Waefeso 4

1Kwa hiyo mimi, niliye mfungwa kwa ajili ya Bwana, ninawaomba: ishini maisha yanayostahili wito wa Mungu, wito ule mlioupokea. 2Kuweni wanyenyekevu na wapole kwa kila namna, na wavumilivu, mkichukuliana kwa upendo. 3Fanyeni kila juhudi kudumisha umoja ambao Roho huwapa, na amani iwe kifungo kinachowaunganisha. 4Kuna mwili mmoja na Roho mmoja, kama vile kuna tumaini moja linalotokana na wito mlioupokea. 5Kuna Bwana mmoja, imani moja, ubatizo mmoja, 6Mungu mmoja, Baba wa wote, ambaye yuko juu ya wote, na kupitia wote, na ndani ya wote.

7Lakini kila mmoja wetu amepewa neema, kwa kipimo ambacho Kristo aliitoa. 8Ndiyo sababu inasema: “Alipopanda juu sana, aliongoza msafara wa mateka, akawapa wanadamu zawadi.” 9Sasa, “Alipanda” maana yake nini, kama si kwamba alikuwa ameshuka pia hadi sehemu za chini za dunia? 10Yule aliyeshuka ndiye yule yule aliyepanda, juu zaidi ya mbingu zote, ili ajaze vitu vyote. 11Ni yeye aliyewatoa wengine wawe mitume, wengine manabii, wengine wainjilisti, na wengine wachungaji na walimu. 12Aliwatoa ili wawaandae watakatifu wa Mungu kwa kazi ya kuhudumu, ili mwili wa Kristo ujengwe, 13mpaka sisi sote tufikie umoja wa imani na wa kumjua Mwana wa Mungu. Hapo tutakuwa mtu mzima aliyekomaa, tukiwa tumekua hadi kufikia kipimo kamili cha kimo kinachotokana na utimilifu wa Kristo. 14Hatutakuwa tena watoto wachanga, tukisukwasukwa na mawimbi na kupelekwa kila upande na kila upepo mpya wa mafundisho, tukiwa mikononi mwa watu wanaocheza hila na kupanga kwa werevu jinsi ya kuwapotosha wengine. 15Badala yake, tukisema kweli kwa upendo, inatupasa kukua katika kila hali kuelekea kwake, yeye aliye kichwa, Kristo. 16Kutoka kwake mwili wote unaungwa na kushikiliwa pamoja na kila kano inayoupa msaada. Kila sehemu inapofanya kazi yake, mwili hukua na kujijenga wenyewe katika upendo.

17Kwa hiyo nawaambia jambo hili, na kulisisitiza katika Bwana: msiishi tena kama watu wa mataifa wanavyoishi, wakiwa na mawazo matupu yasiyo na maana. 18Ufahamu wao umetiwa giza, nao wametengwa mbali na uzima wa Mungu kwa sababu ya ujinga ulio ndani yao, kwa sababu mioyo yao imekuwa migumu. 19Wamepoteza hisia zote, nao wamejitoa kwa ufasiki, wakitenda kila aina ya uchafu kwa tamaa isiyotosheka kamwe. 20Lakini sivyo mlivyojifunza Kristo. 21Hakika mlimsikia, na mlifundishwa kama watu walio wake, kulingana na kweli iliyo ndani ya Yesu. 22Mlifundishwa kuuvua utu wa zamani, utu wa mwenendo wenu wa awali, ambao unaharibiwa na tamaa zake za udanganyifu; 23kufanywa upya katika roho ya akili zenu; 24na kuuvaa utu mpya, ulioumbwa kwa mfano wa Mungu, katika haki na utakatifu unaotokana na kweli.

25Basi sasa kwa kuwa mmeuvua uongo, kila mmoja wenu amwambie jirani yake kweli, kwa maana sisi kwa sisi ni viungo. 26Mkikasirika, msiruhusu hasira hiyo iwapeleke kwenye dhambi. Jua lisizame mkiwa bado na hasira, 27na msimpe Ibilisi mwanya. 28Wezi wasiibe tena. Badala yake wafanye kazi kwa bidii, wakitenda jambo jema kwa mikono yao wenyewe, ili wawe na kitu cha kuwagawia wenye mahitaji. 29Neno lililooza lisipite midomoni mwenu. Semeni tu yaliyo mema, yanayojenga na kukidhi hitaji la wakati huo, ili maneno yenu yawaletee neema wale wanaoyasikia. 30Na msimhuzunishe Roho Mtakatifu wa Mungu. Ni kwa Roho huyo mlipigwa muhuri, mkawekwa alama kwa ajili ya siku ya ukombozi. 31Achaneni na kila uchungu, milipuko ya hamaki na ghadhabu, kila makelele ya ugomvi na kashfa, pamoja na kila aina ya ubaya. 32Kuweni wema kwa kila mmoja wenu na wenye huruma nyingi. Sameheaneni kwa moyo mkunjufu, kama vile Mungu alivyowasamehe ninyi katika Kristo.