Filemoni 1

1Kutoka kwa Paulo, mfungwa kwa ajili ya Kristo Yesu, na kutoka kwa Timotheo ndugu yetu, kwa Filemoni, rafiki yetu mpendwa na mtenda kazi mwenzetu, 2kwa Afia dada yetu, kwa Arkipo mwanajeshi mwenzetu, na kwa kanisa linalokutana nyumbani kwako. 3Neema na amani ziwe nanyi kutoka kwa Mungu Baba yetu na kwa Bwana Yesu Kristo.

4Kila ninapokukumbuka katika maombi yangu, ninamshukuru Mungu wangu siku zote, 5kwa sababu ninaendelea kusikia habari za upendo wako kwa watu wote watakatifu wa Mungu na imani yako katika Bwana Yesu. 6Ninaomba kwamba ukarimu unaotokana na imani yako ufanye kazi kikamilifu, unapoendelea kujua kwa ukamilifu mema yote tuliyo nayo, kwa ajili ya Kristo. 7Ndugu, upendo wako umenijaza furaha na kunitia moyo, kwa sababu kupitia wewe mioyo ya watu watakatifu wa Mungu imeburudika.

8Kwa hiyo, ingawa katika Kristo ningeweza kuwa na ujasiri wa kukuamuru ufanye yanayokupasa, 9ninapendelea kukuomba kwa msingi wa upendo. Mimi Paulo, mzee, na sasa pia mfungwa kwa ajili ya Kristo Yesu, 10ninakuomba kwa ajili ya Onesimo, aliyekuwa mwanangu nilipokuwa minyororoni. 11Zamani hakuwa na manufaa kwako, lakini sasa ana manufaa kwako na kwangu. 12Ninamrudisha kwako, naye ni moyo wangu wenyewe. 13Ningependa kumbakiza hapa pamoja nami, ili anihudumie badala yako wakati niko katika minyororo kwa ajili ya Injili. 14Lakini sikutaka kufanya lolote bila idhini yako, ili wema wowote utakaofanya utokane na uamuzi wako mwenyewe, wala usiwe wa kulazimishwa. 15Huenda hii ndiyo sababu alitenganishwa nawe kwa kitambo kidogo: ili umpate tena kwa kudumu, 16si kama mtumwa tena, bali kama mtu aliye zaidi ya mtumwa, ndugu mpendwa. Yeye ni mpendwa sana kwangu, na zaidi kiasi gani kwako, katika maisha ya kila siku na katika Bwana.

17Basi, ikiwa unaniona kuwa mshirika wako, mkaribishe kama vile ungenikaribisha mimi. 18Ikiwa amekukosea kwa namna yoyote, au unamdai chochote, kiweke katika hesabu yangu. 19Mimi Paulo ninaandika haya kwa mkono wangu mwenyewe: nitalipa. Sina haja ya kukukumbusha kwamba ninakudai hata nafsi yako mwenyewe. 20Ndiyo, ndugu, nipate manufaa haya kutoka kwako katika Bwana. Upe moyo wangu raha katika Kristo. 21Ninakuandikia nikiwa na hakika kwamba utafanya ninachokuomba, na ninajua kwamba utafanya hata zaidi ya ninavyosema. 22Wakati huo huo, uniandalie chumba pia, kwa sababu natumaini kwamba Mungu atajibu maombi yenu na kunirudisha kwenu.

23Epafra, mfungwa mwenzangu katika Kristo Yesu, anakusalimu, 24na vilevile watenda kazi wenzangu Marko, Aristarko, Dema na Luka.

25Neema ya Bwana Yesu Kristo iwe pamoja na roho zenu.