Kumbukumbu la Torati 2

1Basi tukarudi nyuma, tukaelekea nyikani kwa njia ya Bahari ya Shamu, kama BWANA alivyoniambia, na kwa muda mrefu tukaizunguka nchi ya milima ya Seiri.

2Kisha BWANA akaniambia, 3‘Mmeizunguka nchi hii ya milima kwa muda wa kutosha. Sasa geukeni mwelekee kaskazini. 4Uwape watu agizo hili: “Mtapita katika nchi ya ndugu zenu, wazao wa Esau, wanaoishi Seiri. Watawaogopa, nanyi mjihadhari sana. 5Msianzishe ugomvi nao, kwa sababu sitawapa sehemu yoyote ya nchi yao, hata nafasi ya kuweka mguu. Nimempa Esau nchi ya milima ya Seiri iwe milki yake. 6Mtanunua chakula kwao kwa fedha ili mle, na pia mtawalipa fedha kwa maji ya kunywa. 7BWANA Mungu wako amebariki kazi zote za mikono yako. Amekutunza ulipokuwa ukipita katika nyika hii kubwa. BWANA Mungu wako amekuwa pamoja nawe miaka hii arobaini, wala hujapungukiwa na kitu chochote.”’ 8Basi tukaendelea mbele, tukawapita ndugu zetu, wazao wa Esau wanaoishi Seiri, tukaiacha njia ya Araba inayopanda kutoka Elathi na Esion-geberi. Kisha tukageuka, tukashika njia ya nyika ya Moabu. 9Kisha BWANA akaniambia, ‘Usimfanye Moabu kuwa adui wako wala usianzishe vita nao. Sitakupa sehemu yoyote ya nchi yao iwe milki yako, kwa sababu nimewapa wazao wa Lutu Ari iwe yao.’ 10(Zamani Waemi waliishi huko, taifa kubwa, lenye watu wengi na warefu kama Waanaki. 11Walihesabiwa kuwa Warefai, kama Waanaki walivyohesabiwa, ingawa Wamoabu huwaita Waemi. 12Seiri nayo zamani ilikuwa nchi ya Wahori. Wazao wa Esau wakaichukua kutoka kwao, wakiwaangamiza walipokuwa wakisonga mbele, nao wakakaa mahali pao, kama vile Israeli alivyofanya katika nchi ambayo BWANA alimpa iwe milki yake.) 13‘Ondokeni sasa mvuke Bonde la Zeredi.’ Basi tukavuka Bonde la Zeredi. 14Tangu tulipoondoka Kadesh-barnea hadi tulipovuka Bonde la Zeredi ilikuwa miaka thelathini na minane. Huo ndio muda uliohitajika ili kizazi chote cha wanaume wa vita kitoweke kambini, kama BWANA alivyokuwa amewaapia. 15Naam, mkono wa BWANA ulikuwa dhidi yao, ukiwaondoa kambini hadi hakuna hata mmoja wao aliyebaki. 16Wanaume wote wa vita walipokwisha kufa na kutoweka katikati ya watu,

17BWANA akaniambia, 18‘Leo utavuka mpaka wa Moabu huko Ari. 19Utakapowakaribia Waamoni, usiwafanye kuwa adui wala usianzishe ugomvi nao, kwa maana sitakupa sehemu yoyote ya nchi ya Waamoni iwe milki yako. Nimewapa wazao wa Lutu iwe yao.’ 20(Nchi hiyo nayo ilihesabiwa kuwa nchi ya Warefai. Warefai waliishi humo zamani, ingawa Waamoni huwaita Wazamzumi, 21taifa kubwa, lenye watu wengi na warefu kama Waanaki. BWANA aliwaangamiza ili kuwapisha Waamoni, ambao waliichukua nchi yao, wakakaa mahali pao, 22kama vile alivyokuwa amewafanyia wazao wa Esau wanaoishi Seiri, alipowaangamiza Wahori mbele yao, nao wakaichukua nchi ya Wahori na wanaishi humo mpaka leo. 23Waavi, walioishi katika vijiji hadi Gaza, waliangamizwa na Wakaftori, waliotoka Kaftori wakakaa mahali pao.) 24‘Ondokeni, anzeni safari, mvuke Bonde la Arnoni. Tazama, nimemtia Sihoni Mwamori, mfalme wa Heshboni, mikononi mwako, pamoja na nchi yake. Anza kuimiliki nchi yake, upigane naye vita. 25Kuanzia leo nitayafanya mataifa yote chini ya mbingu yakuogope na kukuhofu. Yatakaposikia habari zako, yatatetemeka na kugaagaa kwa hofu kwa sababu yako.’ 26Kisha nikatuma wajumbe kutoka nyika ya Kedemothi kwa Sihoni mfalme wa Heshboni, wakiwa na ujumbe wa amani: 27‘Niruhusu nipite katika nchi yako. Nitashika barabara tu, wala sitageuka kulia au kushoto. 28Niuzie chakula kwa fedha ili nile, na unipe maji kwa fedha ili ninywe. Niache tu nipite kwa miguu, 29kama walivyonifanyia wazao wa Esau wanaoishi Seiri na Wamoabu wanaoishi Ari, mpaka nivuke Yordani niingie katika nchi ambayo BWANA Mungu wetu anatupa.’ 30Lakini Sihoni mfalme wa Heshboni alikataa kuturuhusu tupite katika nchi yake, kwa sababu BWANA Mungu wako alikuwa ameifanya roho yake kuwa ngumu na moyo wake kuwa mkaidi, ili amtie mikononi mwako, kama unavyoona leo.

31Kisha BWANA akaniambia, ‘Tazama, nimeanza kumtia Sihoni na nchi yake mikononi mwako. Anza sasa kuimiliki, ili nchi yake iwe yako.’ 32Sihoni akatoka pamoja na jeshi lake lote ili kupigana nasi huko Yahasi. 33BWANA Mungu wetu akamtia mikononi mwetu, nasi tukamshinda yeye, wanawe na jeshi lake lote. 34Wakati huo tuliiteka miji yake yote, tukaiweka yote wakfu kwa maangamizi, pamoja na wanaume, wanawake na watoto wake. Hatukumwacha hata mtu mmoja hai. 35Tulichukua tu mifugo kuwa nyara zetu, pamoja na mateka kutoka katika miji tuliyokuwa tumeiteka. 36Kutoka Aroeri, ulio ukingoni mwa Bonde la Arnoni, na mji ulio bondeni, hadi Gileadi, hakuna mji uliokuwa juu mno tusiweze kuuteka. BWANA Mungu wetu alitupa yote. 37Lakini hukuikaribia nchi ya Waamoni, eneo lote kando ya Mto Yaboki na miji iliyo katika nchi ya milima, kama BWANA Mungu wetu alivyokuwa ameamuru.