Hesabu 20

1Katika mwezi wa kwanza Waisraeli, jumuiya yote, walifika katika nyika ya Zini, na watu wakakaa Kadeshi. Miriamu alikufa huko, na huko ndiko alikozikwa. 2Jumuiya haikuwa na maji, nao wakakusanyika pamoja dhidi ya Musa na Haruni. 3Watu waligombana na Musa. “Afadhali tungekufa,” wakasema, “ndugu zetu walipoangamia mbele za BWANA! 4Kwa nini mmelileta kusanyiko la BWANA katika nyika hii, ili sisi na wanyama wetu tufe hapa? 5Kwa nini mlitupandisha kutoka Misri ili tu kutuleta mahali hapa pabaya kabisa? Hapa hakuna kinachoweza kupandwa, hakuna tini, wala mizabibu, wala makomamanga, wala hata maji ya kunywa!” 6Musa na Haruni waliondoka mbele ya kusanyiko wakaenda mlangoni pa Hema la Kukutania. Wakaanguka kifudifudi, na utukufu wa BWANA ukawatokea.

7Ndipo BWANA akasema na Musa. Akasema, 8“Chukua fimbo, ukaikusanye jumuiya, wewe na ndugu yako Haruni. Kisha, wakiwa wanatazama, semeni na mwamba, nao utatoa maji yake. Hivyo utawatolea maji kutoka mwambani, na kuinywesha jumuiya na wanyama wao.” 9Basi Musa akaichukua fimbo mahali ilipokuwa mbele za BWANA, kama alivyomwamuru. 10Musa na Haruni walilikusanya kusanyiko mbele ya mwamba, naye Musa akawaambia, “Sikilizeni, enyi waasi! Je, ni lazima tuwatolee maji kutoka katika mwamba huu?” 11Ndipo Musa alipoinua mkono wake akaupiga mwamba mara mbili kwa fimbo yake. Maji yakabubujika kwa wingi, na jumuiya pamoja na wanyama wao wakanywa.

12Lakini BWANA aliwaambia Musa na Haruni, “Hamkuniamini mimi, na hivyo hamkuonyesha utakatifu wangu mbele ya Waisraeli. Kwa sababu hiyo, si ninyi mtakaoliongoza kusanyiko hili kuingia katika nchi niliyowapa.” 13Haya ndiyo yaliyokuwa maji ya Meriba, “Ugomvi,” ambapo Waisraeli waligombana na BWANA, naye akajionyesha mtakatifu kati yao.