Wagalatia 6

1Ndugu, tuseme mtu amekamatwa akifanya kosa fulani. Ninyi mlio wa kiroho mnapaswa kumrudisha mtu huyo katika hali njema, kwa roho ya upole. Nawe, unapofanya hivyo, jichunge mwenyewe, ili usijaribiwe pia. 2Saidianeni kubeba mizigo mizito, na kwa kufanya hivyo mtaitimiza sheria ya Kristo. 3Watu wanaodhani kuwa wao ni kitu fulani, ilhali si kitu, wanajidanganya tu. 4Kila mmoja wenu achunguze mwenendo wake. Ndipo fahari yoyote atakayokuwa nayo itakuwa juu ya yale aliyoyafanya yeye mwenyewe, wala si kwa kujilinganisha na mwingine. 5Kwa maana kila mmoja wenu atakuwa na mzigo wake wa kubeba.

6Wanaofundishwa neno wanapaswa kugawana mema yao yote na yule anayewafundisha. 7Mtu yeyote asiwapotoshe: Mungu si wa kudharauliwa. Watu watavuna kile kile wanachopanda. 8Wanaopanda katika asili yao ya dhambi watavuna uozo kutoka kwayo; lakini wanaopanda katika Roho watavuna kutoka kwa Roho mavuno ya uzima wa milele. 9Hatupaswi kuchoka kufanya mema. Wakati unaofaa ukifika tutavuna mavuno, ikiwa hatutalegea. 10Kwa hiyo, kila tunapopata fursa, tuwatendee wote mema, na zaidi ya yote wale walio wa familia ya imani.

11Angalieni herufi kubwa ninazoandika ninapowaandikia kwa mkono wangu mimi mwenyewe. 12Watu wanaotaka kujionyesha wazuri katika mwili ndio wanaowasukuma mtahiriwe. Wana lengo moja tu: hawataki kuteswa kwa sababu ya msalaba wa Kristo. 13Hata hao waliotahiriwa hawaitii sheria wenyewe. Wanachotaka ni tohara yenu, ili mwili wenu uwe kitu cha wao kujisifia. 14Lakini mimi sitakubali kamwe kujisifu kwa kitu chochote isipokuwa msalaba wa Bwana wetu Yesu Kristo. Kupitia msalaba huo ulimwengu umesulubiwa kwangu, nami nimesulubiwa kwa ulimwengu. 15Kwa maana tohara si kitu, na kutotahiriwa si kitu; jambo moja lenye maana ni uumbaji mpya. 16Amani na rehema ziwe kwa wote wanaoishi kwa kufuata kanuni hii, na kwa Israeli wa Mungu.

17Tangu sasa mtu asinisumbue tena, kwa maana alama nilizo nazo mwilini mwangu zinaonyesha kwamba mimi ni wa Yesu.

18Ndugu, neema ya Bwana wetu Yesu Kristo iwe pamoja na roho yenu. Amina.