Tito 2

1Lakini wewe yakupasa kufundisha yanayopatana na mafundisho mazima. 2Wafundishe wanaume wazee wawe na akili timamu, wanaostahili heshima na wenye kiasi, wakiwa wazima katika imani, katika upendo na katika uvumilivu.

3Vivyo hivyo, wafundishe wanawake wazee waishi kwa namna inayomheshimu Mungu. Wasiwe wachongezi wala watumwa wa divai nyingi, bali wafundishe yaliyo mema. 4Ndipo wataweza kuwazoeza wanawake vijana kuwapenda waume zao na watoto wao, 5kuwa na kiasi na usafi, kufanya kazi za nyumbani, kuwa wema, na kuwatii waume zao wenyewe, ili mtu yeyote asilinene vibaya neno la Mungu.

6Vivyo hivyo, wahimize vijana wa kiume wawe na kiasi. 7Katika kila jambo uwe kielelezo kwao kwa kutenda mema. Katika mafundisho yako onyesha uadilifu na umakini, 8na maneno mazima yasiyoweza kukosolewa, ili yeyote anayekupinga aone aibu, kwa sababu hana neno baya la kusema juu yetu.

9Wafundishe watumwa wawatii mabwana zao katika kila jambo, wajitahidi kuwapendeza, wasibishane nao 10wala wasiwaibie, bali waonyeshe kwamba wanaweza kuaminiwa kabisa, ili kwa kila namna wayafanye mafundisho kuhusu Mungu Mwokozi wetu yavutie.

11Kwa maana neema ya Mungu imeonekana, ikileta wokovu kwa watu wote. 12Inatufundisha kukataa maisha yasiyomcha Mungu na tamaa za ulimwengu, na kuishi maisha ya kiasi, ya haki na ya kumcha Mungu katika nyakati hizi za sasa, 13huku tukingojea tumaini la heri, yaani kuonekana kwa utukufu wa Mungu wetu mkuu na Mwokozi, Yesu Kristo. 14Yeye alijitoa kwa ajili yetu ili atuweke huru kutoka katika uovu wote, na ajitakasie watu walio wake, wenye hamu ya kutenda mema.

15Fundisha mambo haya. Himiza na ukemee kwa mamlaka kamili. Usimwache mtu yeyote akudharau.