Hesabu 12

1Miriamu na Haruni walimsema Musa vibaya kwa sababu ya mwanamke Mkushi aliyekuwa amemwoa, kwa kuwa alikuwa amemwoa mwanamke Mkushi. 2Walisema, “Je, BWANA amesema kupitia Musa peke yake? Je, hajasema kupitia sisi pia?” Naye BWANA akasikia. 3Basi Musa alikuwa mnyenyekevu mno, kuliko mwanadamu mwingine yeyote duniani.

4Ghafula BWANA aliwaambia Musa, Haruni na Miriamu, “Ninyi watatu, tokeni mje kwenye Hema la Kukutania.” Nao watatu wakatoka. 5BWANA alishuka katika nguzo ya wingu, akasimama mlangoni pa hema. Akawaita Haruni na Miriamu, nao wawili wakajitokeza mbele. 6Kisha akasema, “Sikilizeni ninayosema: kila mnapokuwa na nabii, mimi, BWANA, hujijulisha kwake katika maono; katika ndoto husema naye. 7Sivyo ilivyo kwa mtumishi wangu Musa; yeye ameaminiwa katika nyumba yangu yote. 8Ninasema naye kinywa kwa kinywa, waziwazi wala si kwa mafumbo, naye hutazama umbo la BWANA. Imekuwaje basi hamkuogopa kumsema vibaya mtumishi wangu Musa?” 9Hasira ya BWANA iliwaka dhidi yao, naye akaondoka. 10Wingu lilipoondoka juu ya hema, kumbe Miriamu alikuwa na ugonjwa mbaya wa ngozi, kama theluji. Haruni akamgeukia Miriamu, akamwona ana ugonjwa huo. 11Haruni alimwambia Musa, “Tafadhali, bwana wangu, usitufanye tuibebe adhabu ya dhambi tuliyoitenda kwa upumbavu wetu. 12Usimwache awe kama mtoto aliyezaliwa amekufa, ambaye nusu ya nyama yake imekwisha kuoza anapotoka tumboni mwa mama yake.” 13Basi Musa alimlilia BWANA, “Ee Mungu, tafadhali umponye!”

14BWANA alimjibu Musa, “Kama baba yake angalimtemea mate usoni tu, je, hangebeba aibu yake kwa siku saba? Na afungiwe nje ya kambi siku saba; kisha anaweza kurudishwa ndani.” 15Basi Miriamu alifungiwa nje ya kambi kwa siku saba, na watu hawakuvunja kambi mpaka alipokwisha kurudishwa ndani. 16Baada ya hayo watu walisafiri kutoka Haserothi, wakapiga kambi katika nyika ya Parani.