2 Wakorintho 11

1Laiti mngevumilia upumbavu kidogo kutoka kwangu. Naam, nivumilieni. 2Wivu nilio nao juu yenu ni wivu wa Mungu mwenyewe. Nimewachumbia mume mmoja: nataka kuwaleta kwa Kristo kama bibi arusi aliye bikira safi. 3Lakini ninaogopa kwamba, kama vile hila ya nyoka ilivyomdanganya Hawa, akili zenu zisije kwa namna fulani zikaharibiwa na kugeuzwa mbali na uaminifu wenu safi usiogawanyika kwa Kristo. 4Mtu yeyote akija na kumhubiri Yesu mwingine tofauti na yule tuliyemhubiri, au mkipokea roho tofauti na yule mliyempokea, au Injili tofauti na ile mliyoikaribisha, mnavumilia hilo vizuri sana! 5Sijioni kuwa nimepungua hata kidogo kuliko hao mitume wakuu mno. 6Hata kama mimi si msemaji aliyefunzwa, sivyo katika ujuzi. Tumewaonyesha hilo waziwazi, kwa kila namna na katika mambo yote.

7Au je, ilikuwa dhambi kwangu kujishusha ili ninyi mwinuliwe, kwa kuwahubiria Injili ya Mungu bila kuwatoza chochote? 8Niliyapora makanisa mengine, nikipokea malipo kutoka kwao ili niweze kuwatumikia ninyi. 9Na nilipokuwa huko pamoja nanyi nikapungukiwa, sikuwa mzigo kwa mtu yeyote, kwa maana ndugu waliokuja kutoka Makedonia walinitimizia kile nilichopungukiwa. Kwa kila namna nimehakikisha kwamba siwagharimu chochote, nami nitaendelea hivyo. 10Ninatangaza kwa kweli ya Kristo iliyo ndani yangu: kujivunia huku kwangu hakutanyamazishwa popote katika wilaya za Akaya. 11Kwa nini hivyo? Kwa sababu siwapendi? Mungu anajua kwamba nawapenda!

12Nami nitaendelea kufanya ninachofanya, ili niwanyime nafasi wale wanaoitafuta: nafasi ya kujivunia kwamba wako sawa nasi. 13Watu kama hao ni mitume bandia na wafanyakazi wasio waaminifu, wanaojifanya kuwa mitume wa Kristo. 14Hilo halishangazi: Shetani mwenyewe hujifanya malaika wa nuru. 15Kwa hiyo si jambo kubwa ikiwa watumishi wake pia hujifanya watumishi wa haki. Mwisho wao utalingana na yale waliyotenda.

16Nasema tena: mtu yeyote asidhani kwamba mimi ni mpumbavu. La sivyo, nikaribisheni hata kama mpumbavu, ili nami nipate kujivuna kidogo. 17Ninachosema kwa uhakika huu wa kujivuna sikisemi kwa njia ya Bwana, bali kana kwamba ni katika upumbavu. 18Kwa kuwa wengi wanajivuna kwa vipimo vya kibinadamu tu, nami nitajivuna. 19Ninyi ni watu wenye busara hata hivyo, na kwa hiyo mnawavumilia wapumbavu kwa furaha! 20Naam, mnavumilia mtu akiwatia utumwani, mtu akiwala mali, mtu akiwanasa, mtu akijifanya bwana juu yenu, mtu akiwapiga usoni. 21Lazima niseme, kwa aibu yetu, kwamba tulikuwa dhaifu mno kutenda hivyo! Lakini chochote ambacho mtu mwingine anathubutu kujivunia (nazungumza katika upumbavu), nami nathubutu kukijivunia. 22Je, wao ni Waebrania? Mimi pia. Je, wao ni Waisraeli? Mimi pia. Je, wao ni wazao wa Ibrahimu? Mimi pia. 23Je, wao ni watumishi wa Kristo? Nazungumza kana kwamba nimepatwa na wazimu, lakini mimi ni mtumishi bora zaidi: nimefanya kazi ngumu zaidi sana, nimefungwa gerezani mara nyingi zaidi, nimepigwa mara zisizohesabika, na mara kwa mara nimekaribia kifo. 24Mara tano viongozi wa Wayahudi walinichapa viboko arobaini kasoro kimoja. 25Mara tatu nilichapwa kwa fimbo; mara moja nilipigwa mawe; mara tatu meli yangu ilivunjika; usiku mmoja na mchana mmoja nimekaa majini katika bahari kuu. 26Mara kwa mara nimekuwa safarini, nikikabili hatari za mito, hatari za wanyang’anyi, hatari kutoka kwa watu wa taifa langu, hatari kutoka kwa watu wa mataifa, hatari mjini, hatari nyikani, hatari baharini, hatari kati ya ndugu wa uongo; 27katika kazi ngumu na uchovu, usiku mwingi bila usingizi, katika njaa na kiu, siku nyingi bila chakula, katika baridi na bila nguo za kutosha. 28Na mbali na mambo hayo mengine yote, kuna kile kinachonilemea siku baada ya siku: kuyahangaikia makanisa yote. 29Je, kuna mtu aliye dhaifu bila mimi kujisikia dhaifu pia? Je, kuna mtu anayeangushwa bila moyo wangu kuwaka ndani? 30Ikiwa ni lazima nijivune, nitajivunia mambo yanayohusu udhaifu wangu. 31Mungu na Baba wa Bwana Yesu, anayehimidiwa milele, anajua kwamba ninayosema si uongo. 32Huko Dameski, mtawala aliyewekwa na Mfalme Areta aliweka walinzi juu ya mji wa Wadameski ili anikamate. 33Lakini mimi niliteremshwa ndani ya tenga la kamba kupitia mwanya katika ukuta, nikaponyoka mkononi mwake.