Tito 1

1Kutoka kwa Paulo, mtumishi wa Mungu na mtume wa Yesu Kristo. Nilitumwa kuwaleta wateule wa Mungu kwenye imani na kwenye ujuzi wa kweli inayoongoza kwenye uchaji wa Mungu, 2imani na ujuzi ambavyo vinategemea tumaini la uzima wa milele. Mungu, ambaye hasemi uongo kamwe, aliahidi uzima huu kabla nyakati za milele hazijaanza, 3na kwa wakati uliofaa alilifanya neno lake lijulikane kupitia mahubiri niliyokabidhiwa kwa agizo la Mungu Mwokozi wetu. 4Kwa Tito, mwanangu halisi katika imani tunayoshiriki: neema na amani kutoka kwa Mungu Baba na Kristo Yesu Mwokozi wetu.

5Nilikuacha Krete ili uweke sawa mambo yaliyobaki bila kukamilika, na uwateue wazee katika kila mji, kama nilivyokuagiza. 6Mzee awe mtu asiye na lawama, mume wa mke mmoja, mwenye watoto wanaoamini, ambao hawawezi kushtakiwa kwa maisha ya ufisadi au kwa ukaidi. 7Kwa kuwa mwangalizi anasimamia nyumba ya Mungu, ni lazima awe bila lawama. Asiwe mwenye kiburi wala mwepesi wa hasira, asiwe mlevi wala mgomvi, asiwe na tamaa ya fedha. 8Awe mkarimu kwa wageni, apende yaliyo mema, awe na kiasi, mwenye haki, mtakatifu na mwenye kujitawala. 9Ashike kwa uthabiti ujumbe wa kuaminika kama ulivyofundishwa, ili aweze kuwatia moyo wengine kwa mafundisho mazima na kuwarekebisha wale wanaoyapinga.

10Kwa maana wapo watu wengi waasi, wenye maneno matupu na udanganyifu, hasa wale wa kundi la tohara. 11Ni lazima wanyamazishwe, kwa sababu wanaharibu familia nzima kwa kufundisha mambo wasiyopaswa kufundisha, na wanafanya hivyo kwa ajili ya faida isiyo halali. 12Mmoja wa manabii wao wenyewe amesema, “Wakrete ni waongo daima, hayawani waovu, walafi wazembe.” 13Alichosema ni kweli. Kwa hiyo uwakemee vikali, ili imani yao iwe nzima, 14wasijali tena ngano za Kiyahudi wala amri za watu wanaoikataa kweli. 15Kwa walio safi, kila kitu ni safi; lakini kwa watu walioharibika na wasioamini, hakuna kitu kilicho safi. Kwa kweli, nia zao na dhamiri zao zimechafuka. 16Wanadai kwamba wanamjua Mungu, lakini kwa wanayoyatenda wanamkana. Ni watu wa kuchukiza na wakaidi, wasiofaa kufanya jambo lolote jema.