Waefeso 3

1Kwa sababu hii mimi, Paulo, niliye mfungwa wa Kristo Yesu kwa ajili yenu, ninyi watu wa mataifa— 2hakika mmesikia jinsi Mungu alivyonikabidhi neema yake ili niisimamie kwa faida yenu. 3Mungu alinijulisha siri hiyo kwa ufunuo, kama nilivyokwisha kuandika kwa ufupi. 4Mtakaposoma haya, mtaweza kuona jinsi ninavyoielewa siri ya Kristo. 5Katika vizazi vingine wanadamu hawakujulishwa siri hiyo kama ambavyo sasa Roho ameifunua kwa mitume wake watakatifu na kwa manabii. 6Siri yenyewe ni hii: kupitia Injili, watu wa mataifa ni warithi wenza, ni viungo vya mwili uleule, na wanashiriki pamoja ahadi iliyo katika Kristo Yesu. 7Nilifanyika mtumishi wa Injili hii kwa zawadi ya neema ya Mungu, niliyopewa kwa kazi ya nguvu zake. 8Ingawa mimi ni mdogo kuliko aliye mdogo kabisa wa watakatifu wote, nilipewa neema hii: kuwapelekea watu wa mataifa Injili ya utajiri wa Kristo, utajiri ambao hakuna mtu atakayeweza kuufuatilia hadi mwisho wake, 9na kuwaonyesha watu wote waziwazi jinsi siri hiyo inavyotekelezwa, siri ambayo kwa enzi zote zilizopita ilifichwa ndani ya Mungu, aliyeumba vitu vyote. 10Lengo la Mungu lilikuwa kwamba sasa, kupitia kanisa, hekima yake yenye sura nyingi ijulikane kwa watawala na wenye mamlaka katika ulimwengu wa mbinguni. 11Hili lilikuwa kulingana na kusudi ambalo amekuwa nalo tangu enzi zote, ambalo alilitimiza katika Kristo Yesu Bwana wetu. 12Ndani yake, kwa imani kwake, tunaweza kumkaribia Mungu kwa ujasiri na kwa uhakika. 13Kwa hiyo nawaomba msife moyo kwa sababu ya dhiki ninazopata kwa ajili yenu. Hizo ni utukufu wenu.

14Kwa sababu hii ninapiga magoti mbele ya Baba, 15ambaye kila ukoo mbinguni na duniani unapata jina lake kutoka kwake. 16Ninaomba kwamba, kulingana na utajiri wa utukufu wake, awape nguvu, akiziimarisha nafsi zenu za ndani kupitia Roho wake, 17ili kupitia imani na katika upendo, Kristo afanye makao yake ndani ya mioyo yenu. Ninyi mmetia mizizi kwa kina na mmejengwa juu ya msingi imara, 18nami ninaomba mpate nguvu ya kufahamu, pamoja na watakatifu wote, upana na urefu na kimo na kina, 19na kuujua upendo wa Kristo, upendo unaopita ujuzi wote, ili mjazwe hadi kufikia ukamilifu wote wa Mungu.

20Basi, kwa yule aliye na uwezo wa kufanya mambo yote, mbali zaidi ya chochote tunachoomba au kufikiri, kwa nguvu zile zinazofanya kazi ndani yetu, 21utukufu uwe kwake katika kanisa na katika Kristo Yesu, kizazi hadi kizazi, milele na milele. Amina.