2 Wakorintho 6

1Kwa hiyo, kama watu wanaofanya kazi pamoja na Mungu, tunawasihi pia: msiiache neema ya Mungu mliyoipokea ipotee bure. 2Kwa maana asema, “Wakati wa fadhili nilikujibu; siku ya wokovu nilikusaidia.” Tazama, sasa ndio wakati wa fadhili. Tazama, sasa ndiyo siku ya wokovu. 3Hatumpi mtu yeyote sababu ya kujikwaa katika jambo lolote, ili huduma yetu isionekane na kosa. 4Badala yake, katika kila jambo tunajionyesha kuwa watumishi wa Mungu: kwa uvumilivu mwingi, katika dhiki, katika maafa, katika hali za kubanwa, 5katika kupigwa, katika magereza, katika ghasia, katika kazi ngumu, katika kukesha usiku, katika kukaa bila chakula; 6kwa usafi, kwa ujuzi, kwa subira, kwa wema, kwa Roho Mtakatifu, kwa upendo wa kweli, 7kwa kusema kweli, kwa nguvu ya Mungu; kwa silaha za haki katika mkono wa kuume na wa kushoto; 8katika heshima na katika aibu, katika kusingiziwa na katika kusifiwa. Tunadhaniwa kuwa wadanganyifu, ilhali tu wakweli; 9kuwa watu wasiojulikana, ilhali tunajulikana sana; kuwa tunakufa, na bado tazama, tu hai; kuwa watu wanaoadhibiwa, ilhali hatuuawi; 10kuwa wenye huzuni, ilhali siku zote tumejaa furaha; kuwa maskini, ilhali tunawatajirisha wengi; kuwa watu wasio na kitu, ilhali kila kitu ni chetu.

11Wakorintho, tumesema nanyi bila kuficha kitu, na moyo wetu umefunguka wazi kuwapokea. 12Hamkosi nafasi ndani yetu; ni katika upendo wenu wenyewe ndimo mlimobanwa. 13Tupeni kipimo kile kile kama malipo. Nasema kama ninavyowaambia watoto wangu: ifungueni mioyo yenu wazi kwetu pia.

14Msifungwe nira moja isiyolingana pamoja na wasioamini. Je, haki na uasi vinaweza kuwa wabia? Je, nuru na giza vinaweza kushiriki kitu? 15Kristo anawezaje kupatana na Beliari? Mwamini anaweza kuwa na fungu gani pamoja na asiyeamini? 16Je, hekalu la Mungu linaweza kupatana na sanamu? Kwa maana sisi ni hekalu la Mungu aliye hai. Kama Mungu alivyosema, “Nitafanya makao yangu ndani yao na kutembea kati yao; nitakuwa Mungu wao, nao watakuwa watu wangu.” 17Kwa hiyo “ondokeni miongoni mwao na mkae mbali,” asema Bwana, “wala msiguse kilicho najisi; ndipo nitawakaribisha.” 18“Nitakuwa Baba yenu, nanyi mtakuwa wana wangu na binti zangu,” asema Bwana Mwenyezi.