Waebrania 1

1Zamani Mungu alisema na mababu kupitia manabii, kwa sehemu nyingi zilizotengana na kwa njia nyingi tofauti. 2Lakini mwishoni mwa siku hizi amesema nasi kupitia Mwana, ambaye alimweka kuwa mrithi wa vitu vyote, na ambaye pia kupitia kwake aliziumba zama. 3Mwana ni mwangaza wa utukufu wa Mungu na mfano kamili wa kiini chake, naye anavitegemeza vitu vyote kwa neno lake lenye nguvu. Baada ya kufanya usafishaji wa dhambi kupitia nafsi yake, aliketi upande wa kulia wa Ukuu aliye juu. 4Hivyo amekuwa bora kuliko malaika kwa kiasi kikubwa, kama vile jina alilorithi linavyopita jina lao.

5Kwa maana Mungu aliwahi kumwambia malaika yupi, “Wewe ni Mwana wangu; leo nimekuzaa”? Au tena, “Nitakuwa Baba yake, naye atakuwa Mwana wangu”? 6Na tena, wakati Mungu anapomleta mzaliwa wa kwanza wake ulimwenguni, anasema, “Malaika wote wa Mungu wanapaswa kumwabudu.” 7Kuhusu malaika anasema, “Huwageuza malaika wake kuwa upepo, na wale wanaomhudumia kuwa mwali wa moto.” 8Lakini kwa Mwana anasema, “Kiti chako cha enzi, Ee Mungu, kinadumu milele na milele, na fimbo ya ufalme wako ni fimbo ya unyoofu. 9Umependa haki na kuchukia uasi. Kwa hiyo Mungu, Mungu wako, amekutia mafuta ya furaha kuu, akakuweka juu ya washirika wako.” 10Tena inasema, “Bwana, hapo mwanzo wewe uliiweka dunia juu ya misingi yake, na mbingu ni kile ambacho mikono yako imefanya. 11Zitapita, lakini wewe utabaki. Zote zitachakaa kama nguo zinavyochakaa; 12wewe utazikunja kama joho, na kama nguo zitabadilishwa kwa nyingine. Lakini wewe ni yule yule siku zote, na miaka yako haitakuwa na mwisho.” 13Je, Mungu amewahi kumwambia malaika yeyote, “Keti upande wa kulia wangu, mpaka niwaweke adui zako chini ya miguu yako kama kigoda”? 14Je, malaika wote si roho zilizo katika huduma takatifu, zinazotumwa kutumikia kwa faida ya wale ambao wokovu utakuwa urithi wao?