Hesabu 13

1Kisha BWANA alizungumza na Musa. Akamwambia, 2“Tuma watu waipeleleze nchi ya Kanaani, ambayo mimi ninawapa Waisraeli. Kutoka kila kabila la mababu zao mtatuma mtu mmoja, na kila mmoja wao awe kiongozi miongoni mwao.” 3Basi Musa aliwatuma kutoka nyika ya Parani, kama BWANA alivyoagiza. Wote walikuwa watu walio wakuu miongoni mwa Waisraeli. 4Haya ndiyo majina yao: kutoka kabila la Reubeni, Shamua mwana wa Zakuri. 5Kutoka kabila la Simeoni, Shafati mwana wa Hori. 6Kutoka kabila la Yuda, Kalebu mwana wa Yefune. 7Kutoka kabila la Isakari, Igali mwana wa Yusufu. 8Kutoka kabila la Efraimu, Hoshea mwana wa Nuni. 9Kutoka kabila la Benyamini, Palti mwana wa Rafu. 10Kutoka kabila la Zabuloni, Gadieli mwana wa Sodi. 11Kutoka kabila la Yusufu, yaani kabila la Manase, Gaddi mwana wa Susi. 12Kutoka kabila la Dani, Amieli mwana wa Gemali. 13Kutoka kabila la Asheri, Sethuri mwana wa Mikaeli. 14Kutoka kabila la Naftali, Nahbi mwana wa Vofsi. 15Kutoka kabila la Gadi, Geueli mwana wa Maki. 16Haya ndiyo majina ya watu ambao Musa aliwatuma kuipeleleza nchi. Naye Musa akampa Hoshea mwana wa Nuni jina Yoshua. 17Musa alipowatuma kuipeleleza nchi ya Kanaani, aliwaambia, “Pandeni kwa njia hii mpaka Negebu, kisha endeleeni kupanda mpaka nchi ya milima, 18mkaone nchi ilivyo, na kama watu wanaokaa ndani yake ni hodari au dhaifu, wachache au wengi, 19ni nchi ya namna gani wanayoishi, kama ni nzuri au mbaya, na ni miji ya namna gani wanayoishi, kama ni kambi zisizo na kuta au miji yenye ngome, 20na kama udongo wake una rutuba au hauna, na kama kuna miti au hakuna. Muwe hodari, mlete baadhi ya matunda ya nchi hiyo.” Ulikuwa msimu wa zabibu za kwanza kuiva. 21Basi walipanda wakaipeleleza nchi kutoka nyika ya Zini mpaka Rehobu, karibu na Lebo-hamathi. 22Walipanda kupitia Negebu wakafika Hebroni, mahali walipoishi Ahimani, Sheshai na Talmai, wazao wa Anaki. (Hebroni ilikuwa imejengwa miaka saba kabla ya Soani huko Misri.) 23Walipofika bonde la Eshkoli, walikata tawi lenye kishada kimoja tu cha zabibu, na wawili kati yao wakalibeba kwa mti. Pia wakachukua baadhi ya makomamanga na tini. 24Mahali pale paliitwa bonde la Eshkoli kwa sababu ya kishada cha zabibu ambacho Waisraeli walikata huko. 25Baada ya siku arobaini walirudi kutoka kuipeleleza nchi. 26Walirudi kwa Musa na Haruni na jumuiya yote ya Waisraeli huko Kadeshi katika nyika ya Parani. Wakawapa taarifa yao, wao na jumuiya yote, wakawaonyesha matunda ya nchi. 27Wakampa Musa habari hii: “Tuliingia katika nchi uliyotutuma. Kweli ni nchi itiririkayo maziwa na asali, na haya ndiyo matunda yake. 28Lakini watu wanaoishi katika nchi hiyo wana nguvu, na miji yao ina ngome na ni mikubwa sana. Hata tuliwaona huko wazao wa Anaki. 29Waamaleki wanaishi katika nchi ya Negebu. Wahiti, Wayebusi na Waamori wanaishi katika nchi ya milima, na Wakanaani wanaishi kando ya bahari na kando ya Yordani.” 30Kisha Kalebu akawanyamazisha watu mbele ya Musa, akasema, “Ni lazima tupande tuimiliki nchi hii, kwa maana hakika tunaweza kuishinda.” 31Lakini wale watu waliopanda pamoja naye wakasema, “Hatuwezi kuwashambulia watu hawa, kwa sababu wana nguvu mno kwetu.” 32Basi wakaeneza miongoni mwa Waisraeli habari mbaya kuhusu nchi waliyoipeleleza, wakisema, “Nchi tuliyopita kuipeleleza ni nchi inayowala wale wanaoishi ndani yake. Watu wote tuliowaona huko ni watu wenye miili mikubwa mno. 33Tuliwaona huko Wanefili, wana wa Anaki, ambao wametoka kwa Wanefili. Machoni petu wenyewe tulionekana kama panzi, na ndivyo tulivyoonekana machoni pao.”