Waebrania 13

1Upendo mlio nao kwa kila mmoja kama ndugu na ubaki daima. 2Msisahau kuwafungulia wageni milango ya nyumba zenu. Kwa kufanya hivyo, watu wengine wamewapokea malaika kama wageni wao, na hawakujua kamwe. 3Wakumbukeni walio gerezani, kama vile mko katika minyororo pamoja nao, na wale wanaotendewa ukatili, kwa kuwa ninyi pia mnaishi katika mwili. 4Ninyi nyote mwithamini ndoa, na kukilinda kitanda cha ndoa kisitiwe unajisi; Mungu atawahukumu wale wanaoishi katika uasherati na wale wasio waaminifu katika ndoa. 5Msikubali kupenda fedha kutawale jinsi mnavyoishi; toshekeni na mlicho nacho. Kwa maana Mungu mwenyewe amesema, “Sitakuachilia kamwe hata kidogo, na kamwe, kamwe sitakutelekeza.” 6Ndiyo sababu tunaweza kusema kwa ujasiri, “Bwana ndiye anayenisaidia; sitakuwa na hofu. Binadamu yeyote anaweza kunifanya nini?” 7Wakumbukeni wale waliowaongoza, waliowaletea neno la Mungu. Tazameni kwa makini jinsi maisha yao yalivyoishia, na mfuate mfano wa imani yao. 8Jana na leo, Yesu Kristo ni yuleyule, na atakuwa hivyo hata zama zote. 9Msikubali mafundisho ya kila namna yasiyo ya kawaida yawapeleke nje ya njia. Ni vema moyo kuthibitishwa kwa neema, si kwa vyakula; wale walioishi kwa kuvifuata hawajapata faida yoyote. 10Kuna madhabahu iliyo yetu, na wale wanaofanya huduma ya hema hawaruhusiwi kula kutoka kwayo. 11Wanyama wanapotolewa kwa ajili ya dhambi, kuhani mkuu huipeleka damu yao mahali patakatifu, na miili yao huteketezwa nje ya kambi. 12Ndiyo maana Yesu pia aliteseka nje ya lango: ili kwa damu yake mwenyewe awatakase watu. 13Basi twende kwake nje ya kambi, tushiriki matusi yaliyorundikwa juu yake. 14Hakuna mji hapa unaotubakia; mji tunaoutazamia ni ule ambao bado unakuja. 15Kwa hiyo kupitia yeye tumtolee Mungu dhabihu ya sifa wakati wote: tunda la midomo inayotoa shukrani kwa jina lake. 16Tena msisahau kuwa wema na kugawana mlicho nacho ninyi kwa ninyi: Mungu hufurahia dhabihu za aina hiyo.

17Wafuateni viongozi wenu na kuwasikiliza. Wao hukesha wakizilinda nafsi zenu, kama watu watakaopaswa kujibu kwa ajili yenu. Wawezesheni kufanya kazi hii kwa furaha badala ya kulalamika kwa huzuni, kwa kuwa hilo halingewaletea faida yoyote.

18Msiache kutuombea. Tuna hakika kwamba dhamiri yetu ni safi, kwa kuwa tunataka kuishi ipasavyo kwa kila namna. 19Tena nawaomba kwa bidii zaidi mfanye hivyo, ili niletwe tena kwenu mapema iwezekanavyo.

20Mungu wa amani, aliyemrudisha kutoka kwa wafu Bwana wetu Yesu, mchungaji mkuu wa kondoo, kupitia damu ya agano la milele, 21awaandae kikamilifu katika kila jambo jema ili mfanye mapenzi yake. Na afanye ndani yetu lolote linalompendeza, kupitia Yesu Kristo. Kwake uwe utukufu hata zama zote. Amina.

22Ndugu, nawaomba mlipokee kwa uvumilivu neno hili la kuwatia moyo; hata hivyo nimewaandikia barua fupi tu. 23Mnapaswa kujua kwamba ndugu yetu Timotheo ameachiliwa. Akifika hapa mapema vya kutosha, atakuwa pamoja nami nitakapowaona. 24Wasalimieni viongozi wenu wote na watu wote wa Mungu walio watakatifu. Wale wa Italia wanawatumia salamu zao. 25Neema iwe pamoja nanyi nyote.