Kumbukumbu la Torati 3

1Kisha tuligeuka tukapanda kwa njia iendayo Bashani, na Ogu mfalme wa Bashani akatoka kupigana nasi pamoja na jeshi lake lote huko Edrei. 2BWANA aliniambia, ‘Usimwogope, kwa maana nimemtia mikononi mwako pamoja na jeshi lake lote na nchi yake. Umtendee kama ulivyomtendea Sihoni mfalme wa Waamori, aliyetawala Heshboni.’ 3Hivyo BWANA Mungu wetu akamtia pia Ogu mfalme wa Bashani mikononi mwetu, pamoja na jeshi lake lote, nasi tukampiga hadi hakubakiwa na mtu hata mmoja aliyenusurika. 4Wakati huo tuliteka miji yake yote. Hapakuwa na mji hata mmoja ambao hatukuwanyang’anya: miji sitini, eneo lote la Argobu, ufalme wa Ogu huko Bashani. 5Miji hiyo yote ilikuwa imejengewa ngome za kuta ndefu na malango ya milango miwili yenye makomeo, na zaidi ya hiyo kulikuwa na vijiji vingi sana visivyo na kuta. 6Tuliwaweka wakfu kwa maangamizi, kama tulivyomtendea Sihoni mfalme wa Heshboni; tuliweka wakfu kwa maangamizi kila mji, wanaume, wanawake na watoto. 7Hata hivyo, mifugo na mali tuliyoichukua katika miji tulijiwekea kuwa nyara. 8Hivyo wakati huo tuliitwaa nchi ya wafalme wawili wa Waamori ng’ambo ya Yordani, kutoka Bonde la Arnoni hadi Mlima Hermoni. 9(Wasidoni huuita Hermoni Sirioni, nao Waamori huuita Seniri.) 10Tuliteka miji yote ya uwanda wa juu, Gileadi yote na Bashani yote, hadi Saleka na Edrei, miji iliyokuwa ya ufalme wa Ogu huko Bashani. 11(Ogu mfalme wa Bashani ndiye pekee aliyebaki katika mabaki ya Warefai. Kitanda chake kilikuwa cha chuma, na bado kinaweza kuonekana huko Raba ya Waamoni. Urefu wake ni karibu mita 4 na upana wake mita 1.80.) 12Tulipoimiliki nchi hii wakati ule, niliwapa Wareubeni na Wagadi eneo linaloanzia Aroeri kando ya Bonde la Arnoni, pamoja na nusu ya nchi ya milima ya Gileadi na miji yake. 13Nusu ya kabila la Manase niliwapa sehemu iliyobaki ya Gileadi na Bashani yote, ufalme wa Ogu. (Eneo lote la Argobu, pamoja na Bashani yote, hujulikana kuwa nchi ya Warefai. 14Yairi, wa ukoo wa Manase, aliteka eneo lote la Argobu hadi mpaka wa Wageshuri na Wamaakathi, akaipa sehemu hizo za Bashani jina lake mwenyewe, Havoth-yairi, jina ambalo zinaitwa hata leo.) 15Makiri nilimpa Gileadi. 16Wareubeni na Wagadi niliwapa nchi inayoanzia Gileadi hadi Bonde la Arnoni, mpaka wake ukipita katikati ya bonde, na kuendelea hadi Mto Yaboki, mpaka wa Waamoni, 17na pia Araba, Mto Yordani ukiwa mpaka wake, kutoka Kinerethi hadi Bahari ya Araba, yaani Bahari ya Chumvi, chini ya miteremko ya Pisga upande wa mashariki. 18Wakati huo niliwapa agizo hili: ‘BWANA Mungu wenu amewapa nchi hii mwimiliki. Lakini kila mwanamume wa vita miongoni mwenu atavuka akiwa na silaha, akiwatangulia ndugu zenu Waisraeli. 19Ni wake zenu na watoto wenu tu, pamoja na mifugo yenu — nami najua mna mifugo mingi kiasi gani — watakaobaki katika miji niliyowapa, 20mpaka BWANA atakapowapa ndugu zenu Waisraeli pumziko, kama alivyowapa ninyi, nao pia waimiliki nchi ambayo BWANA Mungu wenu anawapa ng’ambo ya Yordani. Hapo ndipo kila mmoja wenu ataweza kurudi kwenye milki niliyowapa.’ 21Wakati huo nilimwagiza Yoshua, ‘Macho yako mwenyewe yameona yote ambayo BWANA Mungu wenu aliwatendea wafalme hawa wawili. BWANA atazitendea vivyo hivyo falme zote utakazozivukia. 22Msiwaogope. Anayewapigania ni BWANA Mungu wenu mwenyewe.’

23Wakati huo nilimsihi BWANA anipe kibali chake, nikisema, 24‘Bwana MUNGU, wewe umeanza tu kumwonyesha mtumishi wako ukuu wako na mkono wako wenye nguvu. Je, yuko mungu mbinguni au duniani awezaye kufanya kazi kama zako na matendo makuu kama yako? 25Nakusihi, niruhusu nivuke nikaione nchi nzuri iliyo ng’ambo ya Yordani, nchi hii nzuri ya milima na Lebanoni.’ 26Lakini BWANA alinikasirikia kwa sababu yenu, wala hakukubali kunisikiliza. BWANA akaniambia, ‘Yatosha! Usilitaje tena jambo hili mbele yangu. 27Panda juu ya kilele cha Pisga uangalie magharibi, kaskazini, kusini na mashariki. Itazame nchi kwa macho yako mwenyewe, kwa sababu hutavuka Yordani hii. 28Badala yake, umpe Yoshua jukumu. Mtie moyo na kumpa nguvu, kwa maana yeye atavuka akiwaongoza watu hawa, naye atawapa nchi utakayoiona kuwa urithi wao.’ 29Basi tukakaa katika bonde mkabala na Beth-peori.