2 Wakorintho 5

1Kwa maana tunajua kwamba ikiwa hema tunamoishi hapa duniani itang’olewa, tunalo jengo kutoka kwa Mungu, nyumba ambayo haikujengwa kwa mikono ya wanadamu, ya milele, mbinguni. 2Kwa hiyo katika hema hii tunaugua, tukitamani kuvaa makao yetu yatokayo mbinguni juu ya haya tuliyo nayo, 3tukiwa na hakika kwamba tukiisha kuyavaa hatutaonekana tukiwa uchi. 4Tukiwa katika hema hii tunaugua chini ya uzito wake. Si kwamba tunataka kuivua; tunataka kuvaa ile mpya juu yake, ili uzima umeze yote yanayokufa. 5Ni Mungu aliyetuandaa kwa ajili ya jambo hili hili, naye ametupa Roho kama malipo ya awali.

6Kwa hiyo siku zote tuna moyo mkuu. Tunajua kwamba tukiwa nyumbani katika mwili tuko mbali na Bwana, 7kwa maana tunaishi kwa imani, si kwa kuona. 8Basi tuna moyo mkuu, nasi tungependa zaidi sana kuhama kutoka katika mwili na kukaa nyumbani pamoja na Bwana. 9Ndiyo sababu tumeweka mioyo yetu katika kumpendeza, iwe tungali nyumbani katika mwili au tumeuacha. 10Kwa maana sisi sote lazima tufunuliwe wazi mbele ya kiti cha hukumu cha Kristo, ili kila mmoja apokee kile kinacholingana na mambo aliyoyatenda katika mwili, yawe mema au yasiyo na thamani.

11Kwa kuwa tunajua maana ya kumcha Bwana, tunajitahidi kuwashawishi watu. Mungu tayari anatuona wazi jinsi tulivyo, nami natumaini dhamiri zenu pia zinatuona wazi vivyo hivyo. 12Hatujitambulishi kwenu tena. Badala yake, tunawapa sababu ya kuona fahari juu yetu, ili mpate la kuwajibu wale wanaoona fahari katika sura ya nje wala si katika yaliyo moyoni. 13Ikiwa tumerukwa na akili, ni kwa ajili ya Mungu. Ikiwa tuna akili timamu, ni kwa ajili yenu. 14Ni upendo wa Kristo unaotusukuma. Tumefikia uamuzi huu: mmoja amekufa kwa ajili ya wote, na kwa hiyo wote wamekufa. 15Alikufa kwa ajili ya wote, ili wale walio hai wasiishi tena kwa ajili yao wenyewe, bali kwa ajili yake aliyekufa na kufufuliwa kwa ajili yao.

16Kwa hiyo tangu sasa hatumtazami mtu yeyote kwa vipimo vya kibinadamu tu. Hata kama hapo kwanza tulimjua Kristo kwa vipimo hivyo, sasa hatumjui hivyo tena. 17Kwa hiyo ikiwa mtu yeyote yuko katika Kristo, mtu huyo ni sehemu ya uumbaji mpya. Mambo ya kale yamepita, na tazama, mambo mapya yamekuja. 18Na haya yote ni kazi ya Mungu. Kupitia Kristo ametupatanisha naye mwenyewe, naye ametupa huduma ya upatanisho. 19Kwa maana ni Mungu aliyekuwa akitenda kazi katika Kristo, akiupatanisha ulimwengu naye mwenyewe. Hakuwahesabia watu makosa yao, naye ametukabidhi neno la upatanisho. 20Kwa hiyo sisi ni mabalozi tunaozungumza kwa niaba ya Kristo, na ni Mungu mwenyewe anayetoa wito wake kupitia sisi. Tukizungumza kwa niaba ya Kristo, tunawasihi: mpatanishwe na Mungu. 21Kristo hakuwahi kujua dhambi, lakini kwa ajili yetu Mungu alimfanya kuwa dhambi, ili, tukiwa tumeunganishwa naye, sisi tufanyike haki ya Mungu.