1 Timotheo 6

1Wote walio chini ya nira ya utumwa wawahesabu mabwana zao kuwa wanastahili heshima kamili, ili jina la Mungu na mafundisho yetu visisemwe vibaya. 2Wale ambao mabwana zao ni waumini wasiwadharau kwa sababu ni ndugu. Badala yake, wawatumikie zaidi, kwa sababu wale wanaonufaika na huduma yao njema ni waumini wenzao na wapendwa wao. Fundisha mambo haya na uwahimize watu kuyafuata. 3Mtu yeyote anayefundisha mambo tofauti, wala hakubaliani na maneno mazima ya Bwana wetu Yesu Kristo na mafundisho yanayoongoza kwenye uchaji wa Mungu, 4amejaa kiburi, naye haelewi chochote. Watu wa namna hiyo wana hamu isiyo ya afya ya mabishano na ubishi juu ya maneno. Mambo hayo huleta wivu, ugomvi, kashfa na shuku mbaya, 5na msuguano usiokoma kati ya watu ambao akili zao zimeharibika na ambao wameipoteza kweli. Wanadhani kwamba uchaji wa Mungu ni njia ya kupata fedha. 6Kweli uchaji wa Mungu ni faida kubwa, unapoambatana na kuridhika. 7Kwa maana hatukuleta kitu ulimwenguni, wala hatuwezi kuondoka nacho chochote. 8Tukiwa na chakula na mavazi, tutaridhika na hivyo. 9Wale wanaotaka kutajirika huanguka katika majaribu na mtego, na katika tamaa nyingi za kipumbavu na zenye madhara, zinazowavuta watu chini hadi kwenye uharibifu na maangamizi. 10Kwa maana kupenda fedha ni mzizi wa kila aina ya uovu. Watu wengine, kwa kutamani fedha, wamepotea mbali na imani, na wamejichoma kwa huzuni nyingi.

11Lakini wewe, mtu wa Mungu, yakimbie mambo haya yote, na ufuatilie haki, uchaji wa Mungu, imani, upendo, uvumilivu na upole. 12Shindana vizuri katika shindano jema la imani. Shika uzima wa milele ulioitiwa ulipokiri ukiri wako mzuri mbele ya mashahidi wengi. 13Mbele za Mungu, anayevipa vitu vyote uhai, na mbele ya Kristo Yesu, aliyekiri ukiri mzuri alipotoa ushuhuda mbele ya Pontio Pilato, nakuagiza 14uishike amri hii bila kosa wala lawama mpaka Bwana wetu Yesu Kristo atakapodhihirishwa. 15Mungu atalitimiza jambo hili kwa wakati uliofaa: yeye aliye Mwenye heri na Mtawala pekee, Mfalme wa wafalme na Bwana wa mabwana, 16ambaye peke yake hawezi kufa, anayeishi katika nuru ambayo hakuna awezaye kuikaribia, ambaye hakuna mtu aliyemwona wala awezaye kumwona. Kwake iwe heshima na uweza wa milele. Amina.

17Waambie walio matajiri katika ulimwengu huu wa sasa wasiwe na kiburi, wala wasiweke tumaini lao katika mali, ambayo si ya hakika, bali kwa Mungu, anayetupa kwa wingi kila kitu ili tukifurahie. 18Waambie watende mema, wawe matajiri katika matendo mema, watoe kwa ukarimu na kushirikiana na wengine. 19Kwa njia hiyo watajiwekea hazina iwe msingi imara kwa ajili ya zama zijazo, ili waushike uzima ulio uzima kweli.

20Timotheo, linda kile ulichokabidhiwa. Jiepushe na maneno matupu yasiyomcha Mungu na mapingamizi ya yale yanayoitwa maarifa kwa makosa. 21Wengine wamedai kuwa nayo, na kwa kufanya hivyo wamepotea mbali na imani. Neema iwe pamoja nanyi nyote.