Waefeso 5

1Basi mwigeni Mungu, kwa kuwa ninyi ni watoto anaowapenda sana. 2Acheni upendo uongoze mwenendo wenu, kama Kristo alivyotupenda, akajitoa kwa ajili yetu kuwa toleo na dhabihu kwa Mungu, harufu nzuri iliyompendeza.

3Uasherati, uchafu wa kila aina na tamaa ya mali visitajwe hata kidogo kuwa vipo kati yenu; ndivyo inavyowapasa watakatifu. 4Vivyo hivyo na matendo ya aibu, maneno ya kipumbavu na mizaha michafu. Mambo hayo hayafai. Badala yake, kuwe na shukrani. 5Jueni hili kwa hakika, na mlitie moyoni: mwasherati, mtu mchafu au mwenye tamaa ya mali (kwa kuwa mwenye tamaa ya mali ni mwabudu sanamu) hana urithi wowote katika ufalme wa Kristo na wa Mungu.

6Msikubali mtu yeyote awapotoshe kwa maneno yasiyo na kitu ndani yake. Mambo hayo ndiyo yanayoleta ghadhabu ya Mungu juu ya wale wasiomtii. 7Kwa hiyo msishirikiane nao katika mambo wanayoyafanya. 8Hapo zamani ninyi mlikuwa giza lenyewe; sasa, katika Bwana, ninyi ni nuru. Kwa hiyo ishini kama watoto wa nuru. 9Kile ambacho nuru huzaa ni kila aina ya wema, haki na kweli. 10Pimeni mambo, mjifunze kinachompendeza Bwana. 11Msishiriki matendo ya giza, ambayo hayazai kitu chochote chema. Badala yake yaonyesheni wazi jinsi yalivyo. 12Mambo ambayo watu hao hufanya kwa siri ni ya aibu hata kuyazungumza. 13Lakini kitu chochote kikifichuliwa na nuru, huonekana jinsi kilivyo, 14kwa sababu kila kinacholetwa mahali pa kuonekana kinakuwa nuru. Ndiyo maana inasemwa, “Wewe uliyelala, amka! Inuka kutoka kwa wafu, na Kristo atakupa nuru.”

15Kwa hiyo jihadharini sana jinsi mnavyoishi, si kama watu wasio na busara, bali kama watu wenye busara. 16Tumieni vizuri kila nafasi, kwa sababu siku ni mbaya. 17Kwa sababu hiyo, msiwe watu wasio na akili. Elewani kile ambacho Bwana anataka. 18Msilewe kwa divai, kwa maana huo ni ufujaji wa maisha bila kujizuia. Badala yake, mwacheni Roho awajaze. 19Ndipo mtazungumza ninyi kwa ninyi kwa zaburi, nyimbo za sifa na nyimbo zinazotolewa na Roho, na mtamwimbia Bwana na kumpigia muziki kwa mioyo yenu. 20Mtamshukuru Mungu Baba nyakati zote na kwa kila jambo, katika jina la Bwana wetu Yesu Kristo. 21Tena mtanyenyekeana kwa kumcha Kristo kwa heshima.

22Wake wawanyenyekee waume zao wenyewe kama kwa Bwana. 23Kwa maana mume ni kichwa cha mke wake, kama vile Kristo alivyo kichwa cha kanisa; yeye ndiye Mwokozi wa mwili huo. 24Lakini kama vile kanisa linavyomnyenyekea Kristo, vivyo hivyo wake nao wanapaswa kuwanyenyekea waume zao katika mambo yote.

25Waume, wapendeni wake zenu kama Kristo alivyolipenda kanisa, akajitoa kwa ajili yake. 26Alifanya hivyo ili alitakase, akilisafisha kwa kuliosha kwa maji na kwa neno, 27ili alilete kanisa kwake likiwa na utukufu, bila doa wala kunyanzi wala kasoro yoyote ya namna hiyo, bali takatifu na lisilo na lawama. 28Basi waume wanawajibika kuwapenda wake zao kama miili yao binafsi. Mtu kumpenda mke wake ni kujipenda yeye mwenyewe. 29Hakuna aliyewahi kuuchukia mwili wake; badala yake huupa chakula na kuuangalia vizuri, kama Kristo anavyolifanyia kanisa, 30kwa sababu sisi ni viungo vya mwili wake. 31Ndiyo sababu mwanamume atawaacha baba yake na mama yake na kushikamana na mke wake, nao wawili watakuwa mwili mmoja. 32Hapa pana siri kubwa, ila ninazungumza juu ya Kristo na kanisa. 33Lakini, kurudi kwenu: kila mume ampende mke wake kama anavyojipenda mwenyewe, na mke ahakikishe kwamba anamheshimu mume wake.