Yakobo 4

1Vita vinatoka wapi, na mapigano yaliyo kati yenu yanatoka wapi? Je, hayatoki hapa, katika anasa zenu zinazopigana vita ndani yenu? 2Mnatamani, lakini hamna. Mnaua na mnaona wivu, lakini hamwezi kupata mnachokitaka. Mnapigana na kufanya vita. Mnapungukiwa, kwa sababu hamwombi. 3Na mnapoomba, hampokei, kwa sababu mnaomba vibaya: mnataka kutumia mnachopata kwa anasa zenu. 4Enyi watu wazinzi! Je, hamjui kwamba urafiki na ulimwengu ni uadui dhidi ya Mungu? Kwa hiyo yeyote anayeamua kuwa rafiki wa ulimwengu anajiweka kuwa adui wa Mungu. 5Au mnadhani kwamba Maandiko yanasema bila maana yanaposema, “Anaitamani kwa upendo wenye wivu roho aliyoiweka ikae ndani yetu”? 6Lakini neema anayoitoa ni kubwa zaidi. Ndiyo maana inasema, “Mungu anasimama dhidi ya wenye kiburi, lakini wanyenyekevu anawapa neema.” 7Kwa hiyo jiwekeni chini ya Mungu. Simameni imara dhidi ya Ibilisi, naye atakimbia mbali nanyi. 8Jongeeni karibu na Mungu, naye atajongea karibu nanyi. Osheni mikono yenu iwe safi, enyi watenda dhambi, na mfanye mioyo yenu iwe safi, ninyi wenye nia mbili. 9Tambueni unyonge wenu, mkaomboleze na kulia. Kicheko chenu kibadilike kuwa maombolezo, na furaha yenu iwe simanzi. 10Jishusheni chini mbele ya Bwana, naye atawainua juu.

11Ndugu, msisemane vibaya. Mtu anayemsema vibaya ndugu au kumhukumu ndugu, anaisema vibaya sheria na kuihukumu sheria. Na kama unaihukumu sheria, huitendi sheria; unaihukumu. 12Kuna Mweka Sheria na Mwamuzi mmoja tu, yule mwenye uwezo wa kuokoa na kuangamiza. Lakini wewe ni nani hata umhukumu jirani yako? 13Sikilizeni sasa, ninyi mnaosema, “Leo au kesho tutasafiri kwenda mji fulani, tutakaa huko mwaka mmoja, tutaendesha biashara na kuchuma faida.” 14Lakini hamjui maisha yenu yatakuwaje kesho. Ninyi ni ukungu unaoonekana kwa muda mfupi, kisha unapotea. 15Mnachopaswa kusema badala yake ni hiki: “Bwana akitaka, tutaishi, na tutafanya hili au lile.” 16Lakini hali ilivyo, mnajigamba kwa madai yenu ya kiburi. Majigambo yote ya namna hii ni maovu. 17Kwa hiyo mtu akijua jema analopaswa kufanya, na asilifanye, anatenda dhambi.