Waebrania 6

1Basi tuache nyuma ujumbe wa kwanza kuhusu Kristo na tuchukuliwe mbele hadi ukomavu. Tusiwe tukiweka msingi upya tena: kugeuka kutoka kwa matendo mafu na kumwamini Mungu, 2mafundisho kuhusu taratibu za kidini za kuosha na kuweka mikono, kufufuliwa kwa wafu na hukumu ya milele. 3Nasi tutafanya hivyo, Mungu akiruhusu.

4Wapo wale waliokwisha kutiwa nuru mara moja, walioonja zawadi itokayo mbinguni, waliopata sehemu katika Roho Mtakatifu, 5walioonja kwamba neno la Mungu ni jema, wakaonja pia nguvu za enzi ijayo, 6kisha wakarudi nyuma. Haiwezekani warudishwe tena kwenye toba, kwa kuwa wanamsulubisha Mwana wa Mungu upya kwa ajili yao wenyewe na kumwaibisha hadharani. 7Ardhi inaponywa mvua inayoinyeshea tena na tena, na kutoa mimea inayowafaa watu wanaoilima, inashiriki baraka ya Mungu. 8Lakini ikiotesha miiba na mbigili, inakataliwa kuwa haifai, na laana iko karibu; hatimaye itachomwa moto.

9Hata hivyo kuhusu ninyi, wapendwa, tuna hakika ya mambo bora zaidi, mambo yanayokwenda pamoja na wokovu, hata kama tunazungumza hivi. 10Kwa maana Mungu hatendi isivyo haki kiasi cha kusahau kazi yenu na upendo mliouonyesha kwa jina lake kwa kuwatumikia watu wake watakatifu, na kwa kuendelea kuwatumikia hadi sasa. 11Shauku yetu ni kwamba kila mmoja wenu aonyeshe bidii hiyo hiyo mpaka mwisho, hadi tumaini lenu liwe na uhakika kamili. 12Ndipo hamtakuwa wazito; mtafuata mfano wa wale ambao, kwa imani na subira, wanazipokea ahadi kama urithi wao.

13Mungu alipotoa ahadi kwa Ibrahimu, na kwa kuwa hapakuwa na aliye mkuu zaidi ambaye angeweza kuapa kwake, aliapa kiapo kwa nafsi yake, 14akisema, “Kweli nitakubariki sana na kukuzidisha sana.” 15Na hivyo, baada ya kungoja kwa subira, Ibrahimu aliipata ahadi. 16Wanadamu huapa kwa aliye mkuu kuliko wao, na kwao kiapo humaliza kila ubishi, kwa sababu kinathibitisha kilichosemwa. 17Kwa hiyo Mungu, akitaka warithi wa ahadi waone kwa uwazi zaidi kwamba kusudi lake halitabadilika kamwe, aliongeza kiapo ili kulidhamini. 18Alifanya hivyo ili, kupitia vitu viwili visivyoweza kubadilika, ambavyo katika hivyo Mungu hawezi kamwe kusema uongo, sisi tuliokimbia kutafuta kimbilio tupate kutiwa moyo sana tulikamate tumaini lililo mbele yetu. 19Tumaini hili ni letu kama nanga ya nafsi, nanga inayoshika salama na imara, nayo hufika katika sehemu ya ndani nyuma ya pazia. 20Huko Yesu aliingia akitutangulia na kwa ajili yetu, kama mtangulizi, akiwa amekuwa kuhani mkuu milele, wa utaratibu wa Melkizedeki.