1 Wakorintho 9

1Je, mimi si mtu huru? Je, mimi si mtume? Je, sijamwona Yesu Bwana wetu? Je, ninyi si matunda ya kazi yangu katika Bwana? 2Huenda wengine hawanihesabu kuwa mtume, lakini kwenu hakika mimi ni mtume. Kwa maana ninyi wenyewe, mkiwa katika Bwana, ndio muhuri unaothibitisha utume wangu.

3Huu ndio utetezi wangu kwa wale wanaonihoji kama mahakamani: 4Hakika tuna ruhusa ya kupewa chakula na kinywaji, sivyo? 5Hakika tuna ruhusa ya kusafiri pamoja na mke aliye mwamini, kama wanavyofanya mitume wengine, na ndugu za Bwana, na Kefa, sivyo? 6Au ni Barnaba na mimi peke yetu tusio na ruhusa ya kuacha kufanya kazi ya kujipatia riziki? 7Ni nani amewahi kutumika jeshini na kujilipia gharama zake mwenyewe? Ni nani hupanda shamba la mizabibu asile hata zabibu moja? Ni nani huchunga kundi asipate maziwa yake? 8Je, nasema haya kwa mamlaka ya kibinadamu tu? Je, sheria haisemi jambo hilo hilo? 9Kwa maana katika sheria ya Musa imeandikwa, “Usimfunge kinywa ng’ombe anapopura nafaka.” Je, ni ng’ombe ambao Mungu anawajali hapa? 10Au hakika hasemi hivyo kwa ajili yetu? Ndiyo, haya yaliandikwa kwa ajili yetu: anayelima anapaswa kulima akiwa na matumaini, na anayepura anapaswa kufanya kazi akitazamia kupata sehemu ya mavuno. 11Sisi tulipanda kati yenu mambo ya Roho. Je, ni kudai mno ikiwa tutavuna kutoka kwenu mahitaji ya mwili? 12Ikiwa wengine wanashiriki ruhusa hii ya kusaidiwa nanyi, je, sisi hatustahili zaidi? Hata hivyo hatukuidai ruhusa hii kamwe. Tunavumilia kila taabu ili tusiizuie Injili ya Kristo kwa namna yoyote. 13Je, hamjui kwamba wale wanaofanya kazi takatifu ya hekalu hupata chakula chao kutoka hekaluni, na wale wanaohudumu madhabahuni hupata sehemu ya kile kinachotolewa juu yake? 14Kwa namna hiyo hiyo Bwana aliagiza kwamba wale wanaotangaza Injili wapate riziki yao kutokana na Injili.

15Lakini mimi sijatumia hata moja ya ruhusa hizi. Sikuandika haya ili nifanyiwe hivyo. Afadhali nife kuliko hivyo. Hakuna atakayeniondolea sababu yangu ya kuona fahari! 16Kuhubiri Injili hakunipi sababu ya kuona fahari, kwa maana nimelazimishwa kufanya hivyo. Ole wangu nisipohubiri Injili! 17Kama ningefanya hivi kwa hiari yangu, ningekuwa na ujira. Lakini kama si kwa hiari yangu, nimekabidhiwa tu kazi ya msimamizi wa nyumba. 18Basi, ujira wangu ni nini? Ni huu: ninapohubiri Injili, ninaitoa bila gharama kwa mtu yeyote, na hivyo siitumii kikamilifu ruhusa niliyo nayo katika Injili.

19Hakuna mtu aliye na mamlaka juu yangu, lakini nimejifanya mtumwa wa kila mtu, ili niwavute watu wengi zaidi. 20Kwa hiyo kwa Wayahudi nilikuwa kama Myahudi, ili niwavute Wayahudi. Kwa ajili ya walio chini ya sheria nilikuwa kama aliye chini ya sheria, ingawa mimi mwenyewe siko chini ya sheria, ili niwavute walio chini ya sheria. 21Kwa wasio na sheria nilikuwa kama asiye na sheria, ili niwavute wasio na sheria. Lakini mimi si mtu asiye na sheria ya Mungu; ninaishi chini ya sheria ya Kristo. 22Kwa walio dhaifu nilikuwa dhaifu, ili niwavute walio dhaifu. Kwa watu wote nimekuwa kila kitu, ili kwa njia moja au nyingine niwaokoe baadhi yao. 23Kila ninachofanya ni kwa ajili ya Injili, ili nipate sehemu yangu katika baraka zake pamoja nao.

24Je, hamjui kwamba kila mkimbiaji uwanjani hushindana mbio, lakini ni mmoja tu anayepewa tuzo? Kimbieni kama yeye, ili mshinde tuzo. 25Kila mshindani hujinyima mambo mengi katika mazoezi yake. Wao hukubali hivyo ili washinde shada linalonyauka upesi; sisi, ili tushinde shada lisilonyauka kamwe. 26Hivyo ndivyo ninavyokimbia: si kama mkimbiaji asiyejua mwisho wa mbio uko wapi. Hivyo ndivyo ninavyopigana ngumi: si kama mpiganaji anayerusha ngumi hewani tu. 27Badala yake, nauadhibu mwili wangu kwa mapigo na kuutendea kama mtumishi wangu, ili baada ya kuwahubiri wengine, mimi mwenyewe nisije nikaonekana sifai.