Kumbukumbu la Torati 8

1Angalieni kutekeleza kila amri ninayokupa leo, ili mpate kuishi na kuongezeka, na kuingia na kuimiliki nchi ambayo BWANA aliwaahidi mababu zenu kwa kiapo. 2Kumbuka safari yote ambayo BWANA Mungu wako alikuongoza miaka hii arobaini nyikani. Alifanya hivyo ili akunyenyekeze na kukujaribu, ajue yaliyokuwa moyoni mwako: je, ungezishika amri zake au la? 3Alikushusha chini na kukuacha uone njaa, kisha akakulisha mana, chakula ambacho wewe wala mababu zako hamkuwahi kukijua. Alifanya hivyo ili akufundishe kwamba watu hawaishi kwa mkate peke yake, bali wanaishi kwa kila kitu kinachotoka kinywani mwa BWANA. 4Nguo ulizovaa hazikuchakaa, wala miguu yako haikuvimba, miaka hii yote arobaini. 5Basi tambua moyoni mwako kwamba BWANA Mungu wako anakuadibu kama baba amwadibuvyo mwanawe. 6Shika amri za BWANA Mungu wako, ukiishi kwa kufuata njia zake na kumcha kwa heshima. 7Kwa maana BWANA Mungu wako anakuingiza katika nchi nzuri, nchi yenye vijito vinavyotiririka, yenye chemchemi na maji ya chini ya ardhi yanayobubujika katika mabonde na vilima, 8nchi ya ngano na shayiri, ya mizabibu, mitini na mikomamanga, nchi ya mafuta ya zeituni na asali, 9nchi ambayo utakula chakula bila upungufu wala kukosa kitu, nchi ambayo miamba yake ina chuma na kutoka vilima vyake unaweza kuchimba shaba. 10Ukisha kula na kushiba, utamhimidi BWANA Mungu wako kwa ajili ya nchi nzuri aliyokupa. 11Jihadhari usimsahau BWANA Mungu wako kwa kupuuza amri zake, maagizo yake na kanuni zake ninazokupa leo, 12la sivyo, utakapokuwa umekula na kushiba, na kujenga nyumba nzuri na kuishi ndani yake, 13na makundi yako ya ng’ombe na kondoo yatakapoongezeka, na fedha na dhahabu yako ikaongezeka, na kila kitu ulicho nacho kikazidi, 14moyo wako unaweza kujivuna, ukamsahau BWANA Mungu wako, aliyekutoa katika nchi ya Misri, katika nyumba ya utumwa, 15aliyekuongoza katika nyika ile pana na ya kuogofya, nchi ya nyoka wa moto na nge, ya ardhi kame isiyo na maji, aliyekutolea maji kutoka katika mwamba mgumu wa gumegume, 16aliyekulisha mana nyikani, chakula ambacho mababu zako hawakukijua, ili akunyenyekeze na kukujaribu, na mwishowe akutendee mema, 17ukajisemea, ‘Uwezo wangu mwenyewe na nguvu za mikono yangu mwenyewe ndivyo vilivyonipatia mali hii.’ 18Badala yake mkumbuke BWANA Mungu wako. Ni yeye anayekupa uwezo wa kupata mali, ili alitimize agano alilowaapia mababu zako, kama anavyofanya leo.

19Ukija kumsahau BWANA Mungu wako na kuifuata miungu mingine, ukiitumikia na kuisujudia, ninawatangazia leo, nikiwa shahidi, kwamba hakika mtaangamia. 20Kama mataifa ambayo BWANA anayaangamiza mbele yenu, ndivyo nanyi mtakavyoangamia, kwa sababu hamkumtii BWANA Mungu wenu.