2 Wakorintho 13

1Sasa ninakuja kwenu kwa mara ya tatu. “Kila shtaka litaamuliwa kwa ushahidi wa watu wawili au watatu.” 2Nilipokuwa pamoja nanyi katika ziara yangu ya pili, niliwaonya wale waliotenda dhambi hapo kwanza na wengine wote, na sasa, nikiwa mbali, ninawaonya tena: nitakaporudi sitamhurumia mtu yeyote, 3kwa kuwa mnataka ushahidi kwamba kweli Kristo anasema ndani yangu. Hashughuliki nanyi kwa udhaifu; ana nguvu kati yenu. 4Ni kweli alisulubiwa katika udhaifu, lakini anaishi kwa nguvu ya Mungu. Sisi nasi ni dhaifu ndani yake, lakini mtatuona tukiishi pamoja naye kwa nguvu ya Mungu.

5Jitazameni kwa makini: je, mnashikilia imani? Jipimeni wenyewe. Au hamwoni katika maisha yenu kwamba Yesu Kristo yumo ndani yenu? Yaani, isipokuwa mmeshindwa jaribio. 6Nami natumaini mtaona kwamba sisi si wale walioshindwa jaribio. 7Maombi yetu kwa Mungu ni kwamba msitende ubaya wowote kabisa. Lengo letu si kuonekana kuwa tumefaulu jaribio; tunataka ninyi mtende yaliyo mema, hata kama sisi tutaonekana kama watu walioshindwa jaribio. 8Hatuna uwezo wa kutenda dhidi ya kweli, ila tu kwa ajili yake. 9Tunafurahi kuwa dhaifu ikiwa ni kwa sababu ninyi mna nguvu. Naam, tunaomba hili: kwamba mrekebishwe na kufanywa kamili. 10Ndiyo sababu ninaandika haya ningali mbali: ili nitakapokuja nisilazimike kuwashughulikia kwa ukali, nikitumia mamlaka ambayo Bwana alinipa, ambayo ni ya kujenga wala si ya kubomoa.

11Hatimaye, ndugu, furahini. Kubalini kurekebishwa, mfarijiwe, mwe na nia moja, na mdumishe amani kati yenu. Ndipo Mungu wa upendo na amani atakuwa pamoja nanyi. 12Salimianeni ninyi kwa ninyi kwa busu takatifu. Watakatifu wote wa Mungu wanawasalimu. 13Neema ya Bwana Yesu Kristo, upendo wa Mungu, na ushirika wa Roho Mtakatifu viwe pamoja na kila mmoja wenu.