Hesabu 11

1Basi watu walianza kunung’unika juu ya taabu zao masikioni mwa BWANA. BWANA aliposikia, hasira yake ikawaka, na moto kutoka kwa BWANA ukazuka kati yao, ukateketeza sehemu ya ukingo wa nje wa kambi. 2Watu walimlilia Musa, naye Musa akamwomba BWANA, na moto ukapungua. 3Kwa hiyo mahali pale paliitwa Tabera, kwa sababu moto wa BWANA ulikuwa umewaka kati yao. 4Mchanganyiko wa watu waliokuwa pamoja nao ulishikwa na tamaa kubwa, nao Waisraeli wakaanza kulia tena. Wakasema, “Laiti tungekuwa na nyama ya kula! 5Tunawakumbuka samaki tuliokuwa tukiwala huko Misri bila kulipa chochote, pamoja na matango, matikiti, vitunguu majani, vitunguu na vitunguu saumu. 6Lakini sasa tunadhoofika. Hakuna kitu chochote, na tunachokiona tu ni mana hiki!” 7Mana kilikuwa kama mbegu za giligilani, na kilionekana kama bedola. 8Watu walizunguka wakikiokota. Walikisaga kwa mawe ya kusagia au kukitwanga kinuni, kisha wakakipika chunguni na kutengeneza maandazi. Ladha yake ilikuwa kama ya keki iliyookwa kwa mafuta ya zeituni. 9Kila mara umande uliposhuka kambini usiku, mana nacho kilishuka pamoja nao. 10Musa aliwasikia watu wakilia, jamaa kwa jamaa, kila mmoja mlangoni pa hema lake. BWANA akakasirika sana, naye Musa akahuzunika mno. 11Musa alimwambia BWANA, “Kwa nini umeleta taabu hii juu ya mtumishi wako? Kwa nini sipati kibali mbele yako, hata unanitwika mzigo wa watu hawa wote? 12Je, mimi ndiye niliyeshika mimba ya watu hawa wote? Mimi ndiye niliyewazaa, hata uniambie, ‘Wakumbatie uwabebe, kama mlezi ambebavyo mtoto mchanga anyonyaye,’ mpaka katika nchi uliyowaahidi babu zao kwa kiapo? 13Ningepata wapi nyama ya kuwapa watu hawa wote? Wanaendelea kunililia, ‘Tupe nyama tule!’ 14Siwezi kuwabeba watu hawa wote peke yangu. Mzigo huu ni mzito mno kwangu. 15Ikiwa utanitendea hivi, basi uniue sasa hivi, kama nimepata kibali kwako, wala usiniache nione maangamizi yangu.”

16BWANA alimwambia Musa, “Nikusanyie wazee sabini wa Israeli, watu unaowajua kuwa wazee na maafisa wa watu. Walete kwenye Hema la Kukutania, wasimame pale pamoja nawe. 17Nitashuka na kuzungumza nawe pale. Nitachukua sehemu ya Roho aliye juu yako na kumweka juu yao. Ndipo watakaposhiriki nawe mzigo wa watu, nawe hutalazimika kuubeba peke yako. 18Uwaambie watu, ‘Jitakaseni kwa ajili ya kesho, nanyi mtakula nyama. Mmelalamika masikioni mwa BWANA, “Laiti tungekuwa na nyama ya kula! Tulikuwa na hali nzuri zaidi Misri!” Basi BWANA atawapa nyama, nanyi mtaila. 19Hamtaila kwa siku moja, wala mbili, wala tano, wala kumi, wala siku ishirini, 20bali kwa mwezi mzima, mpaka iwatoke puani na kuwachukiza. Kwa maana mmemkataa BWANA aliye kati yenu, mkalalamika mbele yake, “Kwa nini tulitoka Misri?”’” 21Lakini Musa alisema, “Mimi niko katikati ya watu wanaume 600,000 waendao kwa miguu, nawe unasema, ‘Nitawapa nyama, nao wataila kwa mwezi mzima!’ 22Hata kama kondoo na ng’ombe wangechinjwa kwa ajili yao, je, wangetosheka? Hata kama samaki wote wa baharini wangevuliwa kwa ajili yao, je, wangetosheka?”

23BWANA alimwambia Musa, “Je, mkono wa BWANA ni mfupi mno usiweze kufika? Sasa utaona kama neno langu litatimia kwako au la.” 24Basi Musa alitoka, akawaambia watu yale BWANA aliyoyasema. Akawakusanya watu sabini miongoni mwa wazee wa watu, akawasimamisha kulizunguka hema. 25Ndipo BWANA aliposhuka katika wingu, akasema na Musa. Akachukua sehemu ya Roho aliyekuwa juu ya Musa, akamweka juu ya wale wazee sabini. Mara Roho alipotua juu yao, wakatabiri, lakini hawakufanya hivyo tena. 26Hata hivyo, watu wawili walikuwa wamebaki kambini, mmoja aitwaye Eldadi na mwingine Medadi. Roho akatua juu yao pia. Walikuwa miongoni mwa walioorodheshwa, lakini hawakuwa wametoka kwenda hemani, nao wakatabiri kambini. 27Kijana mmoja alikimbia akamwambia Musa, “Eldadi na Medadi wanatabiri kambini!” 28Yoshua mwana wa Nuni, aliyekuwa akimtumikia Musa tangu ujana wake, akasema, “Bwana wangu Musa, wazuie!” 29Lakini Musa alimwambia, “Je, unaona wivu kwa ajili yangu? Laiti BWANA angeweka Roho wake juu ya watu wake wote, akamfanya kila mmoja wao kuwa nabii!” 30Kisha Musa na wazee wa Israeli walirudi kambini. 31Kisha upepo ulivuma kutoka kwa BWANA. Ukaleta kware kutoka baharini na kuwaangusha kando ya kambi, kwa umbali wa mwendo wa siku moja upande mmoja na mwendo wa siku moja upande mwingine, pande zote za kambi, kama sentimita 90 juu ya ardhi. 32Watu walishughulika mchana ule wote, usiku wote na mchana wote wa siku iliyofuata, wakikusanya kware. Aliyekusanya wachache kuliko wote alikusanya kama lita 2,200. Wakawatandaza kwa ajili yao kuizunguka kambi pote. 33Nyama ilipokuwa bado kati ya meno yao, kabla haijatafunwa, hasira ya BWANA iliwaka juu ya watu, naye BWANA akawapiga kwa pigo baya sana. 34Kwa hiyo mahali pale paliitwa Kibroth-hataava, kwa sababu huko ndiko walikowazika watu waliokuwa wametamani. 35Kutoka Kibroth-hataava watu walisafiri hadi Haserothi, wakakaa Haserothi.