Waebrania 5

1Kila kuhani mkuu huchukuliwa kutoka miongoni mwa wanadamu na kuwekwa kazini kwa ajili ya wanadamu, ili ashughulikie mambo yanayohusiana na Mungu: hutoa zawadi na dhabihu kwa ajili ya dhambi. 2Anaweza kuwa mpole na mwenye kiasi kwa wale wanaotenda dhambi bila kujua na kupotea njia, kwa kuwa udhaifu unamng’ang’ania yeye pia. 3Udhaifu huo ndio sababu inampasa kutoa sadaka kwa ajili ya dhambi zake mwenyewe, kama anavyofanya kwa ajili ya watu. 4Hakuna anayeinyakua heshima hii kwa nafsi yake; ni ya yule ambaye Mungu humwita, kama Mungu alivyomwita Haruni.

5Vivyo hivyo Kristo hakujipa mwenyewe utukufu wa kuwa kuhani mkuu. Utukufu huo ulitoka kwa yule aliyemwambia, “Wewe ni Mwana wangu; leo nimekuzaa.” 6Kama yeye pia anavyosema mahali pengine, “Wewe ni kuhani milele, wa utaratibu wa Melkizedeki.” 7Siku za maisha yake katika mwili, alitoa sala na maombi, akilia kwa sauti kuu na kutokwa na machozi, kwa yule aliyeweza kumwokoa kutoka katika mauti, naye akasikiwa kwa sababu ya kumcha Mungu. 8Ingawa alikuwa Mwana, alijifunza utii kwa mambo aliyoyateseka. 9Naye akiisha kukamilishwa, akawa chanzo cha wokovu wa milele kwa kila mtu anayemtii, 10kwa kuwa Mungu alimtangaza kuwa kuhani mkuu wa utaratibu wa Melkizedeki.

11Juu ya jambo hili tuna mengi ya kusema, nayo ni magumu kuyaeleza kwa maneno, kwa sababu mmekuwa wasikilizaji wazito. 12Kwa muda uliopita, mngepaswa kuwa walimu sasa; lakini bado mnahitaji tena mtu wa kuwafundisha mambo ya msingi kabisa ya kauli za Mungu. Mmekuwa watu wenye haja ya maziwa badala ya chakula kigumu. 13Anayelishwa maziwa hana uzoefu katika neno la haki; mtu huyo bado ni mtoto mchanga. 14Chakula kigumu, kwa upande mwingine, ni cha watu wakomavu, ambao uwezo wao wa kutambua umefunzwa kwa mazoezi ili kutofautisha jema na baya.