Kumbukumbu la Torati 5

1Musa aliwaita Israeli wote, akawaambia, “Sikia, Israeli, kanuni na maagizo ninayowatangazia leo. Jifunzeni hayo, na mwe waangalifu kuyatenda. 2BWANA Mungu wetu alifanya agano pamoja nasi huko Horebu. 3BWANA hakufanya agano hili na baba zetu; alilifanya nasi, sisi tulio hapa leo, sisi sote ambao bado tu hai. 4Huko mlimani BWANA alisema nanyi uso kwa uso, kutoka katika moto. 5Wakati huo nilikuwa nimesimama kati ya BWANA na ninyi, ili niwajulishe neno la BWANA, kwa kuwa mliuogopa moto na hamkutaka kupanda mlimani. Alisema:

6‘Mimi ni BWANA Mungu wako. Nilikuleta nje ya nchi ya Misri, kutoka nyumba ulimotumikishwa kama mtumwa. 7Hutakuwa na mungu mwingine yeyote kando yangu. 8Hutajitengenezea sanamu iliyochongwa yenye umbo la kitu chochote kilichoko mbinguni juu, katika ardhi chini, au ndani ya maji yaliyo chini ya ardhi. 9Hutaviinamia wala kuvitumikia. Kwa maana ndimi BWANA Mungu wako, Mungu mwenye wivu. Ninaleta hatia ya baba juu ya watoto wao, juu ya vizazi vya tatu na vya nne vya wale wanaonichukia, 10lakini maelfu ya wale wanaonipenda na kutii amri zangu ninawaonyesha upendo wa uaminifu.

11Hutalitumia jina la BWANA Mungu wako kwa uongo au kwa mambo yasiyo na maana, kwa maana BWANA hatamwachilia mtu yeyote anayelitumia jina lake hivyo bila kumwadhibu.

12Ishike siku ya Sabato na uitenge iwe takatifu, kama BWANA Mungu wako alivyokuamuru. 13Una siku sita za kufanya kazi na kumaliza shughuli zako zote, 14lakini siku ya saba ni Sabato kwa ajili ya BWANA Mungu wako. Siku hiyo usifanye kazi yoyote, iwe wewe, mwanao au binti yako, mtumishi wako wa kiume au wa kike, ng’ombe wako, punda wako au mifugo yako yoyote, au mgeni anayeishi nawe katika miji yako, ili mtumishi wako wa kiume na wa kike wapumzike kama wewe. 15Kumbuka kwamba ulikuwa mtumwa katika nchi ya Misri, na kwamba BWANA Mungu wako alikuleta nje kutoka huko kwa mkono hodari na kwa mkono ulionyooshwa. Kwa sababu hiyo BWANA Mungu wako amekuamuru uiadhimishe siku ya Sabato. 16Waheshimu baba yako na mama yako, kama BWANA Mungu wako alivyokuamuru. Ndipo utaishi muda mrefu, na mambo yatakuendea vema katika nchi ambayo BWANA Mungu wako atakupa.

17Usiue. 18Usizini. 19Usiibe. 20Usitoe ushahidi usio na msingi dhidi ya jirani yako.

21Usimtamani mke wa jirani yako. Usiwe na uchu wa nyumba ya jirani yako, shamba lake, mtumishi wake wa kiume au wa kike, ng’ombe wake au punda wake, wala kitu kingine chochote ambacho ni mali ya jirani yako.’

22BWANA aliyasema maneno haya kwa kusanyiko lenu lote pale mlimani, kwa sauti kuu kutoka katika moto, wingu na giza zito, wala hakusema zaidi. Aliyaandika juu ya vibao viwili vya mawe, akanipa. 23Mlipoisikia sauti ikitoka katika giza, mlima ulipokuwa ukiwaka moto, wakuu wote wa makabila yenu na wazee wenu walinikaribia, 24nanyi mkasema, ‘BWANA Mungu wetu ametuonyesha utukufu wake na ukuu wake, nasi tumeisikia sauti yake kutoka katika moto. Leo tumeona kwamba Mungu anaweza kusema na mtu, na mtu huyo akabaki hai. 25Basi kwa nini tufe sasa? Moto huu mkubwa utatula. Tukiendelea kuisikia sauti ya BWANA Mungu wetu, tutakufa. 26Katika wanadamu wote, ni nani aliyesikia kama sisi sauti ya Mungu aliye hai ikisema kutoka katika moto, akabaki hai? 27Wewe nenda karibu usikie yote anayosema BWANA Mungu wetu, kisha utuambie yote ambayo BWANA Mungu wetu anakuambia; nasi tutasikiliza na kuyatenda.’ 28BWANA aliyasikia maneno yenu mliponiambia, kisha BWANA akaniambia, ‘Nimeyasikia maneno ambayo watu hawa wamekuambia. Wamesema vema katika yote waliyosema. 29Laiti mioyo yao ingedumu hivi, ili waniche na kuzishika amri zangu zote daima, na mambo yawaendee vema wao na watoto wao milele! 30Nenda ukawaambie, “Rudini kwenye hema zenu.” 31Lakini wewe, kaa hapa pamoja nami, nami nitakuambia amri yote, kanuni na maagizo utakayowafundisha, ili wayatende katika nchi ninayowapa waimiliki.’ 32Basi, mwe waangalifu kutenda sawasawa na BWANA Mungu wenu alivyowaamuru, bila kugeuka kulia wala kushoto. 33Enendeni katika njia yote ambayo BWANA Mungu wenu amewaamuru. Ndipo mtaishi, mambo yatawaendea vema, na siku zenu zitakuwa nyingi katika nchi mtakayoimiliki.