Waefeso 1

1Kutoka kwa Paulo, mtume wa Kristo Yesu kwa mapenzi ya Mungu, kwa watu wa Mungu walio watakatifu huko Efeso, walio waaminifu katika Kristo Yesu. 2Neema na amani kutoka kwa Mungu Baba yetu na kwa Bwana Yesu Kristo ziwe pamoja nanyi.

3Ahimidiwe Mungu na Baba wa Bwana wetu Yesu Kristo. Ndani ya Kristo ametubariki kwa kila baraka itokayo kwa Roho katika ulimwengu wa mbinguni. 4Hata kabla ulimwengu haujaumbwa, Mungu alituchagua ndani ya Kristo, ili tuwe watakatifu na bila dosari mbele yake katika upendo. 5Alitutenga tangu awali tufanywe wana wake kupitia Yesu Kristo. Ndivyo alivyopenda kufanya kwa moyo mkunjufu, 6ili neema yake yenye utukufu isifiwe, neema ambayo ametupa bure katika yule Mpendwa. 7Ndani yake, na kupitia damu yake, tuna ukombozi, msamaha wa makosa yetu. Tunao kwa sababu neema ya Mungu ni tele, 8neema ambayo ameimimina juu yetu kwa wingi, pamoja na hekima yote na ufahamu. 9Ametujulisha siri ya mapenzi yake, kama ilivyompendeza kufanya. Aliweka kusudi hili ndani ya Kristo 10kuwa mpango wake kwa wakati nyakati zitakapotimia: kuviunganisha vitu vyote chini ya kichwa kimoja ndani ya Kristo, vitu vya mbinguni na vitu vya duniani, vyote ndani yake. 11Ndani yake sisi pia tumefanywa fungu la Mungu mwenyewe. Tuliamuliwa kwa ajili ya jambo hili tangu awali kwa kusudi la Mungu, anayetenda kila kitu kama mapenzi yake yanavyoamua, 12ili sisi, tuliokuwa wa kwanza kuweka tumaini letu katika Kristo, tuuletee utukufu wake sifa. 13Nanyi pia mko ndani yake. Mlisikia ujumbe wa kweli, Injili inayowaletea wokovu, mkaamini; na ndani yake mlitiwa muhuri kwa Roho Mtakatifu ambaye Mungu alikuwa ameahidi. 14Roho ndiye malipo ya awali ya urithi wetu, mpaka Mungu atakapowakomboa wale walio mali yake, ili utukufu wake usifiwe.

15Kwa sababu hiyo, tangu niliposikia habari za imani yenu katika Bwana Yesu na upendo wenu kwa watu wote wa Mungu walio watakatifu, 16sijaacha kumshukuru Mungu kwa ajili yenu. Ninawataja kila ninaposali, 17nikimwomba Mungu wa Bwana wetu Yesu Kristo, Baba wa utukufu, awape Roho aletaye hekima na ufunuo mnapozidi kumjua. 18Macho ya moyo wenu yakiwa yamefunguliwa kwa nuru, mtajua tumaini ambalo wito wake unawapa, jinsi urithi alio nao katika watu wake watakatifu ulivyo tajiri na wenye utukufu, 19na jinsi uweza wake unaotenda kazi kwa ajili yetu sisi tunaoamini ulivyo mkuu kupita kipimo chochote. Ni utendaji wa nguvu zake kuu, 20ambazo alizitumia katika Kristo alipomfufua kutoka kwa wafu na kumketisha upande wake wa kulia katika ulimwengu wa mbinguni, 21juu sana ya kila mtawala na mamlaka, kila uweza na ubwana, na kila jina linaloweza kutajwa, si katika enzi hii tu bali pia katika enzi ijayo. 22Mungu ameweka vitu vyote chini ya miguu ya Kristo, na amemtoa yeye kwa kanisa awe kichwa juu ya vitu vyote. 23Kanisa ni mwili wake. Ni utimilifu wake, uliojazwa na yeye anayejaza kila kitu kila mahali na kwa kila namna.