Yakobo 5

1Sikilizeni sasa, enyi matajiri: lieni na kuomboleza kwa sauti kuu kwa sababu ya mateso yanayokaribia kuwapata. 2Mali zenu zimeoza, na nguo zenu zimeliwa na nondo. 3Dhahabu yenu na fedha yenu zimeingia kutu, na kutu hiyo itakuwa ushahidi dhidi yenu na itakula miili yenu. Mlichojilimbikizia katika siku za mwisho ni kama moto. 4Sikilizeni! Ujira wa vibarua waliovuna mashamba yenu, ambao mliuzuia, unalia, na vilio vya wavunaji vimefika masikioni mwa Bwana wa majeshi. 5Maisha yenu duniani yamekuwa ya anasa na ya kujifurahisha. Mmenenepesha mioyo yenu katika siku ya machinjo. 6Mmemhukumu na kumuua mwenye haki. Je, yeye hawapingi ninyi? 7Basi, ndugu, ngojeni kwa subira mpaka Bwana atakapokuja. Mfikirieni mkulima: anangoja ardhi itoe mazao yake ya thamani, naye huyangoja kwa subira mpaka mvua za mwanzo na za mwisho zinyeshe. 8Ninyi pia mnapaswa kuwa na subira. Imarisheni mioyo yenu, kwa maana kuja kwa Bwana kumekaribia. 9Acheni kulalamikiana, ndugu, la sivyo ninyi wenyewe mtahukumiwa. Tazameni, Hakimu amekwisha kusimama mlangoni. 10Ndugu, watazameni manabii waliosema kwa jina la Bwana, na kuwafanya kuwa mfano wenu: walipatwa na mateso, wakawa na subira. 11Kwa kweli tunawaita heri wale waliostahimili. Mmesikia habari za ustahimilivu wa Ayubu, na mmeuona mwisho ambao Bwana alimpa, kwa maana Bwana ni mwingi wa huruma na rehema.

12Zaidi ya yote, ndugu zangu, msiape viapo, iwe kwa mbingu au kwa dunia au kwa kitu kingine chochote. Mkisema ndiyo, iwe ndiyo tu, na mkisema hapana, iwe hapana tu, ili msianguke chini ya hukumu.

13Je, kuna yeyote miongoni mwenu anayepitia taabu? Na aombe. Je, kuna aliye na moyo mchangamfu? Na aimbe nyimbo za sifa. 14Je, kuna yeyote miongoni mwenu aliye mgonjwa? Awaite wazee wa kanisa, nao wamwombee na kumpaka mafuta katika jina la Bwana. 15Maombi yaliyofanywa kwa imani yatamwokoa mgonjwa, na Bwana atamwinua. Na kama ametenda dhambi, atasamehewa. 16Kwa hiyo jengeni desturi ya kuungamiana dhambi na kuombeana, ili mponywe. Mtu mwenye haki anapoomba, ombi lake linafanya kazi, nalo linaweza kutimiza mambo mengi. 17Eliya alikuwa mwanadamu kama sisi. Aliomba kwa bidii mvua isinyeshe, na mvua haikunyesha katika nchi kwa miaka mitatu na miezi sita. 18Kisha akaomba tena, na anga likatoa mvua, nayo nchi ikazaa mazao yake.

19Ndugu zangu, ikiwa mmoja wenu atapotoka na kuiacha kweli, na mtu mwingine akamrudisha, 20yule aliyefanya hivyo ajue jambo hili: mtu anayemrudisha mwenye dhambi kutoka katika njia yake potovu ataiokoa nafsi ya mwenye dhambi huyo kutoka mautini, na atafunika dhambi nyingi sana.