Tito 3

1Uwakumbushe watu wajinyenyekeze kwa watawala na wenye mamlaka, wawe watiifu, wawe tayari kutenda kila jambo jema, 2wasimseme mtu yeyote vibaya, waepuke ugomvi, wawe wapole na wawe na adabu kwa kila mtu. 3Kwa maana wakati fulani sisi pia tulikuwa wapumbavu, wakaidi na waliopotoshwa, watumwa wa kila aina ya tamaa na starehe. Tuliishi katika ubaya na wivu, tukichukiwa na wengine na kuchukiana sisi kwa sisi. 4Lakini wema na upendo wa Mungu Mwokozi wetu ulipodhihirishwa, 5alituokoa, si kwa sababu ya mambo ya haki tuliyotenda, bali kwa sababu ya rehema zake. Alituokoa kupitia kuoshwa kunakoleta kuzaliwa upya na kufanywa wapya na Roho Mtakatifu, 6ambaye alimmimina juu yetu kwa ukarimu kupitia Yesu Kristo Mwokozi wetu, 7ili, tukiwa tumehesabiwa haki kwa neema yake, tuwe warithi wenye tumaini la uzima wa milele.

8Msemo huu ni wa kuaminika. Nataka usisitize mambo haya, ili wale waliomwamini Mungu wawe waangalifu kujitoa kutenda mema. Mambo haya ni bora na yanafaa kwa kila mtu. 9Lakini epuka mabishano ya kijinga, nasaba, ugomvi na mapigano kuhusu sheria, kwa sababu hayana faida wala maana. 10Mwonye mtu anayeleta mafarakano mara moja, kisha mara ya pili. Baada ya hapo usijihusishe naye tena. 11Unaweza kuwa na hakika kwamba mtu wa namna hiyo amepotoka, ni mwenye dhambi, na anajihukumu mwenyewe.

12Nitakapomtuma Artema au Tikiko kwako, fanya kila uwezalo uje kwangu Nikopoli, kwa sababu nimeamua kukaa huko kipindi cha baridi. 13Fanya kila uwezalo kuwasaidia Zena mtaalamu wa sheria na Apolo katika safari yao, na uhakikishe kwamba wana kila kitu wanachohitaji. 14Watu wetu pia wajifunze kujitoa kutenda mema, ili waweze kukidhi mahitaji ya dharura na wasiwe bila matunda.

15Wote walio hapa pamoja nami wanakutumia salamu. Wasalimie wanaotupenda katika imani. Neema iwe pamoja nanyi nyote.