Kumbukumbu la Torati 1

1Haya ndiyo maneno ambayo Musa aliwaambia Israeli wote nyikani ng’ambo ya Yordani: katika Araba, mkabala na Sufu, kati ya Parani na Tofeli, Labani, Haserothi na Di-zahabu. 2Ni safari ya siku kumi na moja kutoka Horebu hadi Kadesh-barnea kwa njia ya Mlima Seiri. 3Siku ya kwanza ya mwezi wa kumi na moja, katika mwaka wa arobaini, Musa alisema na Waisraeli, akawaambia yote ambayo BWANA alikuwa amemwagiza awape. 4Hii ilikuwa baada ya kuwashinda Sihoni mfalme wa Waamori, ambaye mji wake ulikuwa Heshboni, na Ogu mfalme wa Bashani, ambaye miji yake ilikuwa Ashtarothi na Edrei. 5Ng’ambo ya Yordani katika nchi ya Moabu, Musa alianza kuifafanua sheria hii. Alisema, 6“BWANA Mungu wetu alituambia huko Horebu, ‘Mmekaa katika mlima huu muda wa kutosha. 7Geukeni mwendelee na safari. Nendeni katika nchi ya milima ya Waamori na katika maeneo yote yaliyo jirani nayo: Araba, nchi ya milima, vilima vya chini, Negebu na pwani ya bahari, nchi ya Wakanaani, na Lebanoni, hadi mto mkubwa, Frati. 8Tazama, nimeiweka nchi mbele yenu. Ingieni mkaimiliki nchi ambayo BWANA aliapa kuwapa mababu zenu Abrahamu, Isaka na Yakobo, na wazao wao baada yao.’ 9Wakati ule niliwaambia, ‘Kuwabeba ninyi nyote peke yangu ni zaidi ya uwezo wangu. 10BWANA Mungu wenu ameiongeza hesabu yenu, na jitazameni leo: mko wengi kama nyota za angani. 11BWANA, Mungu wa mababu zenu, na awazidishe mara elfu kuliko mlivyo sasa, na awabariki kama alivyoahidi! 12Nitawezaje kubeba peke yangu shida zenu zote, mzigo mnaouweka juu yangu, na magomvi yenu? 13Chagueni kutoka katika makabila yenu watu wenye hekima, wenye busara na wanaoheshimika, nami nitawaweka wawe viongozi wenu.’ 14Nanyi mlinijibu, ‘Mpango wako ni mzuri; na utekelezwe.’ 15Basi niliwachukua watu mashuhuri wa makabila yenu, watu wenye hekima na wanaoheshimika, nikawaweka wawe viongozi wenu: makamanda wa maelfu, wa mamia, wa hamsini na wa kumi, na wasimamizi kwa kila kabila lenu. 16Wakati ule niliwapa waamuzi wenu agizo hili: ‘Sikilizeni mashauri kati ya ndugu zenu Waisraeli, mkahukumu kwa haki katika kila shauri, liwe kati ya Waisraeli wawili au kati ya Mwisraeli na mgeni anayeishi kati yenu. 17Mnapohukumu, msimpendelee mtu kwa sababu ya hali yake. Msikilizeni mnyonge na mwenye nguvu kwa namna ileile. Msimwogope mtu yeyote, kwa kuwa hukumu ni ya Mungu. Shauri likiwa gumu mno kwenu, mniletee mimi, nami nitalisikiliza.’ 18Wakati ule niliwapa maagizo kuhusu kila kitu mlichopaswa kufanya. 19Tuliondoka Horebu, tukapita katika nyika ile yote kubwa na ya kutisha mliyoiona, kwa njia ya kuelekea nchi ya milima ya Waamori, kama BWANA Mungu wetu alivyotuamuru, tukafika Kadesh-barnea. 20Niliwaambia, ‘Sasa mmefika kwenye nchi ya milima ya Waamori, nchi ambayo BWANA Mungu wetu anatupa. 21Tazama, BWANA Mungu wako ameiweka nchi hii mbele yako. Panda uimiliki, kama BWANA, Mungu wa mababu zako, alivyokuambia. Usiogope wala usikate tamaa.’ 22Kisha ninyi nyote mlinijia, mkasema, ‘Tutume watu watangulie mbele yetu wakaipeleleze nchi kwa ajili yetu. Watarudi kutuambia njia ya kupanda na miji tutakayoikuta.’ 23Niliukubali mpango huo, nikachagua watu kumi na wawili kati yenu, mmoja kutoka kila kabila. 24Waliondoka, wakapanda katika nchi ya milima, wakafika katika bonde la Eshkoli, wakaipeleleza. 25Walichukua baadhi ya matunda ya nchi, wakatuletea huku chini. Kisha wakatupa taarifa yao: ‘Nchi ambayo BWANA Mungu wetu anatupa ni nzuri.’ 26Lakini mlikataa kupanda, mkapinga agizo la BWANA Mungu wenu. 27Mlinung’unika ndani ya hema zenu, mkasema, ‘BWANA anatuchukia. Ndiyo sababu alitutoa Misri: ili atutie mikononi mwa Waamori watuangamize. 28Tutapanda kwenda wapi? Ndugu zetu wametukatisha tamaa. Wanasema, “Watu wale ni wakubwa na warefu kuliko sisi, miji yao ni mikubwa, na kuta zake zinafika mbinguni, tena tuliwaona huko wazao wa Waanaki.”’ 29Ndipo nikawaambia, ‘Msitetemeke; msiwaogope. 30BWANA Mungu wenu, anayewatangulia, ndiye atakayewapigania, kama mlivyomwona akiwatendea huko Misri, 31na katika nyika. Huko uliona jinsi BWANA Mungu wako alivyokubeba, kama baba ambebavyo mwanawe, njia yote mliyosafiri mpaka mkafika hapa.’ 32Hata hivyo, kwa haya yote hamkumtegemea BWANA Mungu wenu, 33aliyewatangulia njiani kuwatafutia mahali pa kupiga kambi, katika moto wakati wa usiku ili kuwaonyesha njia ya kufuata, na katika wingu wakati wa mchana. 34BWANA aliposikia mliyosema, alikasirika, akaapa kiapo: 35‘Kati ya watu hawa, kizazi hiki kiovu, hakuna hata mmoja atakayeiona nchi nzuri niliyoapa kwamba nitawapa mababu zenu, 36isipokuwa Kalebu mwana wa Yefune. Yeye ataiona, nami nitampa yeye na wazao wake nchi aliyoitembea, kwa sababu alimfuata BWANA kwa moyo wote.’ 37Kwa sababu yenu BWANA alinikasirikia mimi pia, akasema, ‘Wewe pia hutaingia humo. 38Yoshua mwana wa Nuni, msaidizi wako, ndiye atakayeingia. Mtie moyo, kwa sababu yeye ndiye atakayewaongoza Israeli kuirithi nchi. 39Na watoto wenu wadogo, ambao mlisema watachukuliwa nyara, na wana wenu, ambao leo bado hawawezi kutofautisha mema na mabaya, wao ndio watakaoingia. Nitawapa wao nchi hiyo, nao wataimiliki. 40Lakini ninyi, geukeni, mwondoke kwenda nyikani kwa njia ya Bahari ya Shamu.’ 41Kisha mlinijibu, ‘Tumemtenda dhambi BWANA. Tutapanda tukapigane, kama BWANA Mungu wetu alivyotuamuru.’ Basi kila mmoja wenu akajifunga silaha zake, mkidhani kwamba ni rahisi kupanda katika nchi ya milima. 42Lakini BWANA aliniambia, ‘Waambie, “Msipande, wala msipigane. Siko pamoja nanyi, na mkienda, adui zenu watawapiga.”’ 43Niliwaonya, lakini hamkujali. Mlipinga agizo la BWANA, na kwa kiburi chenu mkapanda katika nchi ya milima. 44Waamori waliokaa katika nchi ile ya milima walitoka kupigana nanyi, wakawafukuza kama kundi la nyuki. Wakawaangamiza huko Seiri, mpaka Horma. 45Kisha mlirudi, mkalia mbele za BWANA, lakini BWANA hakukubali kusikia kilio chenu wala kuwajali. 46Basi mlikaa Kadeshi kwa muda mrefu, muda wote mliokaa huko.