2 Wakorintho 9

1Kwa kweli si lazima niwaandikie kuhusu msaada kwa watakatifu wa Mungu. 2Najua jinsi mlivyo tayari, nami ninawaeleza Wamakedonia jambo hilo kwa fahari: “Akaya imekuwa tayari tangu mwaka jana.” Bidii yenu imewachochea wengi wao kuchukua hatua. 3Ninawatuma ndugu hawa ili fahari yetu juu yenu isionekane kuwa ya bure katika jambo hili, na ili mwe tayari, kama nilivyokuwa nikisema kwamba mtakuwa. 4La sivyo, Wamakedonia wakija pamoja nami na kukuta kwamba hamko tayari, tutaaibika kwa sababu tulikuwa na uhakika hivyo, achilia mbali ninyi wenyewe. 5Ndiyo sababu niliona ni lazima kuwaomba ndugu hawa watangulie kuja kwenu kabla yangu, na kuandaa mapema zawadi ya ukarimu mliyoahidi, ili iwe tayari kama zawadi itokayo kwa ukarimu, wala si kama kitu kinachotolewa kwa choyo.

6Kumbukeni hili: mtu akipanda kidogo, atavuna kidogo; akipanda kwa wingi, atavuna kwa wingi. 7Kila mmoja wenu atoe kiasi alichoamua moyoni mwake, si kwa masikitiko, wala kwa sababu anajiona analazimika. Mungu anampenda mtu anayetoa kwa furaha. 8Mungu anaweza kuwapa kila neema kwa wingi, ili kwa kila namna na kila wakati mwe na yote mnayohitaji, na zaidi ya kutosha kwa kila kazi njema. 9Kama Maandiko yasemavyo: “Ametawanya vipawa vyake kila mahali, amewapa wahitaji; haki yake inadumu milele.” 10Mungu, anayempatia mpanzi mbegu na kumpa mkate wa kula, atawapatia ninyi pia mbegu na kuizidisha, na kuifanya haki yenu izae mavuno mengi zaidi. 11Mtatajirishwa kwa kila namna ili muweze kuwa wakarimu kwa kila namna, na ukarimu wenu, tutakaoupeleka sisi, utaleta shukrani kwa Mungu. 12Kwa maana msaada huu, ambao ni huduma takatifu, haujazi tu kile wanachopungukiwa watakatifu wa Mungu; unafurika pia katika shukrani nyingi kwa Mungu. 13Msaada huu utaonyesha jinsi mlivyo, nao watamtukuza Mungu kwa sababu hiyo: kwa jinsi mnavyoitii Injili ya Kristo mnayoikiri, na kwa ukarimu wa ushirika wenu nao na watu wote. 14Nao watakapowaombea, watawaonea shauku, kwa sababu ya neema ya Mungu ipitayo kiasi iliyo juu yenu. 15Mungu ashukuriwe kwa zawadi yake, ambayo hakuna maneno yanayoweza kuieleza!