Hesabu 19

1BWANA alisema na Musa na Haruni. Akasema, 2“Hii ndiyo kanuni ya sheria ambayo BWANA ameamuru: Waambie Waisraeli wakuletee mtamba mwekundu aliye mkamilifu, asiye na dosari yoyote, ambaye hajawahi kufungwa nira. 3Mtampa Eleazari kuhani. Atatolewa nje ya kambi na kuchinjwa mbele yake. 4Eleazari kuhani atachukua damu yake kidogo kwa kidole chake na kuinyunyiza mara saba kuelekea upande wa mbele wa Hema la Kukutania. 5Mtamba huyo atachomwa mbele yake. Ngozi yake, nyama yake na damu yake vitachomwa pamoja na mavi yake. 6Kuhani atachukua mti wa mwerezi, hisopo na uzi wa rangi nyekundu, na kuvitupa ndani ya moto unaomteketeza mtamba. 7Kisha kuhani atafua nguo zake na kuoga mwili wake kwa maji. Baada ya hapo anaweza kuingia kambini, lakini atabaki najisi mpaka jioni. 8Yule anayemchoma naye atafua nguo zake kwa maji na kuoga mwili wake kwa maji, naye pia atakuwa najisi mpaka jioni. 9Mtu aliye safi atakusanya majivu ya mtamba na kuyaweka mahali palipo safi nje ya kambi. Yatatunzwa kwa ajili ya jumuiya ya Waisraeli, kwa ajili ya maji ya kuondoa unajisi. Ni sadaka ya dhambi. 10Yule anayekusanya majivu ya mtamba atafua nguo zake, naye atakuwa najisi mpaka jioni. Hii itakuwa kanuni ya kudumu milele kwa Waisraeli na kwa mgeni anayeishi kati yao. 11Mtu yeyote anayegusa maiti ya binadamu yeyote atakuwa najisi kwa siku saba. 12Mtu huyo atajitakasa kwa maji hayo siku ya tatu na siku ya saba, na ndipo atakapokuwa safi. Lakini asipojitakasa siku ya tatu na siku ya saba, hatakuwa safi. 13Mtu yeyote anayegusa maiti, mwili wa mtu aliyekufa, asijitakase, anaitia unajisi maskani ya BWANA, na mtu huyo lazima akatiliwe mbali na Israeli. Maji ya kuondoa unajisi hayakunyunyizwa juu yake, kwa hiyo anabaki najisi; unajisi wake bado uko juu yake. 14Hii ndiyo sheria mtu anapokufa ndani ya hema: kila anayeingia ndani ya hema hilo na kila aliyemo ndani yake atakuwa najisi kwa siku saba. 15Kila chombo kilicho wazi, kisicho na kifuniko kilichofungwa juu yake, ni najisi. 16Mtu yeyote aliye nje kondeni anayegusa mtu aliyeuawa kwa upanga, au mtu aliyekufa, au mfupa wa binadamu, au kaburi, atakuwa najisi kwa siku saba. 17Kwa ajili ya mtu aliye najisi, yatachukuliwa majivu kidogo ya sadaka ya dhambi iliyochomwa na kutiwa katika chombo, na maji safi ya chemchemi yatamiminwa juu yake. 18Kisha mtu aliye safi atachukua hisopo, aichovye katika maji, na kunyunyiza hema, vyombo vyake vyote na watu waliokuwamo. Atamnyunyizia pia mtu yeyote aliyegusa mfupa, au mtu aliyeuawa, au aliyekufa, au kaburi. 19Mtu aliye safi atamnyunyizia mtu aliye najisi siku ya tatu na siku ya saba, na siku ya saba atakuwa amemtakasa. Kisha yule anayetakaswa atafua nguo zake na kuoga kwa maji, na jioni atakuwa safi. 20Lakini mtu aliye najisi asiyejitakasa lazima akatiliwe mbali kutoka kati ya kusanyiko, kwa sababu ameitia unajisi mahali patakatifu pa BWANA. Maji ya kuondoa unajisi hayakunyunyizwa juu yake; yeye ni najisi. 21Hii itakuwa kanuni ya kudumu milele kwao. Yule anayenyunyiza maji ya kuondoa unajisi atafua nguo zake, na yeyote anayegusa maji hayo atakuwa najisi mpaka jioni. 22Kitu chochote anachokigusa mtu aliye najisi kinakuwa najisi, na yeyote anayekigusa atakuwa najisi mpaka jioni.”