Waebrania 4

1Kwa hiyo, wakati ahadi ya kwamba tunaweza kuingia katika pumziko lake bado iko wazi, na tuogope isije ikaonekana kwamba yeyote kati yenu amelikosa. 2Kwa maana sisi pia tumeambiwa habari njema, kama wao walivyoambiwa. Lakini ujumbe waliousikia haukuwasaidia chochote, kwa sababu hawakuungana kwa imani na wale waliosikiliza kwa kweli. 3Kwa maana sisi tuliokwisha kuamini ndio tunaoingia katika pumziko hilo, kama alivyonena, “Basi katika ghadhabu yangu niliapa kiapo: ‘Hawataingia kamwe katika pumziko langu.’” Hata hivyo kazi zake zilikuwa zimekamilika tangu ulimwengu ulipoanzishwa. 4Kwa maana mahali fulani amenena juu ya siku ya saba kwa maneno haya: “Na Mungu akapumzika siku ya saba kutoka katika kazi zake zote.” 5Tena katika sehemu hii: “Hawataingia kamwe katika pumziko langu.” 6Basi bado imesalia nafasi kwa wengine kuingia katika pumziko hilo, na wale waliosikia habari njema kwanza hawakuingia, kwa sababu walikataa kutii. 7Kwa sababu hiyo Mungu anaweka tena siku fulani, “Leo,” akinena kupitia Daudi muda mrefu baadaye, kama ilivyosemwa hapo juu: “Leo, mkiisikia sauti yake, msiishupaze mioyo yenu.” 8Kama Yoshua angaliwaingiza katika pumziko, Mungu asingalinena baadaye juu ya siku nyingine. 9Kwa hiyo pumziko la Sabato bado linawangoja watu wa Mungu. 10Kwa maana yeyote aliyeingia katika pumziko la Mungu amepumzika pia kutoka katika kazi zake mwenyewe, kama Mungu alivyopumzika kutoka katika kazi zake. 11Basi tuweke juhudi zetu zote kuingia katika pumziko hilo, ili mtu yeyote asianguke katika mtindo ule ule wa kutotii.

12Kwa maana neno la Mungu liko hai na linafanya kazi, nalo lina makali kuliko upanga wowote wenye makali pande mbili. Linapenya ndani kabisa, likikata kupitia nafsi na roho, kupitia viungo na uboho, nalo linapima mawazo na nia za moyo. 13Hakuna kitu kilichoumbwa kilichofichika mbele yake. Vitu vyote vimevuliwa kila kifuniko na viko wazi mbele ya macho ya yule ambaye tunapaswa kumjibu.

14Basi, tuna kuhani mkuu mwenye ukuu aliyepita katikati ya mbingu: Yesu Mwana wa Mungu. Kwa hiyo na tuushike kwa uthabiti ukiri tunaoutamka. 15Kwa maana kuhani mkuu tuliye naye si mmoja asiyeweza kuguswa na udhaifu wetu; yeye amejaribiwa kwa kila namna, kama sisi tunavyojaribiwa, ila hakutenda dhambi. 16Basi tukaribie kiti cha enzi cha neema tukiwa na ujasiri, ili tupokee rehema na kupata neema inayotuletea msaada wakati ule ule tunapouhitaji.