Hesabu 17

1BWANA akanena na Musa. Akasema, 2“Sema na Waisraeli, upate kutoka kwao fimbo moja kwa kila jamaa ya mababu, moja kutoka kwa kila kiongozi wao kwa jamaa zao: fimbo kumi na mbili. Andika jina la kila mtu juu ya fimbo yake. 3Juu ya fimbo ya Lawi utaandika jina la Haruni, kwa sababu kila mkuu wa jamaa ya mababu ana fimbo moja. 4Kisha uziweke ndani ya Hema la Kukutania mbele ya Ushuhuda, ninapokutana nanyi. 5Mtu nitakayemchagua ndiye ambaye fimbo yake itachipuka. Hivyo nitayatuliza manung’uniko ya Waisraeli dhidi yenu, wala hayatanisumbua tena.” 6Basi Musa akasema na Waisraeli, na viongozi wao wote wakampa fimbo, moja kwa kila kiongozi, kwa jamaa za mababu zao: fimbo kumi na mbili. Fimbo ya Haruni ilikuwa miongoni mwa fimbo hizo. 7Musa aliziweka fimbo hizo mbele za BWANA ndani ya Hema la Ushuhuda. 8Siku iliyofuata Musa aliingia ndani ya Hema la Ushuhuda, na hapo ilikuwapo fimbo ya Haruni, fimbo ya nyumba ya Lawi, ikiwa imechipuka. Ilikuwa imetoa machipukizi, imechanua maua, na kuzaa lozi zilizoiva. 9Kisha Musa akazitoa fimbo zote kutoka mbele za BWANA na kuzileta kwa Waisraeli wote. Wakaziangalia, na kila kiongozi akachukua fimbo yake mwenyewe.

10BWANA akamwambia Musa, “Irudishe fimbo ya Haruni mahali pake mbele ya Ushuhuda. Itunzwe huko kuwa ishara kwa waasi, ili uyakomeshe malalamiko yao dhidi yangu, nao wasife.” 11Musa alifanya hivyo. Alifanya sawasawa na BWANA alivyomwamuru.

12Kisha Waisraeli wakamwambia Musa, “Tunakufa! Tunaangamia, kila mmoja wetu anaangamia! 13Yeyote anayekaribia, yeyote anayekaribia maskani ya BWANA, hufa. Je, sote tutaangamia hadi wa mwisho?”