Hesabu 16

1Basi Kora mwana wa Ishari, mwana wa Kohathi, mwana wa Lawi, alikusanya watu upande wake, pamoja na Dathani na Abiramu, wana wa Eliabu, na Oni mwana wa Pelethi, waliokuwa wa kabila la Reubeni, 2nao wakainuka dhidi ya Musa. Pamoja nao walikuwa watu 250 kutoka miongoni mwa Waisraeli, viongozi wa jumuiya, wajumbe waliochaguliwa wa baraza, watu mashuhuri. 3Walikusanyika dhidi ya Musa na Haruni, wakawaambia, “Mmepita kiasi! Kila mtu katika jumuiya ni mtakatifu, wote kabisa, na BWANA yuko kati yao. Mna haki gani kujiinua juu ya kusanyiko la BWANA?” 4Musa aliposikia hayo, alianguka kifudifudi. 5Kisha akamwambia Kora na kundi lake lote, “Kesho asubuhi BWANA ataonyesha ni nani aliye wake na ni nani aliye mtakatifu, naye atamruhusu mtu huyo amkaribie. Yule atakayemchagua, atamleta karibu kwake. 6Kora, wewe na kundi lako lote, fanyeni hivi: chukueni vyetezo, 7na kesho tieni moto ndani yake na mweke uvumba juu yake mbele za BWANA. Mtu ambaye BWANA atamchagua ndiye atakayekuwa mtakatifu. Ninyi Walawi ndio mliopita kiasi!” 8Musa akamwambia Kora pia, “Sikilizeni, enyi Walawi! 9Je, ni jambo dogo kwenu kwamba Mungu wa Israeli amewatenga na jumuiya ya Israeli, akawaleta karibu kwake ili mfanye kazi ya maskani ya BWANA na kusimama mbele ya jumuiya na kuwatumikia? 10Amekuleta karibu, wewe na ndugu zako wote Walawi pamoja nawe, na sasa mnataka ukuhani pia? 11Basi ni dhidi ya BWANA kwamba wewe na kundi lako lote mmeungana. Haruni ni nani hata mmnung’unikie?” 12Kisha Musa akatuma watu kuwaita Dathani na Abiramu, wana wa Eliabu. Lakini wao wakasema, “Hatutapanda! 13Je, ni jambo dogo kwamba umetutoa katika nchi itiririkayo maziwa na asali ili kutuua jangwani? Je, sasa unataka pia kujifanya bwana juu yetu, tena bwana kamili? 14Tena hukutuingiza katika nchi itiririkayo maziwa na asali, wala hukutupa mashamba na mashamba ya mizabibu yawe mali yetu. Je, unataka kuyang’oa macho ya watu hawa? Hatutapanda!” 15Musa alikasirika sana, akamwambia BWANA, “Usiiangalie sadaka yao. Sijachukua kwao hata punda mmoja, wala sijamtendea yeyote kati yao ubaya wowote.” 16Musa akamwambia Kora, “Kesho wewe na kundi lako lote mnapaswa kuhudhuria mbele za BWANA: wewe, wao na Haruni. 17Kila mtu achukue chetezo chake na kuweka uvumba juu yake, na kila mmoja alete chetezo chake mbele za BWANA, vyetezo 250. Wewe na Haruni pia mlete vyetezo vyenu.” 18Basi kila mtu alichukua chetezo chake, akatia moto ndani yake na kuweka uvumba juu yake. Kisha wakasimama mlangoni pa Hema la Kukutania pamoja na Musa na Haruni. 19Kora aliikusanya jumuiya yote dhidi ya Musa na Haruni mlangoni pa Hema la Kukutania. Kisha utukufu wa BWANA ukaonekana kwa jumuiya yote.

20BWANA akanena na Musa na Haruni. Akasema, 21“Ondokeni mbali na jumuiya hii, ili niwaangamize papo hapo.” 22Lakini wao wakaanguka kifudifudi, wakasema, “Ee Mungu, Mungu wa roho za wanadamu wote, mtu mmoja akitenda dhambi, je, wewe utaikasirikia jumuiya nzima?”

23BWANA akanena na Musa. Akasema, 24“Iambie jumuiya, ‘Ondokeni mbali na makao ya Kora, Dathani na Abiramu.’” 25Kisha Musa aliinuka akaenda kwa Dathani na Abiramu, na wazee wa Israeli wakamfuata. 26Akaiambia jumuiya, “Ondokeni sasa kwenye mahema ya watu hawa waovu! Msiguse kitu chochote kilicho mali yao, la sivyo mtafagiliwa mbali watakapoadhibiwa kwa dhambi zao zote.” 27Basi watu waliondoka pande zote za makao ya Kora, Dathani na Abiramu. Dathani na Abiramu walikuwa wametoka nje, wamesimama milangoni pa mahema yao, pamoja na wake zao, wana wao na watoto wao wachanga. 28Kisha Musa akasema, “Hivi ndivyo mtakavyojua kwamba BWANA alinituma kufanya mambo haya yote, na kwamba hayakuwa wazo langu mwenyewe. 29Ikiwa watu hawa watakufa jinsi watu wote wanavyokufa, na kuwapata tu yale yanayompata kila mtu, basi BWANA hakunituma. 30Lakini BWANA akifanya jambo jipya kabisa, na ardhi ikafunua kinywa chake na kuwameza pamoja na vitu vyao vyote, nao wakashuka Kuzimu wakiwa hai, ndipo mtajua kwamba watu hawa wamemdharau BWANA.” 31Mara tu alipomaliza kusema hayo yote, ardhi iliyokuwa chini yao ikapasuka. 32Nchi ilifunua kinywa chake ikawameza, pamoja na jamaa zao, watu wote wa Kora na mali yao yote. 33Walishuka Kuzimu wakiwa hai, wao na vyote walivyokuwa navyo. Nchi ikawafunikia juu, nao wakaangamia, wakatoweka katikati ya kusanyiko. 34Israeli wote waliokuwa karibu nao wakakimbia waliposikia vilio vyao, kwa maana walisema, “Nchi isije ikatumeza nasi pia!” 35Kisha moto ukatoka kwa BWANA, ukawala wale watu 250 waliokuwa wakifukiza uvumba.

36Kisha BWANA akanena na Musa. Akasema, 37“Mwambie Eleazari mwana wa Haruni kuhani aviondoe vyetezo kutoka kwenye mabaki yaliyoungua, na kuyatawanya makaa mbali, kwa sababu vyetezo hivyo ni vitakatifu. 38Watu hawa walitenda dhambi iliyowagharimu maisha yao. Mvifue vyetezo vyao kuwa mabamba membamba ya kufunika madhabahu. Vililetwa mbele za BWANA, kwa hiyo vimekuwa vitakatifu. Viwe ishara kwa Waisraeli.” 39Basi Eleazari kuhani akavichukua vyetezo vya shaba vilivyoletwa na watu walioteketezwa, navyo vikafuliwa ili kufunika madhabahu, 40kuwa ukumbusho kwa Waisraeli kwamba mtu wa nje, yeyote asiye mzao wa Haruni, asikaribie kufukiza uvumba mbele za BWANA, la sivyo atakuwa kama Kora na kundi lake. Hili lilifanyika kama BWANA alivyomwambia Eleazari kupitia Musa. 41Siku iliyofuata jumuiya yote ya Waisraeli iliwanung’unikia Musa na Haruni. Walisema, “Ninyi mmewaua watu wa BWANA!” 42Lakini jumuiya ilipokusanyika dhidi ya Musa na Haruni, na walipogeuka kuelekea Hema la Kukutania, waliona wingu limelifunika, na utukufu wa BWANA ukaonekana. 43Musa na Haruni walikuja mbele ya Hema la Kukutania,

44naye BWANA akanena na Musa. Akasema, 45“Ondokeni mbali na jumuiya hii, nami nitawaangamiza papo hapo.” Lakini wao wakaanguka kifudifudi. 46Musa akamwambia Haruni, “Chukua chetezo chako, utie ndani yake moto kutoka madhabahuni, na uweke uvumba juu yake. Kisha ukipeleke upesi kwa jumuiya, ukawafanyie upatanisho, kwa sababu ghadhabu imetoka kwa BWANA. Pigo limeanza!” 47Basi Haruni akakichukua kama Musa alivyosema, akakimbia katikati ya kusanyiko. Pigo lilikuwa limekwisha kuanza kati ya watu, lakini yeye akaweka uvumba na kuwafanyia upatanisho. 48Alisimama imara kati ya wafu na walio hai, na pigo likazuiliwa. 49Waliokufa kwa pigo hilo walikuwa 14,700, bila kuwahesabu wale waliokufa kwa sababu ya Kora. 50Kisha Haruni akarudi kwa Musa mlangoni pa Hema la Kukutania, kwa maana pigo lilikuwa limezuiliwa.