Wagalatia 2

1Kisha, miaka kumi na minne baadaye, nilipanda tena Yerusalemu, safari hii pamoja na Barnaba, nikamchukua na Tito pia. 2Nilipanda kwa sababu Mungu alikuwa amenionyesha kwamba nipande. Niliwaeleza Injili ninayoihubiri kati ya watu wa mataifa, ingawa nilifanya hivyo faraghani, pamoja na wale waliotambulika kuwa viongozi. Sikutaka kugundua kwamba nilikuwa ninakimbia, au nilikuwa nimekimbia, bure. 3Hata hivyo, hata Tito, aliyekuwa pamoja nami, hakulazimishwa kutahiriwa, ingawa alikuwa Mgiriki. 4Jambo hili lilizuka kwa sababu ya ndugu wa uongo walioingizwa kwa siri. Walijipenyeza ili kupeleleza uhuru tulio nao katika Kristo Yesu, wapate kutufanya watumwa. 5Hatukukubali kuwatii, hata kwa muda mfupi, ili kweli ya Injili iendelee kuwa nanyi. 6Kuhusu wale waliotambulika kuwa watu muhimu (walivyokuwa zamani haileti tofauti kwangu, kwa kuwa Mungu hampendelei mtu kwa sababu ya cheo chake), viongozi hao hawakuongeza chochote kwenye ujumbe wangu. 7Kinyume chake, waliona kwamba nimekabidhiwa Injili kwa ajili ya wasiotahiriwa, kama vile Petro alivyokabidhiwa kwa ajili ya waliotahiriwa. 8Kwa maana Mungu, aliyetenda kazi ndani ya Petro ili kumfanya mtume kwa waliotahiriwa, alitenda kazi pia ndani yangu kwa ajili ya watu wa mataifa. 9Yakobo, Kefa na Yohana, waliotambulika kuwa nguzo, waliitambua neema niliyopewa, wakanipa mimi na Barnaba mkono wa kuume kama ishara ya ushirika. Tulikubaliana kwamba sisi tungeenda kwa watu wa mataifa, na wao kwa waliotahiriwa. 10Waliomba tu kwamba tuendelee kuwakumbuka maskini, nalo ndilo jambo nililokuwa na hamu kubwa ya kulifanya.

11Lakini Kefa alipofika Antiokia, nilimpinga ana kwa ana, kwa sababu alikuwa amekosea waziwazi. 12Kabla watu fulani kutoka kwa Yakobo hawajafika, alikuwa na desturi ya kula pamoja na watu wa mataifa. Lakini walipofika, alianza kujiondoa na kujitenga nao, akiwaogopa wale waliosisitiza tohara. 13Waumini wengine wa Kiyahudi waliungana naye katika unafiki huo, hata Barnaba akachukuliwa na kujifanya kwao. 14Lakini nilipoona kwamba mwenendo wao haupatani na kweli ya Injili, nilimwambia Kefa mbele yao wote, “Wewe ni Myahudi, lakini unaishi kama mtu wa mataifa na si kama Myahudi. Basi unawezaje kuwalazimisha watu wa mataifa kuishi kama Wayahudi?” 15Sisi wenyewe ni Wayahudi kwa kuzaliwa, si wenye dhambi wa mataifa. 16Hata hivyo tunajua kwamba hakuna mtu anayehesabiwa haki kwa matendo ya sheria; mtu huhesabiwa haki kwa njia ya imani katika Yesu Kristo tu. Kwa hiyo sisi pia tumemwamini Kristo Yesu, ili tuhesabiwe haki kwa imani katika Kristo wala si kwa matendo ya sheria, kwa sababu hakuna binadamu atakayehesabiwa haki kwa matendo ya sheria. 17Lakini ikiwa, tunapotafuta kuhesabiwa haki katika Kristo, sisi wenyewe tunaonekana kuwa wenye dhambi pia, je, hiyo inamfanya Kristo kuwa mtumishi wa dhambi? Hasha! 18Kwa maana nikijenga tena kile nilichokibomoa, ninaonyesha kwamba mimi ni mvunja sheria. 19Kwa maana kupitia sheria niliifia sheria, ili niishi kwa ajili ya Mungu. Nimesulubiwa pamoja na Kristo. 20Si mimi tena ninayeishi; Kristo ndiye anayeishi ndani yangu. Maisha yoyote ninayoishi bado katika mwili, ni maisha ya imani katika Mwana wa Mungu, aliyenipenda na kujitoa mwenyewe kwa ajili yangu. 21Siifanyi neema ya Mungu kuwa batili. Kwa maana ikiwa haki inakuja kupitia sheria, basi Kristo alikufa bure kabisa.