Waebrania 3

1Basi, ndugu watakatifu, mnaoshiriki wito wa mbinguni, elekezeni mawazo yenu kwa Yesu, mtume na kuhani mkuu wa ukiri tunaoutamka. 2Alikuwa mwaminifu kwa Mungu aliyemweka, kama Musa naye alivyokuwa mwaminifu katika nyumba ya Mungu. 3Kwa maana Yesu amehesabiwa kustahili utukufu zaidi kuliko Musa, kama vile mjenzi wa nyumba anavyopewa heshima zaidi kuliko jengo lenyewe. 4Kila nyumba, hata hivyo, ina mtu aliyeijenga; na aliyejenga kila kitu ni Mungu. 5Musa alikuwa mwaminifu katika nyumba yote ya Mungu akiwa mtumishi, akishuhudia yale ambayo Mungu angesema siku za baadaye. 6Lakini Kristo ni mwaminifu akiwa Mwana, aliyewekwa juu ya nyumba ya Mungu. Na sisi ndio nyumba hiyo, ikiwa tunaendelea kushikilia ujasiri wetu na tumaini tunalojivunia.

7Basi, kama Roho Mtakatifu asemavyo, “Leo, mkiisikia sauti yake, 8msiishupaze mioyo yenu kama ilivyotokea wakati wa uasi, siku ile ya majaribu jangwani, 9ambapo mababu zenu walinijaribu na kunipima, wakaziona kazi zangu 10kwa miaka arobaini. Ndiyo sababu nilikikasirikia kizazi hiki, nikasema, ‘Mioyo yao inatangatanga daima; hawajapata kamwe kuzijua njia zangu.’ 11Basi katika ghadhabu yangu niliapa kiapo: ‘Hawataingia kamwe katika pumziko langu.’” 12Jihadharini, ndugu, ili asiwepo yeyote kati yenu mwenye moyo mwovu unaokataa kuamini na kumwacha Mungu aliye hai. 13Badala yake, mtiane moyo siku kwa siku, maadamu bado kuna “Leo,” ili dhambi isimdanganye yeyote kati yenu na kumfanya mgumu. 14Kwa maana tumekuwa washirika wa Kristo, ilimradi tushikilie uhakika tuliokuwa nao mwanzoni, imara na thabiti, hadi mwisho kabisa. 15Kama Maandiko yasemavyo: “Leo, mkiisikia sauti yake, msiishupaze mioyo yenu kama ilivyotokea wakati wa uasi.” 16Ni akina nani waliosikia na bado wakaasi? Je, hawakuwa wale wote waliotoka Misri, Musa akiwa kiongozi wao? 17Na ni akina nani ambao Mungu aliwakasirikia kwa miaka arobaini? Je, hawakuwa wale watu waliotenda dhambi, ambao maiti zao zililala jangwani? 18Na ni akina nani ambao Mungu aliapa kwamba hawataingia kamwe katika pumziko lake, ikiwa si wale waliokataa kutii? 19Kwa hiyo tunaona kwamba kutoamini ndiko kulikowazuia wasiingie.