1 Wakorintho 10

1Ndugu, nataka mfahamu jambo hili: mababu zetu wote walikuwa chini ya lile wingu, na wote walivuka bahari. 2Wote walibatizwa wakawa wa Musa katika wingu na katika bahari. 3Wote walikula chakula kilekile cha kiroho, 4na wote walikunywa kinywaji kilekile cha kiroho. Walikunywa kutoka kwenye mwamba wa kiroho uliofuatana nao, na mwamba huo ulikuwa Kristo. 5Hata hivyo, Mungu hakupendezwa na wengi wao, kwa maana miili yao ilitapakaa kote nyikani.

6Matukio haya yakawa mifano kwetu, yakituonya tusitamani yaliyo maovu kama wao walivyotamani. 7Msiwe waabudu sanamu, kama baadhi yao walivyokuwa. Maandiko yanasema, “Watu waliketi kula na kunywa, kisha wakainuka kufanya sherehe.” 8Tusijitie katika uasherati, kama baadhi yao walivyofanya, wakaanguka wakafa watu 23,000 katika siku moja. 9Wala tusiijaribu subira ya Kristo, kama baadhi yao walivyoijaribu; waliuawa na nyoka mmoja baada ya mwingine. 10Msimnung’unikie Mungu kama baadhi yao walivyonung’unika, wakaangamia kwa mkono wa Mwangamizi. 11Yaliyowapata yalikusudiwa kuwa mfano, nayo yaliandikwa ili kutuonya sisi tunaoishi wakati ambapo zama zinafikia mwisho wake. 12Kwa hiyo yeyote anayejiona kuwa amesimama imara na ajihadhari, asije akaanguka. 13Jaribu lililowapata si jingine ila lile linalowapata watu wote. Lakini Mungu ni mwaminifu, naye hataruhusu mjaribiwe kupita nguvu zenu. Pamoja na jaribu, yeye atafanya pia njia ya kutokea, ili mweze kulistahimili.

14Basi, rafiki zangu wapendwa, ikimbieni ibada ya sanamu. 15Nasema nanyi kama watu wenye busara. Pimeni wenyewe ninachosema. 16Tunapokibariki kikombe cha baraka, je, hatupewi kushiriki katika damu ya Kristo? Tunapoumega mkate, je, hatupewi kushiriki katika mwili wa Kristo? 17Mkate ni mmoja, na kwa hiyo sisi, ingawa tu wengi, tu mwili mmoja, kwa sababu sote tunashiriki mkate huo mmoja. 18Tazameni Israeli, taifa kwa uzao wa kibinadamu. Je, wale wanaokula sehemu ya dhabihu hawashiriki madhabahu? 19Basi ninasema nini hapa? Kwamba chakula kilichotolewa sadaka kwa sanamu kina maana yoyote? Au kwamba sanamu ni kitu chochote? 20Hapana. Ninamaanisha kwamba vitu ambavyo watu huvitoa dhabihu kwa sanamu, huvitoa kwa pepo wala si kwa Mungu. Nami sitaki ninyi mwe washirika wa pepo. 21Haiwezekani ninyi kunywa kutoka kikombe cha Bwana na pia kutoka kikombe cha pepo, au kula mezani pa Bwana na pia mezani pa pepo. 22Au tunataka kuuchochea wivu wa Bwana? Je, tunadhani tuna nguvu kuliko yeye? 23“Kila kitu kimeruhusiwa.” Ndiyo, lakini si kila kitu kinaleta mema. “Kila kitu kimeruhusiwa.” Ndiyo, lakini si kila kitu huwajenga wengine. 24Mtu asitafute faida yake mwenyewe, bali faida ya mtu mwingine. 25Mnaweza kula chochote kinachouzwa katika soko la nyama bila kuuliza maswali kwa ajili ya dhamiri, 26kwa sababu “dunia ni mali ya Bwana, pamoja na vyote vilivyomo.” 27Tuseme mtu asiyeamini anawaalika chakulani, nanyi mmeamua kwenda. Basi kuleni chochote mnachopakuliwa, wala msiulize maswali kwa ajili ya dhamiri. 28Lakini mtu akiwaonyesha, “Hii imetoka kwenye dhabihu ya hekaluni,” msiile. Fanyeni hivyo kwa kumjali yule aliyewaambia, na kwa ajili ya dhamiri. 29Ninaposema dhamiri, ninamaanisha dhamiri ya mtu yule mwingine, si yako. Kwa maana kwa nini uhuru wangu uhukumiwe na dhamiri ya mtu mwingine? 30Ikiwa ninakula sehemu yangu kwa shukrani, kwa nini mtu yeyote anisemee mabaya kwa sababu ya chakula ambacho nimemshukuru Mungu kwa ajili yake? 31Basi, mnapokula, mnapokunywa, chochote mnachofanya, fanyeni kila kitu kwa ajili ya utukufu wa Mungu. 32Msimkwaze mtu yeyote, awe Myahudi, awe Mgiriki, au kanisa la Mungu. 33Mimi nami hufanya vivyo hivyo: katika yote ninayofanya najitahidi kuwapendeza watu wote, nikitafuta si kile kinachonifaa mimi, bali kile kinachowafaa wengi, ili waokolewe.