Hesabu 14

1Ndipo jumuiya yote ikapaza kilio kikubwa, na watu wakalia usiku ule. 2Waisraeli wote waliwanung’unikia Musa na Haruni, na jumuiya yote ikawaambia, “Afadhali tungekufa katika nchi ya Misri, au hata tungekufa hapa katika jangwa hili! 3BWANA anafanya nini, akituleta katika nchi hii ili tu tuuawe vitani? Wake zetu na watoto wetu wadogo watachukuliwa kama nyara. Je, si afadhali turudi Misri?” 4Wakaambiana, “Tumchague mtu atuongoze, turudi Misri.” 5Ndipo Musa na Haruni walianguka kifudifudi mbele ya kusanyiko lote la jumuiya ya Waisraeli. 6Yoshua mwana wa Nuni na Kalebu mwana wa Yefune, wawili kati ya watu walioipeleleza nchi, walirarua nguo zao. 7Waliiambia jumuiya yote ya Waisraeli, “Nchi tuliyoipitia kuipeleleza ni nchi nzuri, nzuri kupita kiasi. 8Kama BWANA akipendezwa nasi, atatuingiza katika nchi hii na kutupa iwe yetu, nchi itiririkayo maziwa na asali. 9Ila msimwasi BWANA. Nanyi msiwaogope watu wanaoishi katika nchi ile; tutawameza kama mkate. Kinga iliyokuwa juu yao imeondolewa, lakini BWANA yu pamoja nasi. Basi msiwaogope!” 10Lakini jumuiya yote ilikuwa ikizungumza habari ya kuwapiga mawe. Ndipo utukufu wa BWANA ukawatokea Waisraeli wote katika Hema la Kukutania.

11BWANA akamwambia Musa, “Watu hawa watanidharau mpaka lini? Wataendelea kukataa kuniamini mpaka lini, ingawa nimefanya ishara nyingi hivi kati yao? 12Nitawapiga kwa ugonjwa na kuwaondolea urithi wao, na kutoka kwako nitafanya taifa kubwa na lenye nguvu kuliko wao.” 13Lakini Musa akamwambia BWANA, “Wamisri watasikia habari hii! Kwa nguvu zako wewe uliwatoa watu hawa kutoka miongoni mwao, 14nao watawaeleza wale wanaoishi katika nchi hii. Hao wamesikia kwamba wewe, BWANA, uko pamoja na watu hawa; kwamba wewe, BWANA, unajionyesha kwao waziwazi, jicho kwa jicho; kwamba wingu lako hukaa juu yao; na kwamba wewe huwatangulia, katika nguzo ya wingu mchana na katika nguzo ya moto usiku. 15Kama ukiwaua watu hawa wote mara moja, mataifa yaliyosikia habari zako yatasema, 16‘Ni kwa sababu BWANA alishindwa kuwaingiza watu hawa katika nchi aliyoapa kuwapa, ndiyo maana amewachinja jangwani.’ 17Basi sasa, nakusihi, nguvu za Bwana wangu zionekane kuwa kuu, kama ulivyotangaza: 18‘BWANA huchelewa kukasirika, naye amejaa upendo usiokoma; husamehe uovu na uasi. Hata hivyo hamwachilii kamwe mwenye hatia; huuleta uovu wa wazazi juu ya watoto wao, hadi kizazi cha tatu na cha nne.’ 19Tafadhali usamehe uovu wa watu hawa, kama inavyostahili ukuu wa upendo wako usiokoma, kama vile ulivyowachukulia watu hawa tangu Misri mpaka sasa.” 20BWANA akajibu, “Nimewasamehe, kama ulivyoomba. 21Hata hivyo, hakika kama niishivyo, na hakika kama utukufu wa BWANA utakavyoijaza dunia yote, 22watu wote walioona utukufu wangu na ishara nilizofanya Misri na jangwani, na bado wamenijaribu mara hizi kumi na hawakuisikiliza sauti yangu, 23hakuna hata mmoja wao atakayeiona nchi niliyoapa kuwapa baba zao; hakuna yeyote kati ya walionidharau atakayeiona. 24Lakini mtumishi wangu Kalebu ni tofauti: ana roho nyingine ndani yake, naye amenifuata kwa moyo wake wote. Kwa hiyo nitamwingiza katika nchi aliyoiingia, na wazao wake wataimiliki. 25Basi Waamaleki na Wakanaani wanaishi katika bonde. Kesho geukeni mwende jangwani kwa njia ya Bahari ya Shamu.”

26Kisha BWANA akasema na Musa na Haruni. Akasema, 27“Nitaivumilia mpaka lini jumuiya hii ovu isiyoacha kuninung’unikia? Nimeyasikia malalamiko ambayo Waisraeli wanatoa dhidi yangu. 28Waambie, ‘Kama niishivyo, asema BWANA, nitawatendea sawasawa na mlivyosema nikisikia: 29Hapa katika jangwa hili miili yenu itaanguka, ninyi nyote mliohesabiwa, idadi yenu yote ya wenye umri wa miaka ishirini na zaidi, mlioninung’unikia. 30Hakika hamtaingia katika nchi ambayo niliinua mkono wangu nikaapa kuwapa iwe makao yenu, isipokuwa Kalebu mwana wa Yefune na Yoshua mwana wa Nuni. 31Lakini watoto wenu wadogo, ambao mlisema watachukuliwa kama nyara, nitawaingiza, nao wataijua nchi mliyoikataa. 32Lakini ninyi, miili yenu itaanguka katika jangwa hili. 33Watoto wenu watatangatanga jangwani kama wachungaji kwa miaka arobaini, wakibeba mzigo wa kukosa kwenu uaminifu, hadi miili yenu yote itakapokuwa imeanguka jangwani. 34Mlitumia siku arobaini kuipeleleza nchi; kwa kila siku mtabeba hatia yenu mwaka mmoja, miaka arobaini kwa jumla, nanyi mtajua maana ya upinzani wangu. 35Mimi, BWANA, nimesema. Hakika nitaitendea hivi jumuiya hii yote ovu iliyoungana dhidi yangu: katika jangwa hili watafikia mwisho wao, na hapa ndipo watakapokufa.’” 36Na wale watu ambao Musa alikuwa amewatuma kuipeleleza nchi, waliorudi na kuifanya jumuiya yote imnung’unikie kwa kueneza habari mbaya kuhusu nchi, 37watu hao walioeneza habari mbaya kuhusu nchi walikufa kwa pigo mbele ya BWANA. 38Lakini Yoshua mwana wa Nuni na Kalebu mwana wa Yefune walibaki hai, wawili pekee waliosalia kati ya watu waliokwenda kuipeleleza nchi. 39Musa aliwaeleza Waisraeli wote maneno haya, na watu wakahuzunika sana. 40Waliamka asubuhi na mapema, wakapanda kuelekea vilele vya nchi ya milima, wakisema, “Sisi hapa! Tutapanda mpaka mahali alipotaja BWANA, kwa maana tumetenda dhambi.” 41Lakini Musa akasema, “Kwa nini mnafanya hivi, mkienda kinyume cha alichoamuru BWANA? Hamtafanikiwa. 42Msipande, kwa maana BWANA hayuko katikati yenu; msikubali adui zenu wawaangushe. 43Waamaleki na Wakanaani wako huko mbele yenu, nanyi mtaanguka kwa upanga. Kwa kuwa mmeacha kumfuata BWANA, BWANA hatakuwa pamoja nanyi.” 44Lakini kwa ukaidi waliendelea kupanda kuelekea vilele vya nchi ya milima, ingawa sanduku la agano la BWANA na Musa hawakutoka kambini. 45Ndipo Waamaleki na Wakanaani walioishi katika nchi ile ya milima wakawashukia, wakawapiga na kuwavunjavunja mpaka Horma.