Waebrania 2

1Hii ndiyo sababu tunapaswa kuyazingatia hata zaidi mambo tuliyoyasikia, ili tusije tukaelea mbali. 2Kwa maana ikiwa neno lililonenwa kupitia malaika lilisimama imara, na kila kulivunja na kila kukataa kulisikiliza kulipata adhabu iliyostahili, 3tutaepukaje sisi tukiupuuza wokovu mkubwa kama huu? Bwana ndiye aliyekuwa wa kwanza kuunena, nao ukathibitishwa kwetu na wale waliomsikiliza, 4huku Mungu naye akiongeza ushuhuda wake kwa ishara na maajabu, kwa matendo ya nguvu ya kila aina, na kwa kugawa Roho Mtakatifu kama yeye alivyopenda. 5Kwa maana Mungu hakuuweka ulimwengu ujao, ule tunaouzungumzia, chini ya utawala wa malaika. 6Lakini kuna mahali ambapo mtu fulani ameshuhudia, “Binadamu ni nini, kwamba unamkumbuka, au mwanadamu, kwamba unamjali? 7Ulimfanya kuwa chini kidogo kuliko malaika; kwa utukufu na heshima ulimvika taji, 8na ukaweka vitu vyote chini ya miguu yake.” Mungu alipomtiishia vitu vyote, hakuacha kitu chochote ambacho hakijawekwa chini yake. Lakini kama ilivyo sasa, bado hatuoni vitu vyote vikiwa chini yake. 9Lakini Yesu tunamwona. Kwa muda mfupi aliwekwa chini kuliko malaika, na kwa sababu ya kifo alichokiteseka amevikwa taji kwa utukufu na heshima, ili mbali na Mungu aonje kifo kwa ajili ya kila mtu.

10Kwa maana Mungu, ambaye kwa ajili yake kila kitu kipo na kupitia kwake kila kitu kipo, alikuwa akiwaleta wana wengi kwenye utukufu. Kwa hiyo ilimfaa yeye kumkamilisha kupitia mateso kiongozi anayewaongoza kwenye wokovu. 11Kwa maana yule anayetakasa na wale wanaotakaswa wote wanatoka katika chanzo kimoja. Ndiyo sababu haoni aibu kuwaita ndugu. 12Anasema, “Nitawajulisha ndugu zangu jina lako; katikati ya kusanyiko nitaimba sifa zako.” 13Na tena, “Nitaendelea kumtumaini yeye.” Na tena, “Mimi hapa, pamoja na watoto ambao Mungu amenipa.”

14Basi, kwa kuwa watoto wanashiriki maisha ya pamoja ya mwili na damu, yeye mwenyewe aliyapokea maisha hayo hayo kwa namna ile ile, ili kwa kifo chake amnyang’anye nguvu yule anayeshika mamlaka ya kifo, yaani Ibilisi, 15na kuwaweka huru wale ambao hofu ya kifo iliwaweka utumwani maisha yao yote. 16Kwa maana ni wazi kwamba hawashiki malaika ili kuwasaidia; ni wazao wa Ibrahimu ndio anaowashika. 17Ndiyo sababu ilikuwa lazima afanane na ndugu zake kwa kila namna, ili awe kuhani mkuu mwenye huruma na mwaminifu katika yote yanayomhusu Mungu, akifanya upatanisho kwa ajili ya dhambi za watu. 18Kwa kuwa yeye mwenyewe aliteseka katika kujaribiwa, anaweza kuwafikia kwa msaada wale wanaojaribiwa.