Yakobo 1

1Kutoka kwa Yakobo, mtumishi wa Mungu na wa Bwana Yesu Kristo. Kwa makabila kumi na mawili yaliyotawanyika kati ya mataifa: salamu.

2Ndugu zangu, kila mnapojikuta katika majaribu ya kila namna, yaoneni kuwa sababu ya furaha kubwa, 3kwa maana mnajua kwamba imani yenu inapopimwa, upimaji huo hutokeza ustahimilivu. 4Acheni ustahimilivu ukamilishe kazi yake, ili mkomae na kuwa kamili, bila kukosa chochote.

5Ikiwa mmoja wenu anakosa hekima, amwombe Mungu, anayewapa watu wote kwa mkono wazi bila kuwasuta, naye atapewa. 6Lakini aombe kwa imani, bila kusitasita. Mtu anayesitasita ni kama wimbi la bahari kuu, linalosukumwa na upepo na kutupwa huku na huku. 7Mtu wa namna hiyo asitarajie kupokea chochote kutoka kwa Bwana. 8Yeye ni mwenye nia mbili, hana msimamo katika yote anayofanya.

9Ndugu aliye wa hali ya chini na ajivunie kuinuliwa juu, 10na tajiri ajivunie kushushwa chini, kwa sababu tajiri atapita kama ua la porini. 11Jua linapanda na joto lake kali na kuzikausha nyasi; ua lake linadondoka, na urembo wake wote unatoweka. Ndivyo matajiri watakavyonyauka, hata wakiwa katikati ya shughuli zao.

12Heri mtu anayestahimili wakati wa jaribu. Akishathibitishwa kuwa halisi, atapokea taji la uzima ambalo Mungu amewaahidi wale wanaompenda. 13Mtu anapojaribiwa, asidai kwamba, “Mungu ananijaribu.” Kwa maana uovu hauwezi kumvuta Mungu, wala yeye hamjaribu mtu yeyote kamwe. 14Badala yake, kila mtu hujaribiwa na tamaa yake mwenyewe, inayomvuta na kumnasa kama chambo. 15Tamaa hushika mimba na kuzaa dhambi, na dhambi ikishakua kabisa huzaa kifo. 16Msikubali kudanganywa, ndugu zangu wapenzi.

17Kila tendo jema la kutoa na kila zawadi kamilifu hutoka juu. Hushuka kutoka kwa Baba wa mianga ya angani, ambaye hana mabadiliko yoyote wala kivuli kinachotokana na mzunguko. 18Ilikuwa ni mapenzi yake kutuzaa kupitia neno la kweli, ili tuwe kitu kama limbuko miongoni mwa viumbe vyake vyote.

19Fahamuni hili kwa hakika, ndugu zangu wapendwa. Kila mtu anapaswa kuwa tayari kusikiliza, kuchelewa kusema, na kuchelewa kukasirika, 20kwa sababu hasira ya mwanadamu haitimizi haki ya Mungu. 21Basi vueni kila kitu kichafu na uovu unaofurika, na kwa roho ya upole mlipokee neno lililopandwa ndani yenu, ambalo lina nguvu ya kuokoa nafsi zenu.

22Muwe watu wanaolitekeleza neno, si watu wanaolisikia tu. La sivyo mnajidanganya wenyewe. 23Mtu anayesikia neno lakini hatendi linavyosema ni kama mtu anayechunguza uso wake katika kioo. 24Anajiangalia, anaondoka, na mara moja anasahau sura yake ilivyokuwa. 25Lakini mtu anayechunguza kwa makini sheria kamilifu ya uhuru na kuendelea nayo, asiyesikia kisha akasahau bali anayetenda kazi inayotakiwa, atabarikiwa katika kile anachofanya.

26Mtu akijiona kuwa mcha Mungu lakini hauwekei ulimi wake hatamu, anajidanganya mwenyewe, na dini yake ni tupu. 27Mbele ya Mungu Baba, dini iliyo safi na isiyochafuliwa ni hii: kuwasaidia yatima na wajane katika shida zao, na kujiweka mwenyewe bila doa la ulimwengu.