1 Wakorintho 6

1Mmoja wenu akiwa na mzozo na mwenzake, anawezaje kuthubutu kuupeleka mahakamani mbele ya wasio waadilifu badala ya mbele ya watu watakatifu wa Mungu? 2Au hamjui kwamba watu watakatifu wa Mungu watauhukumu ulimwengu? Na ikiwa ulimwengu utahukumiwa na ninyi, je, hamfai kuamua hata kesi ndogo kabisa? 3Je, hamjui kwamba tutawahukumu malaika? Si zaidi sana mambo ya maisha ya kila siku! 4Basi mnapokuwa na kesi kuhusu mambo ya kila siku, kwa nini mnawaweka kuwa mahakimu watu wasio na hadhi yoyote katika kanisa? 5Nasema hivi ili kuwaaibisha. Je, kweli hakuna mtu kati yenu mwenye hekima ya kutosha kuamua shauri kati ya ndugu, 6hata waamini wanashtakiana wao kwa wao, tena mbele ya wasioamini? 7Kwa kuwa tu mnashtakiana ninyi kwa ninyi, tayari mmeshindwa, hukumu iwe vyovyote. Kwa nini msikubali kutendewa vibaya badala yake? Kwa nini msikubali kudanganywa badala yake? 8Badala yake, ninyi wenyewe ndio mnaodhulumu na kudanganya, tena ndugu zenu wenyewe!

9Au hamjui kwamba watu wanaotenda maovu hawatapokea ufalme wa Mungu kama urithi wao? Msijidanganye: waasherati, waabudu sanamu, wazinzi, wanaume wanaokubali kutendwa kingono na wanaume, wanaume wanaolala na wanaume, 10wezi, wenye tamaa ya mali, walevi, watukanaji na walaghai: hakuna hata mmoja wa hao atakayeupokea ufalme wa Mungu kama urithi wake. 11Baadhi yenu mliishi hivyo zamani. Lakini mmeoshwa mkawa safi; mmetakaswa; mmehesabiwa haki mbele za Mungu, katika jina la Bwana Yesu na kupitia Roho wa Mungu wetu.

12“Ninaruhusiwa kufanya kila kitu.” Ndiyo, lakini si kila kitu kinaleta mema. “Ninaruhusiwa kufanya kila kitu.” Ndiyo, lakini sitakubali kitu chochote kiwe bwana wangu. 13“Chakula kipo kwa ajili ya tumbo, na tumbo kwa ajili ya chakula, na mwishowe Mungu atavikomesha vyote viwili.” Hata hivyo, mwili haupo kwa ajili ya uasherati; upo kwa ajili ya Bwana, na Bwana kwa ajili ya mwili. 14Mungu alimfufua Bwana, na kwa nguvu yake atatufufua sisi pia. 15Je, hamjui kwamba miili yenu ni sehemu za mwili wa Kristo? Je, basi nichukue sehemu za mwili wa Kristo na kuzifanya sehemu za mwili wa kahaba? Hasha! 16Au hamjui kwamba mwanamume anayejiunga na kahaba anakuwa mwili mmoja naye? Kwa maana Maandiko yanasema, “Hao wawili wataunganika kuwa mwili mmoja.” 17Lakini yeyote anayejiunga na Bwana ni roho moja naye. 18Kaeni mbali na uasherati! Dhambi nyingine yoyote ambayo mtu anatenda inabaki nje ya mwili, lakini mwasherati anatenda dhambi dhidi ya mwili wake mwenyewe. 19Au hamjui kwamba mwili wenu ni hekalu ambamo Roho Mtakatifu anaishi, Roho aliye ndani yenu, ambaye Mungu amewapa? Ninyi si wenu wenyewe. 20Mlinunuliwa, na gharama ililipwa kwa ajili yenu. Kwa hiyo mleteeni Mungu utukufu katika mwili wenu.