1 Wakorintho 11

1Nifanyeni kuwa kielelezo chenu, kama mimi ninavyomfanya Kristo kuwa kielelezo changu.

2Nawasifu kwa sababu mnanikumbuka katika kila jambo, na mnayashika imara mapokeo kwa namna ileile nilivyowakabidhi. 3Lakini kuna jambo ninalotaka mlielewe: Kristo ni kichwa cha kila mwanamume, mwanamume ni kichwa cha mwanamke, na Mungu ni kichwa cha Kristo. 4Mwanamume yeyote anayeomba au kutoa unabii akiwa amefunika kichwa chake anakiletea aibu kichwa chake. 5Lakini mwanamke anayeomba au kutoa unabii bila kitu cha kufunika kichwa chake anakiaibisha kichwa chake; si tofauti na kunyolewa kichwa. 6Ikiwa mwanamke hafuniki kichwa, basi na akatwe nywele fupi kabisa pia. Lakini ikiwa ni aibu kwa mwanamke kukatwa nywele fupi kabisa au kunyolewa, basi na afunike kichwa chake. 7Mwanamume hapaswi kufunika kichwa chake, kwa sababu yeye ni sura na utukufu wa Mungu. Naye mwanamke ni utukufu wa mwanamume. 8Mwanamume hakuumbwa kutoka kwa mwanamke; mwanamke aliumbwa kutoka kwa mwanamume. 9Wala mwanamume hakuumbwa kwa ajili ya mwanamke; mwanamke aliumbwa kwa ajili ya mwanamume. 10Kwa sababu hiyo, na kwa sababu ya malaika, mwanamke anapaswa kuwa na mamlaka juu ya kichwa chake. 11Lakini katika Bwana, mwanamke hawezi kuwa bila mwanamume, wala mwanamume bila mwanamke. 12Kama vile mwanamke aliumbwa kutoka kwa mwanamume, ndivyo mwanamume huzaliwa kupitia mwanamke; na vitu vyote vina chanzo chake kwa Mungu. 13Tumieni busara yenu wenyewe. Mwanamke anapomwomba Mungu, je, inafaa kichwa chake kiwe wazi? 14Je, si maumbile yenyewe yanayowafundisha jambo hili: kwa mwanamume, nywele ndefu ni aibu, 15lakini kwa mwanamke, nywele ndefu ni utukufu wake? Nywele ndefu alipewa ziwe kifuniko chake. 16Mtu yeyote akitaka kubishana juu ya jambo hili, sisi hatutambui desturi kama hiyo, wala makanisa ya Mungu hayaitambui.

17Lakini ninapowapa agizo hili linalofuata, siwasifu, kwa sababu mnapokutana, mambo yanakuwa mabaya zaidi badala ya kuwa bora. 18Kwanza kabisa, naambiwa kwamba mnapokusanyika kama kanisa mmegawanyika katika makundi, nami naamini baadhi ya habari hizo. 19Kwa maana makundi yanayopingana kati yenu hayana budi kutokea, ili wale wanaostahimili kujaribiwa waonekane jinsi walivyo. 20Kwa hiyo mnapokusanyika mahali pamoja, mnachokula si Chakula cha Bwana kwa kweli. 21Mnapokula, kila mmoja wenu huendelea na chakula chake mwenyewe; mmoja anabaki na njaa, na mwingine amelewa. 22Kwani hamna nyumba zenu wenyewe mnamoweza kula na kunywa? Au mnalidharau kanisa la Mungu na kuwaaibisha wale wasio na kitu chochote? Niwaambie nini basi? Je, niwasifu? Katika jambo hili, hapana, siwasifu.

23Kile nilichowakabidhi ninyi, mimi mwenyewe nilikipokea kutoka kwa Bwana: usiku ule alipokabidhiwa, Bwana Yesu alichukua mkate, 24akashukuru, akaumega, akasema, “Huu ni mwili wangu; ni kwa ajili yenu. Fanyeni hivi ili mnikumbuke.” 25Vivyo hivyo, chakula kilipokwisha, alichukua kikombe, akasema, “Kikombe hiki ni agano jipya lililofanywa kwa damu yangu. Kila mara mnapokunywa kutoka humo, fanyeni hivi ili mnikumbuke.” 26Kwa maana kila mnapokula mkate huu na kunywa kikombe, mnatangaza kifo cha Bwana mpaka atakapokuja.

27Kwa hiyo yeyote anayekula mkate au kunywa kikombe cha Bwana kwa namna isiyofaa atawajibika kwa mwili na damu ya Bwana. 28Kila mmoja wenu ajichunguze kwanza, kisha ale mkate na anywe kutoka kikombe. 29Yeyote anayekula na kunywa bila kuupambanua mwili, anajiletea hukumu kwa kula na kunywa huko. 30Hii ndiyo sababu wengi kati yenu ni dhaifu na wagonjwa, na idadi kubwa wamekufa. 31Kama tungejichunguza na kujipambanua wenyewe ipasavyo, tusingekuwa tukiingia hukumuni. 32Lakini Bwana anapotuhukumu, yeye anaturudi, ili tusije tukahukumiwa adhabu pamoja na ulimwengu.

33Basi, ndugu zangu, mnapokutana kwa ajili ya chakula, ngojaneni. 34Mtu akiwa na njaa, ale nyumbani kwake, ili kukutana kwenu kusilete hukumu. Mambo mengine yaliyobaki nitayaweka sawa nitakapokuja.