1 Wakorintho 7

1Basi kuhusu mambo mliyoniandikia: “Ni vizuri mwanamume asikutane kimwili na mwanamke.” 2Lakini kwa kuwa uasherati umeenea kila mahali, kila mwanamume na akutane kimwili na mke wake mwenyewe, na kila mwanamke vivyo hivyo na mume wake mwenyewe. 3Mume ampe mkewe kile anachomwia katika ndoa, na mke naye afanye vivyo hivyo kwa mumewe. 4Mke hautawali mwili wake mwenyewe; mumewe ndiye anayeutawala. Vivyo hivyo, mume hautawali mwili wake mwenyewe; mkewe ndiye anayeutawala. 5Msinyimane, isipokuwa mmekubaliana wote wawili kwa muda maalum ili mpate nafasi ya kuomba. Kisha kutaneni tena, Shetani asije akatumia kushindwa kwenu kujizuia ili kuwajaribu. 6Ninachosema hapa ni ruhusa; si amri. 7Ningependa kila mtu awe kama nilivyo mimi. Lakini Mungu humpa kila mtu karama yake mwenyewe, mmoja kwa namna hii, mwingine kwa namna ile.

8Basi nawaambia wasio na ndoa na wajane: ni jambo jema kwao wakibaki kama nilivyo mimi. 9Lakini kama hawajizuii, na wafunge ndoa, kwa maana ni afadhali kufunga ndoa kuliko kuwaka kwa tamaa.

10Kwa wale walio katika ndoa natoa agizo, nalo si langu bali ni la Bwana: mke asimwache mumewe. 11Na ikiwa ameachana naye, abaki bila kuolewa au apatane na mumewe. Na mume asimtaliki mkewe.

12Kwa wengine wote nasema mimi mwenyewe; si neno kutoka kwa Bwana. Tuseme ndugu ana mke asiyeamini, na mke huyo yuko radhi kuendelea kuishi naye: asimtaliki. 13Na ikiwa mwanamke ana mume asiyeamini, na mume huyo yuko radhi kuendelea kuishi naye, asimwache. 14Kwa maana mume asiyeamini ametakaswa kupitia mkewe, na mke asiyeamini ametakaswa kupitia ndugu aliyemwoa. Kama sivyo, watoto wenu wangekuwa najisi; lakini kwa kweli wao ni watakatifu. 15Lakini ikiwa yule asiyeamini anaamua kutengana, waache watengane. Ndugu wa kiume au wa kike hafungwi katika hali kama hizo. Mungu ametuita katika amani. 16Wewe mke, unawezaje kujua kama utamwokoa mumeo? Au wewe mume, unawezaje kujua kama utamwokoa mkeo? 17Iwe vyovyote vile, kila mmoja wenu na aishi maisha ambayo Bwana amempa, maisha aliyokuwa nayo Mungu alipomwita. Ninatoa agizo hili hili katika makanisa yote. 18Je, mtu alikuwa ameshatahiriwa alipoitwa? Asijaribu kuiondoa. Je, mtu alikuwa hajatahiriwa alipoitwa? Asikubali kutahiriwa. 19Kutahiriwa si kitu, na kutotahiriwa si kitu. Kilicho muhimu ni kuzitii amri za Mungu. 20Kila mmoja wenu na aendelee katika nafasi ya maisha ambamo wito wa Mungu ulimkuta.

21Je, ulikuwa mtumwa ulipoitwa? Usihangaike kwa hilo. Lakini ukipata nafasi ya kuwa huru, itumie vizuri. 22Kwa maana mtumwa aliyeitwa katika Bwana ni mtu ambaye Bwana amemweka huru; na vivyo hivyo, mtu huru aliyeitwa ni mtumwa wa Kristo. 23Mlinunuliwa, na gharama ililipwa kwa ajili yenu. Msiwe watumwa wa wanadamu. 24Kwa hiyo, ndugu, hali yoyote mliyokuwa nayo Mungu alipowaita, kaeni ndani yake, mkiishi mbele za Mungu.

25Basi kuhusu wale ambao hawajawahi kufunga ndoa: sina amri kutoka kwa Bwana, lakini natoa maoni yangu kama mtu ambaye Bwana kwa huruma yake amemfanya kuwa mwaminifu. 26Kwa hiyo, kwa sababu ya hali ngumu tunayokabili sasa, nadhani hili ni jema: ni vizuri mtu abaki kama alivyo. 27Je, umefungwa na mke? Usijaribu kujinasua. Je, uko huru, huna mke? Usitafute mke. 28Hata hivyo, ukioa, hujatenda dhambi yoyote. Na msichana ambaye hajawahi kuolewa akiolewa, hajatenda dhambi yoyote. Lakini watu kama hao watapata dhiki katika maisha haya ya duniani, nami najaribu kuwaepushia. 29Ninachomaanisha, ndugu, ni hiki: wakati umefupishwa. Kwa hiyo tangu sasa, wanaume walio na wake na wawe kama hawana wake, 30wanaolia kama hawalii, wanaofurahi kama hawafurahi, wanaonunua kama hawana mali yoyote, 31na wale wanaoshughulika na mambo ya ulimwengu kama hawayatumii kikamilifu. Kwa maana sura ya sasa ya ulimwengu huu inapita.

32Nataka msiwe na mahangaiko yanayowagawa. Mwanamume asiye na mke huelekeza moyo wake kwa mambo ya Bwana, jinsi atakavyompendeza. 33Lakini mwanamume aliyeoa huelekeza moyo wake kwa mambo ya ulimwengu, jinsi atakavyompendeza mkewe, 34na hivyo anavutwa pande mbili. Na mwanamke asiye na mume, au msichana ambaye hajawahi kuolewa, huelekeza moyo wake kwa mambo ya Bwana, ili awe mtakatifu katika mwili na pia katika roho. Lakini mwanamke aliyeolewa huelekeza moyo wake kwa mambo ya ulimwengu, jinsi atakavyompendeza mumewe. 35Nawaambia haya ili kuwasaidia, si kuwatupia kitanzi. Nataka muishi kama inavyofaa na mkae karibu na Bwana bila kitu chochote cha kuwavuta mbali.

36Basi ikiwa mwanamume anadhani kwamba hamtendei ipasavyo msichana aliyemchumbia, kwa sababu tamaa yake kwake ni kubwa na ndoa inapaswa kufanyika, na afanye anavyotaka. Hatendi dhambi. Na wafunge ndoa. 37Lakini tuseme mwanamume amesimama imara moyoni mwake. Hana shinikizo lolote, anaweza kuyatawala mapenzi yake, na ameamua moyoni mwake kwamba msichana aliyemchumbia abaki kama alivyo. Atafanya vyema. 38Kwa hiyo mwanamume anayemwoa msichana aliyemchumbia anafanya vyema, na yule asiyemwoa atafanya vyema zaidi.

39Mke anabaki amefungwa kwa muda wote mumewe akiwa hai. Mumewe akifariki, yuko huru kuolewa na yeyote amtakaye, ila awe mtu aliye wa Bwana tu. 40Hata hivyo, kwa maoni yangu, ana heri zaidi akibaki mjane. Nami naamini kwamba mimi pia nina Roho wa Mungu.