Kumbukumbu la Torati 9

1Sikia, Israeli: leo unakaribia kuvuka Yordani, uingie kuyafukuza mataifa makubwa na yenye nguvu kuliko wewe, yenye miji mikubwa iliyozungushiwa ngome hadi angani, 2watu hodari na warefu, Waanaki. Unawajua, na umesikia watu wakisema, ‘Ni nani awezaye kusimama mbele ya wazao wa Anaki?’ 3Basi ujue leo kwamba BWANA Mungu wako ndiye anayevuka mbele yako kama moto unaoteketeza. Yeye atawaangamiza na kuwashinda mbele yako, nawe utawafukuza na kuwamaliza upesi, kama BWANA alivyokuahidi. 4BWANA Mungu wako atakapokuwa amewasukuma kutoka njiani mwako, usijiambie, ‘Ni kwa sababu mimi ni mwadilifu ndiyo maana BWANA ameniingiza niimiliki nchi hii.’ Hapana, ni kwa sababu ya uovu wa mataifa haya ndiyo maana BWANA anayafukuza mbele yako. 5Si kwa sababu wewe ni mwadilifu wala kwa sababu moyo wako ni mnyoofu ndiyo maana unaingia kuimiliki nchi yao. Ni kwa sababu ya uovu wa mataifa haya ndiyo maana BWANA Mungu wako anayafukuza mbele yako, na ili kutimiza ahadi ambayo BWANA aliwaapia mababu zako, Abrahamu, Isaka na Yakobo. 6Basi elewa kwamba si kwa sababu wewe ni mwadilifu ndiyo maana BWANA Mungu wako anakupa nchi hii nzuri uimiliki, kwa maana wewe ni watu wenye shingo ngumu. 7Kumbuka jambo hili wala usilisahau kamwe: jinsi ulivyomkasirisha BWANA Mungu wako nyikani. Tangu siku ulipotoka nchi ya Misri mpaka mlipofika hapa, mmekuwa mkimwasi BWANA bila kukoma. 8Hata huko Horebu mlimkasirisha BWANA, naye BWANA akawakasirikia kiasi cha kuwa tayari kuwaangamiza. 9Nilipopanda mlimani kupokea vibao vya mawe, vibao vya agano ambalo BWANA alifanya nanyi, nilikaa mlimani siku arobaini mchana na usiku bila kula chakula wala kunywa maji. 10BWANA alinipa vibao viwili vya mawe vilivyoandikwa kwa kidole cha Mungu. Juu yake yalikuwa maneno yote ambayo BWANA aliwaambia mlimani kutoka katika moto, siku ya kusanyiko. 11Mwishoni mwa zile siku arobaini mchana na usiku, BWANA alinipa vibao viwili vya mawe, vibao vya agano. 12Kisha BWANA akaniambia, ‘Inuka ushuke kutoka hapa mara moja, kwa sababu watu wako uliowatoa Misri wamepotoka. Wamekuwa wepesi kuiacha njia niliyowaamuru; wamejitengenezea sanamu ya chuma kilichoyeyushwa.’ 13BWANA akaniambia pia, ‘Nimewaona watu hawa, nao kweli ni watu wenye shingo ngumu. 14Niache, ili niwaangamize na kulifuta jina lao chini ya mbingu. Kisha nitakufanya wewe kuwa taifa lenye nguvu zaidi na kubwa kuliko wao.’ 15Basi nikageuka, nikashuka kutoka mlimani ulipokuwa ukiwaka moto, nikiwa na vibao viwili vya agano mikononi mwangu. 16Nilitazama, nikaona kwamba mlikuwa mmemtenda dhambi BWANA Mungu wenu. Mlikuwa mmejitengenezea ndama wa chuma kilichoyeyushwa. Mlikuwa wepesi kuiacha njia ambayo BWANA aliwaamuru. 17Basi nikavikamata vibao viwili, nikavitupa chini kutoka mikononi mwangu, nikavivunjavunja mbele ya macho yenu. 18Kisha nililala kifudifudi mbele za BWANA kama nilivyofanya mara ya kwanza, siku arobaini mchana na usiku, bila kula chakula wala kunywa maji, kwa sababu ya dhambi yote mliyoitenda kwa kufanya yaliyo maovu machoni pa BWANA na kumkasirisha. 19Niliiogopa sana hasira na ghadhabu ya BWANA juu yenu, iliyotosha kuwaangamiza. Lakini BWANA alinisikiliza wakati ule pia. 20BWANA alimkasirikia Haruni kiasi cha kutaka kumwangamiza, nami wakati ule nikamwombea Haruni pia. 21Kisha nikakichukua kitu kile cha dhambi mlichokuwa mmekifanya, yule ndama, nikamchoma motoni. Nikamponda na kumsaga kabisa mpaka akawa laini kama vumbi, nikalitupa vumbi hilo katika kijito kinachotiririka kutoka mlimani. 22Huko Tabera, huko Masa na huko Kibroth-hataava mlimkasirisha BWANA pia. 23Na BWANA alipowatuma kutoka Kadesh-barnea, akisema, ‘Pandeni mkaimiliki nchi niliyowapa,’ mkapinga agizo la BWANA Mungu wenu. Hamkumtumaini wala hamkumtii. 24Mmekuwa mkimwasi BWANA tangu siku nilipowajua mara ya kwanza. 25Basi nililala kifudifudi mbele za BWANA zile siku arobaini mchana na usiku, kwa sababu BWANA alikuwa amesema kwamba atawaangamiza. 26Nilimwomba BWANA, nikasema, ‘Bwana MUNGU, usiwaangamize watu wako, urithi wako mwenyewe, uliowakomboa kwa uweza wako mkuu na kuwatoa Misri kwa mkono wenye nguvu. 27Uwakumbuke watumishi wako Abrahamu, Isaka na Yakobo. Usiutazame ukaidi wa watu hawa, wala uovu wao na dhambi yao, 28La sivyo, watu wa nchi ile uliyotutoa watasema, “Kwa kuwa BWANA hakuweza kuwaingiza katika nchi aliyowaahidi, na kwa kuwa aliwachukia, aliwatoa ili awaue nyikani.” 29Lakini wao ni watu wako, urithi wako, uliowatoa kwa uweza wako mkuu na mkono wako ulionyooshwa.’