Hesabu 15

1BWANA alisema na Musa. Akasema, 2“Sema na Waisraeli, uwaambie, ‘Mtakapoingia katika nchi mtakayoishi, nchi ninayowapa, 3nanyi mkimtolea BWANA sadaka ya kuteketezwa kwa moto kutoka kwa ng’ombe au kwa kondoo na mbuzi, iwe sadaka ya kuteketezwa au dhabihu, iwe ni kutimiza nadhiri, au sadaka ya hiari, au katika sikukuu zenu zilizoamriwa, ili iwe harufu ya kupendeza kwa BWANA, 4yule anayeleta sadaka atamtolea BWANA sadaka ya nafaka: unga laini kama lita 2 uliochanganywa na mafuta karibu lita 1. 5Pamoja na sadaka ya kuteketezwa au dhabihu, utaandaa pia divai karibu lita 1 kwa ajili ya sadaka ya kinywaji, kwa kila mwanakondoo. 6Kwa kondoo dume, utaandaa sadaka ya nafaka: unga laini kama lita 4 uliochanganywa na mafuta kama lita 1.2. 7Utatoa pia divai kama lita 1.2 kwa ajili ya sadaka ya kinywaji, harufu ya kupendeza kwa BWANA. 8Utakapoandaa fahali mchanga kuwa sadaka ya kuteketezwa, au dhabihu ya kutimiza nadhiri, au sadaka ya amani kwa BWANA, 9basi pamoja na fahali huyo mchanga itatolewa sadaka ya nafaka: unga laini kama lita 6.5 uliochanganywa na mafuta kama lita 2. 10Utatoa pia divai kama lita 2 kwa ajili ya sadaka ya kinywaji. Ni sadaka ya kuteketezwa kwa moto, harufu ya kupendeza kwa BWANA. 11Ndivyo itakavyofanywa kwa kila fahali au kondoo dume, na kwa kila mwanakondoo au mwanambuzi. 12Hata mkiandaa wanyama wangapi, mtafanya hivi kwa kila mmoja wao. 13Kila Mwisraeli kwa kuzaliwa atafanya mambo haya kwa namna hii anapotoa sadaka ya kuteketezwa kwa moto, harufu ya kupendeza kwa BWANA. 14Mgeni akiishi pamoja nanyi, au mtu mwingine yeyote aliye kati yenu katika vizazi vijavyo, naye akatoa sadaka ya kuteketezwa kwa moto, harufu ya kupendeza kwa BWANA, atafanya vilevile kama ninyi mnavyofanya. 15Kwa kusanyiko kutakuwa na kanuni moja, kwenu na kwa mgeni anayeishi pamoja nanyi. Ni kanuni ya kudumu milele katika vizazi vyenu vyote: mbele za BWANA mgeni atakuwa sawa na ninyi. 16Sheria moja na agizo moja vitawahusu ninyi na mgeni anayeishi pamoja nanyi.’”

17BWANA alisema na Musa. Akasema, 18“Sema na Waisraeli, uwaambie, ‘Mtakapoingia katika nchi ninayowapeleka, 19basi, mtakapokula chakula kinachotolewa na nchi, mtatenga toleo kwa ajili ya BWANA. 20Kutoka katika malimbuko ya unga wenu uliokandwa mtatenga mkate mmoja kuwa toleo. Mtautenga kama mnavyotenga toleo la uwanja wa kupuria. 21Katika vizazi vyenu vyote mtampa BWANA toleo kutoka katika malimbuko ya unga wenu uliokandwa.

22Basi, ikiwa mtapotoka bila kukusudia na kushindwa kuzishika amri hizi zote ambazo BWANA alimpa Musa, 23kila kitu ambacho BWANA amewaamuru kupitia Musa, tangu siku BWANA alipotoa amri kwa mara ya kwanza na kuendelea katika vizazi vyenu, 24ikiwa jambo hilo lilifanyika bila kukusudia, bila jumuiya kujua, jumuiya yote itaandaa fahali mmoja mchanga kuwa sadaka ya kuteketezwa, harufu ya kupendeza kwa BWANA, pamoja na sadaka yake ya nafaka na sadaka yake ya kinywaji kama ilivyoagizwa, na beberu mmoja kuwa sadaka ya dhambi. 25Kuhani atafanya upatanisho kwa ajili ya jumuiya yote ya Waisraeli, nao watasamehewa, kwa sababu lilikuwa kosa na wameleta sadaka yao, sadaka ya kuteketezwa kwa moto kwa BWANA, na sadaka yao ya dhambi mbele za BWANA kwa ajili ya kosa lao. 26Jumuiya yote ya Waisraeli itasamehewa, na hata mgeni anayeishi kati yao, kwa sababu watu wote walihusika katika kosa hilo.

27Mtu mmoja akitenda dhambi bila kukusudia, ataleta mbuzi jike wa mwaka mmoja kuwa sadaka ya dhambi. 28Kuhani atafanya upatanisho mbele za BWANA kwa ajili ya yule aliyepotoka na kutenda dhambi bila kukusudia. Upatanisho ukishafanywa, mtu huyo atasamehewa. 29Awe mzaliwa kati ya Waisraeli au mgeni anayeishi kati yao, mtakuwa na sheria moja kwa ajili ya mtu yeyote anayekosea bila kukusudia. 30Lakini mtu yeyote anayetenda dhambi kwa ukaidi, awe mzaliwa wa Israeli au mgeni, anamtukana BWANA, na mtu huyo lazima akatiliwe mbali kutoka kati ya watu. 31Mtu huyo amedharau alichosema BWANA na kuvunja amri yake, kwa hiyo lazima akatiliwe mbali kabisa. Hatia ni juu yake.’”

32Wakati mmoja, Waisraeli walipokuwa nyikani, baadhi yao walimkuta mtu akikusanya kuni siku ya Sabato. 33Wale waliomkamata akikusanya kuni walimpeleka kwa Musa, Haruni na jumuiya yote. 34Walimweka chini ya ulinzi, kwa sababu ilikuwa bado haijawekwa wazi ni nini kifanyike kwake.

35Ndipo BWANA akamwambia Musa, “Mtu huyo atauawa. Jumuiya yote itampiga mawe nje ya kambi.” 36Basi jumuiya yote ilimtoa nje ya kambi na kumpiga mawe hadi akafa, kama BWANA alivyomwamuru Musa.

37BWANA alimwambia Musa, 38“Sema na Waisraeli. Waambie kwamba katika kila kizazi wajifanyie vishada katika pembe za mavazi yao, na kufunga uzi wa samawati kwenye kishada cha kila pembe. 39‘Kila mtakapokiona kishada hiki, kitawakumbusha amri zote za BWANA, ili mzitende na msitangetange kufuata moyo wenu wenyewe na macho yenu wenyewe, mkiyafuata kwa ukosefu wa uaminifu, 40ili mzikumbuke na kuzitenda amri zangu zote, nanyi muwe watakatifu kwa Mungu wenu. 41Mimi ni BWANA Mungu wenu, niliyewatoa katika nchi ya Misri ili niwe Mungu wenu. Mimi ni BWANA Mungu wenu.’”