Kumbukumbu la Torati 6

1Hii ndiyo amri, kanuni na maagizo ambayo BWANA Mungu wenu aliniamuru niwafundishe, ili mzishike katika nchi mnayovuka kwenda kuimiliki, 2ili umche BWANA Mungu wako na kuzishika kanuni zake zote na amri zake ninazokupa, wewe, watoto wako na wajukuu wako, siku zote za maisha yako, na ili uishi siku nyingi. 3Basi sikiliza, Israeli, uyashike kwa uangalifu. Ndipo mambo yatakuendea vema, nanyi mtakuwa wengi sana katika nchi itiririkayo maziwa na asali, kama BWANA, Mungu wa baba zako, alivyokuahidi.

4Sikia, Israeli: BWANA Mungu wetu, BWANA ni mmoja. 5Mpende BWANA Mungu wako kwa moyo wako wote, kwa nafsi yako yote, na kwa nguvu zako zote. 6Yaweke karibu na moyo wako maneno haya ninayokuamuru leo. 7Wafundishe watoto wako kwa bidii, na uyazungumze ukiwa umeketi nyumbani au ukiwa safarini, wakati wa kulala na wakati wa kuamka. 8Yafunge mkononi mwako kama ishara, na yawe utepe kati ya macho yako. 9Yaandike kwenye miimo ya milango ya nyumba yako na kwenye malango ya mji wako.

10BWANA Mungu wako anakuingiza katika nchi aliyowaapia baba zako, Abrahamu, Isaka na Yakobo, kwamba atakupa. Ina miji mikubwa na mizuri ambayo hukuijenga, 11nyumba zilizojaa kila aina ya vitu vizuri ambavyo hukuviweka, visima vilivyochongwa mwambani ambavyo hukuvichonga, mashamba ya mizabibu na ya mizeituni ambayo hukuyapanda. Utakapokuwa umekula na kushiba, 12basi jilinde, usije ukamsahau BWANA, aliyekutoa katika nchi ya Misri, katika nyumba ya utumwa. 13Umche BWANA Mungu wako, wala si mwingine; umtumikie yeye, na uape kwa jina lake. 14Msiifuate miungu mingine, yoyote kati ya miungu ya watu wanaowazunguka. 15Kwa maana BWANA Mungu wako, aliye katikati yako, ni Mungu mwenye wivu; jihadhari, la sivyo hasira ya BWANA Mungu wako itawaka dhidi yako, naye atakufutilia mbali kutoka uso wa dunia.

16Msimjaribu BWANA Mungu wenu, kama mlivyomjaribu huko Masa. 17Kuweni waangalifu kuzishika amri za BWANA Mungu wenu, masharti yake na kanuni zake, alizokuamuru. 18Fanya yale ambayo BWANA anayaona kuwa sawa na mema, ili mambo yakuendee vema, nawe uweze kuingia na kuimiliki nchi nzuri ambayo BWANA aliwaapia baba zako, 19kwa kuwafukuza adui zako wote mbele yako, kama BWANA alivyoahidi.

20Siku moja mwanao atakuuliza, ‘Masharti haya, kanuni na maagizo ambayo BWANA Mungu wetu amewaamuru yana maana gani?’ 21Ndipo umwambie mwanao, ‘Huko Misri tulikuwa watumwa wa Farao, lakini BWANA alitutoa Misri kwa mkono wake wenye nguvu. 22Tuliona kwa macho yetu wenyewe: BWANA alileta ishara na maajabu makubwa na yenye maangamizi juu ya Misri, juu ya Farao na juu ya nyumba yake yote. 23Lakini sisi alitutoa huko ili atuingize na kutupa nchi aliyowaapia baba zetu. 24BWANA alituamuru tuzishike kanuni hizi zote na kumcha BWANA Mungu wetu, kwa faida yetu daima, ili atuhifadhi hai, kama tulivyo leo. 25Hiyo itakuwa haki yetu, tukiwa waangalifu kuishika amri hii yote mbele ya BWANA Mungu wetu, kama alivyotuamuru.’