristo Yesu, mlioitwa kuwa watu watakatifu wa Mungu, pamoja na wote wanaoliitia jina la Bwana wetu Yesu Kristo kila mahali, aliye Bwana wao na Bwana wetu pia. 3Neema na amani ziwe nanyi kutoka kwa Mungu Baba yetu na kutoka kwa Bwana Yesu Kristo.

4Ninamshukuru Mungu wangu kwa ajili yenu wakati wote, kwa sababu ya neema ambayo Mungu aliwapa katika Kristo Yesu. 5Ndani yake mmetajirishwa katika kila jambo: katika kila namna ya kusema na kila namna ya maarifa. 6Kwa njia hiyo ushuhuda kuhusu Kristo ulithibitishwa imara kati yenu, 7na hivyo hampungukiwi na karama yoyote ya neema mnapongoja kufunuliwa kwa Bwana wetu Yesu Kristo. 8Yeye pia atawaimarisha hadi mwisho, ili msiwe na lawama yoyote katika siku ya Bwana wetu Yesu Kristo. 9Mungu ni mwaminifu. Yeye ndiye aliyewaita muwe na ushirika na Mwana wake, Yesu Kristo Bwana wetu.

10Basi ndugu, nawasihi kwa jina la Bwana wetu Yesu Kristo: kubalianeni ninyi nyote, na pasiwe na migawanyiko kati yenu. Kile kilichochanika kishonwe upya, ili muungane pamoja, mkiwa na nia moja na kusudi moja. 11Nasema hivi, ndugu zangu, kwa sababu watu wa Kloe wameniarifu waziwazi kwamba mashindano yamezuka kati yenu. 12Ninachomaanisha ni kwamba kila mmoja wenu anashika upande: “Mimi ni mfuasi wa Paulo,” “Mimi ni mfuasi wa Apolo,” “Mimi ni mfuasi wa Kefa,” “Mimi ni mfuasi wa Kristo.” 13Je, Kristo amegawanywa vipande vipande? Je, ni Paulo aliyesulubiwa kwa ajili yenu? Au je, mlibatizwa katika jina la Paulo? 14Kwa jinsi mambo yalivyo, ninashukuru kwamba sikumbatiza hata mmoja wenu isipokuwa Krispo na Gayo, 15ili mtu yeyote asiweze kudai kwamba mlibatizwa katika jina langu. 16Ndiyo, niliwabatiza pia watu wa nyumbani mwa Stefana. Zaidi ya hao, sikumbuki kwamba nilimbatiza mtu mwingine. 17Kwa maana Kristo hakunituma kubatiza; alinituma kuhubiri Injili, tena si kwa maneno ya ufasaha yanayosikika kuwa ya hekima, ili msalaba wa Kristo usinyang’anywe nguvu yake.

18Kwa wale walio katika njia ya kuangamia, ujumbe wa msalaba ni upumbavu; lakini kwetu sisi tunaookolewa, ni nguvu ya Mungu. 19Kwa maana Maandiko yanasema, “Nitaiangamiza hekima ya wenye hekima, na busara ya wenye busara nitaifanya kuwa bure.” 20Yuko wapi mtu mwenye hekima? Yuko wapi mtaalamu wa sheria? Yuko wapi mtu stadi wa mijadala wa zama hizi za sasa? Je, Mungu hajaonyesha kwamba hekima ya ulimwengu ni upumbavu? 21Kwa maana katika hekima ya Mungu, ulimwengu, pamoja na hekima yake yote, haukufikia kumjua Mungu. Kwa hiyo Mungu alipenda kuwaokoa wanaoamini kupitia ujumbe tunaouhubiri, ingawa unaonekana kuwa upumbavu. 22Wayahudi wanadai ishara, na Wagiriki wanatafuta hekima. 23Lakini sisi tunamhubiri Kristo aliyesulubiwa. Kwa Wayahudi hili ni kikwazo kinachowakwaza, na kwa watu wa mataifa ni upumbavu; 24lakini kwa wale ambao Mungu amewaita, Wayahudi na Wagiriki vilevile, Kristo ni nguvu ya Mungu na hekima ya Mungu. 25Kwa maana jambo la kipumbavu alilofanya Mungu lina hekima kuliko hekima yoyote ya wanadamu, na jambo dhaifu alilofanya Mungu lina nguvu kuliko nguvu yoyote ya wanadamu.

26Angalieni wito wenu wenyewe, ndugu. Mungu alipowaita, si wengi wenu mliokuwa na hekima kwa vipimo vya kibinadamu, si wengi mliokuwa na mamlaka, si wengi mliotoka katika familia mashuhuri. 27Badala yake, Mungu alichagua kile ambacho ulimwengu unakiona kuwa upumbavu, ili awaaibishe wenye hekima. Mungu alichagua kile ambacho ulimwengu unakiona kuwa dhaifu, ili awaaibishe wenye nguvu. 28Mungu alichagua kile ambacho ulimwengu unakiona kuwa duni na kukidharau, mambo yasiyo kitu, ili ayabatilishe mambo yaliyo kitu, 29ili mwanadamu yeyote asipate kamwe kujivuna mbele za Mungu. 30Ni Mungu aliyewaweka ninyi katika Kristo Yesu, naye amekuwa hekima ya Mungu kwetu, yaani haki yetu, utakaso wetu na ukombozi wetu. 31Kwa hiyo, kama Maandiko yasemavyo, “Yeyote anayejivuna, na ajivunie Bwana.”