2 Wakorintho 3

1Je, tunaanza tena kujitambulisha kwenu sisi wenyewe? Au je, tunahitaji barua za utambulisho kwenu au kutoka kwenu, kama watu wengine wanavyohitaji? Hasha! 2Barua yetu ni ninyi wenyewe. Imeandikwa mioyoni mwetu, na kila mtu anaweza kuitambua na kuisoma. 3Ni wazi kwamba ninyi ni barua kutoka kwa Kristo, iliyotokea kupitia huduma yetu. Haikuandikwa kwa wino bali kwa Roho wa Mungu aliye hai, wala haikuandikwa katika mbao za mawe bali katika mbao za nyama, yaani mioyo ya wanadamu.

4Huu ndio uhakika tulio nao mbele za Mungu, nao unatoka kupitia Kristo. 5Si kwamba tunafaa kwa ajili ya kazi hii kwa uwezo wetu wenyewe, kana kwamba tungeweza kuhesabu jambo lolote kuwa kazi yetu. Kufaa kwetu kunatoka kwa Mungu. 6Yeye ametufanya tufae kuwa watumishi wa agano jipya, agano lisilo la sheria iliyoandikwa bali la Roho. Kwa maana sheria iliyoandikwa huua, bali Roho hutoa uzima.

7Huduma ya kifo, iliyochongwa kwa herufi katika mawe, ilikuja na utukufu, utukufu mkubwa hata Waisraeli hawakuweza kuukazia macho uso wa Musa kwa sababu ya utukufu ulioangaza pale, utukufu uliokuwa ukiondolewa. 8Basi, huduma ya Roho itakuja na utukufu mkubwa zaidi kama nini! 9Kwa maana ikiwa huduma iliyoleta hukumu ya adhabu ilikuwa na utukufu, huduma iletayo haki inafurika kwa utukufu mkubwa zaidi. 10Kwa kweli, kwa jambo hili kile kilichokuwa na utukufu hapo kwanza hakina utukufu wowote, kwa kuwa kimezidiwa na utukufu mkubwa kuliko huo. 11Kwa maana ikiwa kile kilichokuwa kikiondolewa kilikuwa na utukufu wake, kile kinachodumu kina utukufu mkubwa zaidi kuliko huo.

12Basi, kwa kuwa hili ndilo tumaini letu, tunasema kwa uwazi mkubwa, 13si kama Musa alivyofanya alipokuwa akiufunika uso wake kwa kifuniko, ili Waisraeli wasiukazie macho mwisho wa kile kilichokuwa kikiondolewa. 14Hata hivyo, akili zao zilifanywa kuwa ngumu. Mpaka siku hii ya leo, kifuniko kile kile kinabaki pale wanaposikia agano la kale likisomwa, wala hakiondolewi, kwa kuwa ni katika Kristo tu kinapoondolewa. 15Hata leo, kila wakati Musa anaposomwa, kifuniko kinakaa juu ya mioyo yao. 16Lakini kifuniko huondolewa kila mara mtu anapomgeukia Bwana. 17Basi Bwana huyu ndiye Roho, na mahali popote alipo Roho wa Bwana, pana uhuru. 18Lakini sisi sote, nyuso zetu zikiwa hazijafunikwa, tunautazama utukufu wa Bwana kama katika kioo, nasi tunabadilishwa tufanane na sura ile ile tunayoiona, kutoka utukufu hadi utukufu mkubwa zaidi. Hivyo ndivyo Bwana, aliye Roho, anavyotenda kazi.